“Ndĩ mũnini, mũrũ wa maitũ nĩ aahũũraga na akanuma o mũthenya. Thutha wa kũhika, nyina wa mũthuri wakwa no athiire na mbere kũnjĩkaga maũndũ moru. Marĩ na ithe wa mũthuri wakwa maanduĩte ngombo. Ndaiguaga ngĩenda kwĩyũraga.”—Madhu, a India.

 Kĩama kĩa Ũgima wa Mwĩrĩ gĩa Thĩ kĩaugire atĩ “ũhoro wa atumia gwĩkwo maũndũ moru nĩ ũtheremete kũndũ guothe thĩinĩ wa thĩ.” Kĩegerereirie atĩ mũtumia ũmwe harĩ atumia atatũ, nĩ ahũũragwo kana agekwo maũndũ moru ma ngomanio ihinda rĩna ũtũũro-inĩ wake.

 Angĩkorũo wanacemania na ũndũ ta ũcio, no ũiguage ta ũrĩ ũgwati-inĩ wa kũrumwo, kũhũũrũo, kana gwĩkwo maũndũ moru ma ngomanio harĩa hothe wathiĩ. Nĩ ũndũ wa kũhinyĩrĩrio na njĩra ĩyo tondũ wa gũkorũo tu ũrĩ mũtumia, no ũkinyĩrĩre kuona ta andũ aingĩ monaga atumia matarĩ andũ a bata. No hihi Ngai nĩ onaga atumia marĩ a bata?

 Rĩandĩko: ‘Ngai aamombire marĩ mũndũrũme na mũtumia.ʼ—Kĩambĩrĩria 1:27.

 Ũrutani: Ngai nĩwe wombire arũme o hamwe na atumia. Onaga othe magĩrĩire kũheo gĩtĩo. Makĩria ma ũguo, erĩgagĩrĩra mũthuri “endage mũtumia wake o ta ũrĩa eyendete we mwene,” ndakamũtue ngombo, na ndakamwĩkage maũndũ moru kana kũmũruma. (Aefeso 5:33; Akolosai 3:19) Kwoguo hatarĩ nganja, Ngai nĩ endaga atumia makorũo na ũgitĩri.

 “Ndĩ mwana, nĩ ndekagwo maũndũ moru ma ngomanio nĩ andũ a famĩlĩ citũ. Ndĩ na mĩaka 17, mũndũ ũrĩa wanyandĩkĩte wĩra nĩ aanjĩrire atĩ nĩ ekũbuta ndarega gũkomania nake. Ningĩ ndĩ mũndũ mũgima ndanahũthio nĩ mũthuri wakwa, aciari akwa, na andũ a itũũra. No nĩ ndacokire ngĩĩruta ũhoro wĩgiĩ Jehova, b Mũũmbi witũ. Nĩ aheete atumia gĩtĩo. Kũmenya ũguo nĩ kwandeithirie kuona atĩ nĩ anyendete na nĩ onaga ndĩ wa bata.”—Maria, Argentina.

 Rĩandĩko: “Nĩ kũrĩ mũrata ũnyitanaga na mũndũ gũkĩra mũrũ wa nyina.”—Thimo 18:24.

 Ũrutani: Mũrata wa ma no agũteithie. Kũngĩhoteka ĩra mũndũ wĩhokete ũrĩa ũraigua.

 “Kwa ihinda rĩa mĩaka 20 ndierire mũndũ o na ũmwe atĩ nĩ ndekĩtwo maũndũ moru ma ngomanio. Ũndũ ũcio nĩ watũmĩte nduĩke mũndũ ũtarĩ na gĩkeno na ũrĩ na mĩtangĩko mĩingĩ. No rĩrĩa nderire mũndũ ũngĩ ũhoro ũcio nake agĩthikĩrĩria, nĩ ndaiguire ndacokwo nĩ thayũ na njĩra nene.”—Elif, Türkiye.

 Rĩandĩko: ‘Ikagĩriai Ngai mĩtangĩko yanyu yothe, tondũ nĩ amũrũmbũyagia.’—1 Petero 5:7.

 Ũrutani: Rĩrĩa ũrahoya, Ngai nĩ agũthikagĩrĩria. (Thaburi 55:22; 65:2) Tondũ nĩ akũrũmbũyagia, no agũteithie kuona ũrĩa ũrĩ wa bata.

 “Kwĩruta ũhoro wĩgiĩ Jehova nĩ kwandeithirie kwambĩrĩria kũhonia ironda ciakwa cia ngoro. Rĩu no hote kũhoya Ngai na ndĩmwĩre ũrĩa wothe ndĩraigua. Atariĩ ta mũrata ũtaũkagĩrũo wega nĩ ũrĩa ndĩraigua.”—Ana, Belize.

 Rĩandĩko: “Ciana iria itarĩ maithe o na andũ arĩa mahehenjekete [wee Jehova] nĩ ũrĩtũmaga mone kĩhooto, nĩguo mũndũ wa gũkũ thĩ ndakanacoke gũtũma metigĩre.”—Thaburi 10:17, 18.

 Ũrutani: Ica ikuhĩ Ngai nĩ arĩniina wagi wothe wa kĩhooto, hamwe na ũhoro wa atumia gũkorũo magĩkwo maũndũ moru.

 “Kwĩruta atĩ ica ikuhĩ Jehova nĩ arĩniina ũhoro wa atumia na tũirĩtu tũnini gwĩkwo maũndũ moru, gũkoretwo gũtariĩ ta ndawa harĩ niĩ. Nĩ kũheete thayũ wa meciria.”—Roberta, Mexico.

 Nĩguo wĩrute ũhoro makĩria wĩgiĩ ũrĩa Bibilia ĩheanaga kĩĩrĩgĩrĩro, kĩrĩa kĩngĩtũma wĩhoke ciĩranĩro ciayo, na ũrĩa Aira a Jehova maheanaga ũteithio uumĩte Bibilia-inĩ, hoya wĩruti wa Bibilia hatarĩ marĩhi kuuma kũrĩ ũrĩa ũkũheete karatathi gaka.

 Ruta gĩcunjĩ gĩkĩ na njĩra ũngĩhota gũgĩcaba.