Ũthuthuria wĩrĩgĩte gwĩkwo kũndũ gũtiganĩte thĩinĩ wa thĩ a wonanirie atĩ mũndũ ũmwe harĩ andũ ana nĩ aiguaga arĩ na ihooru.

•   “Kwaga ngwatanĩro na andũ arĩa angĩ no kũhutie mũndũ o wothe, gũtekũmakania ũkũrũ wake, kana kũrĩa aikaraga.”—Chido Mpemba, ũmwe wa aikarĩri gĩtĩ a World Health Organization’s Commission on Social Connection.

 Ngũrani na ũrĩa andũ aingĩ mangĩĩciria, kũigua ihooru gũtihutagia o andũ arĩa akũrũ kana arĩa maikaraga marĩ aiki, no nĩ nginya andũ ethĩ, andũ marĩ na ũgima mwega wa mwĩrĩ, andũ magaacĩrĩte, na o na arĩa marĩ kĩhiko-inĩ. Kwaga ngwatanĩro na andũ arĩa angĩ na kũigua ihooru no kũhutie ũgima wa mũndũ wa mwĩrĩ na wa meciria na njĩra nene.

•   Ndagĩtarĩ ũmwe mũnene thĩinĩ wa Amerika (US) wĩtagwo Dr. Vivek Murthy, aaugire atĩ mũndũ ũrĩ na ihooru to ihooru aiguaga, no oongereire atĩ ũgwati wa gũkua ũrĩa uumanaga na mũndũ kwaga ngwatanĩro na andũ arĩa angĩ, no ta wa mũndũ ũrĩa ũnyuaga thigara ta 15 harĩ mũthenya.

 Mũũmbi witũ ndendaga twage ngwatanĩro na andũ arĩa angĩ. Muoroto wa Ngai kuuma tene nĩ andũ makoragwo na ngwatanĩro njega hamwe na andũ arĩa angĩ.

•   Ũtaaro wa Bibilia: “Ngai . . . akiuga ũũ: ‘Ti wega mũndũ ũyũ athiĩ na mbere gũikara arĩ wiki.’”—Kĩambĩrĩria 2:18.

 Ngai nĩ endaga tũgĩe ũrata hamwe nake. Eranĩire atĩ nĩ arĩtũkuhagĩrĩria twerutanĩria kũmũkuhĩrĩria.—Jakubu 4:8.

•   Ũtaaro wa Bibilia: “Gũkena-rĩ, nĩ arĩa marũmbũyagia mabataro mao ma kĩĩroho, nĩ gũkorũo Ũthamaki wa igũrũ nĩ wao.”—Mathayo 5:3.

 Ngai endaga tũmũthathaiye tũrĩ hamwe na andũ arĩa angĩ. Tũngĩka ũguo, nĩ tũgĩaga na gĩkeno.

•   Ũtaaro wa Bibilia: “Nĩ twĩciranagie mũndũ na ũrĩa ũngĩ nĩguo twĩkĩranage hinya ũhoro-inĩ wĩgiĩ wendo na ciĩko njega, tũtegũtiga gũcemanagia hamwe, . . . no twĩkĩranage ngoro.”—Ahibirania 10:24, 25.

 Nĩguo wone ũhoro makĩria wĩgiĩ nĩkĩ nĩ ũndũ wa bata gwĩthema ihooru, thoma gĩcunjĩ kĩrĩ na kĩongo Upweke Katika Ulimwengu Uliojaa Mawasiliano.”