Bibilia nĩ ĩkoragwo na ũũgĩ ũrĩa wa bata makĩria ũngĩtũteithia ũtũũro-inĩ. Ũngĩmĩthomaga na ũgecũrania ũtegũtĩĩrĩria na ũkahũthĩra maũndũ marĩa ũreruta, “njĩra ciaku nĩ ikũgaacĩra.” (Joshua 1:8; Thaburi 1:1-3) Ningĩ nĩ ũkũmenya Ngai na Mũrũ wake, Jesu, na ũmenyo ũcio no ũtũme ũkaahonokio.—Johana 17:3.

Hihi wagĩrĩirũo kũrũmĩrĩra mũtaratara ũrĩkũ ũgĩthoma mabuku ma Bibilia? No ũhũthĩre mĩtaratara ĩtiganĩte. Mũtaratara ũyũ wa gũthoma Bibilia no ũgũteithie gũthoma mabuku ma Bibilia kũringana na ũrĩa marũmanĩrĩire kana kũringana na ũhoro ũrĩa warĩrĩirio. Kwa ngerekano, no ũthuure icunjĩ iria ũgũthoma nĩguo wone historĩ ĩgiĩ ũrĩa Ngai aahiũranagia na Aisiraeli a tene. No ũthome icunjĩ ingĩ nĩguo wone ũrĩa kĩũngano gĩa Gĩkristiano gĩa karine ya mbere kĩaambĩrĩirie na gĩgĩkũra. Ũngĩthomaga mĩrango ĩrĩa yonanĩtio ya o mũthenya, no ũthome Bibilia yothe na mwaka ũmwe.

O na angĩkorũo ũracaria mũtaratara wa gũthomaga Bibilia o mũthenya, mũtaratara wa gũthomaga Bibilia yothe na mwaka ũmwe, kana mũtaratara wa andũ arĩa marambĩrĩria gũthoma Bibilia, mũtaratara ũyũ no ũgũteithie. Ruta mũtaratara ũyũ wa gũthoma Bibilia, na wambĩrĩrie gũthoma ũmũthĩ.