Jesu aahonokirie andũ arĩa ehokeku rĩrĩa aarutire muoyo wake ũrĩ igongona rĩa ũkũũri. (Mathayo 20:28) Nĩkĩo Bibilia ĩtaga Jesu “Mũhonokia wa thĩ.” (1 Johana 4:14) Ningĩ nĩ yugaga ũũ: “Ũhonokio ndũngĩoneka harĩ mũndũ ũngĩ o na ũrĩkũ, tondũ gũtirĩ rĩĩtwa rĩngĩ mũhuro wa riũa rĩheetwo andũ tũngĩhonokio kũgerera harĩ rĩo.”—Atũmwo 4:12.

 Jesu nĩ ‘aacamire gĩkuũ nĩ ũndũ wa andũ othe’ arĩa monanagia wĩtĩkio harĩ we. (Ahibirania 2:9; Johana 3:16) Thutha ũcio “Ngai akĩmũriũkia kuuma kũrĩ arĩa akuũ,” na Jesu agĩcoka igũrũ arĩ kĩũmbe kĩa roho. (Atũmwo 3:15) Jesu arĩ kũu nĩ ahotaga “kũhonokia biũ arĩa makuhagĩrĩria Ngai kũgerera harĩ we, tondũ akoragwo muoyo hĩndĩ ciothe amathaithanĩrĩre.”—Ahibirania 7:25.

Tũrabatara Jesu atũthaithanĩrĩre nĩkĩ?

 Ithuothe tũrĩ ehia. (Aroma 3:23) Mehia nĩ matwamũranagia na Ngai, na magatwerekeria harĩ gĩkuũ. (Aroma 6:23) No Jesu akoragwo arĩ ‘mũteteri’ wa arĩa monanagia wĩtĩkio harĩ igongona rĩake rĩa ũkũũri. (1 Johana 2:1, kohoro ka magũrũ-inĩ) Amathaithanagĩrĩra, akoria Ngai aigue mahoya mao na amohere mehia mao kũgerera mũthingi wa igongona rĩa ũkũũri rĩa Jesu. (Mathayo 1:21; Aroma 8:34) Ngai nĩ ekaga kũringana na mathaithana ta macio ma Jesu tondũ nĩ maringaine na wendi Wake. Ngai aatũmire Jesu thĩinĩ wa thĩ “nĩguo thĩ ĩhonokio kũgerera harĩ we.”—Johana 3:17.

Hihi tũbataraga o kũgĩa na wĩtĩkio harĩ Jesu nĩguo tũhonokio?

 Aca. O na gũtuĩka no mũhaka tũgĩe na wĩtĩkio harĩ Jesu nĩguo tũhonokio, nĩ tũrabatara gwĩka makĩria ma ũguo. (Atũmwo 16:30, 31) Bibilia yugaga ũũ: “O ta ũrĩa mwĩrĩ ũtarĩ na roho ũrĩ mũkuũ, no taguo wĩtĩkio ũtarĩ na ciĩko ũrĩ mũkuũ.” (Jakubu 2:26) Nĩguo tũhonokio, no mũhaka:

•   Twĩrute ũhoro wĩgiĩ Jesu na Ithe, Jehova.—Johana 17:3.

•   Twake wĩtĩkio harĩ o.—Johana 12:44; 14:1.

•   Tuonanie wĩtĩkio witũ na njĩra ya gwathĩkĩra maathani mao. (Luka 6:46; 1 Johana 2:17) Jesu aarutanire atĩ ti mũndũ o wothe ũmwĩtaga “Mwathani” ũkaahonoka, no nĩ ũrĩa “wĩkaga wendi wa Ithe . . . wa igũrũ.”—Mathayo 7:21.

•   Tũthiĩ na mbere kuonania wĩtĩkio o na kũrĩ na moritũ. Jesu nĩ oonanirie ũndũ ũcio wega rĩrĩa ooigire ũũ: “Ũrĩa ũgaakirĩrĩria o nginya mũico nĩwe ũkaahonokio.”—Mathayo 24:13.