Pomelo nĩ itunda inene rĩkũraga mũtĩ-inĩ rĩhaana ta macungwa. O na gũtuĩka itunda rĩu no rĩgwe thĩ handũ harĩ na ũraihu wa makĩria ma mita 10 (fiti 30), rĩtiatũkaga! Nĩ kĩĩ gĩteithagia itunda rĩu kwaga gwatũka o na rĩgwĩte handũ haraihu ũguo?

 Ta wĩcirie: Athuthuria nĩ monete atĩ gĩcunjĩ gĩa thĩinĩ kĩa rangi mwerũ kĩa ngothi ya itunda rĩu rĩĩtagwo pomelo, gĩkoragwo kĩhaana thibonji ĩrĩ na tũhengereca na tũmĩanya. Tũmĩanya tũu tũthiaga o tũkĩingĩhaga o ũrĩa tũrarikĩra thĩinĩ wa itunda na tũkoragwo tũihũrĩte rĩera kana kĩndũ kĩhaana maĩ. Rĩrĩa itunda rĩu rĩagwa na rĩagũtha thĩ, kĩndũ kĩu kĩhaana maĩ nĩ kĩrĩgitagĩra. Ngothi ya itunda rĩu ĩnyitanaga na ĩkoma ĩgetiria hinya ũcio wa kũgwa na kwoguo rĩkaga gwatũka.

 Athomi a sayansi nĩ marathuthuria cuma ĩthondeketwo ĩkaahana ta muto, ĩrĩa ĩrĩ na ũhoti wa gwĩtiria kũgwa kana kũgũthwo, na ĩthondeketwo kũringana na ũrĩa ngothi ya itunda rĩa pomelo ĩhaana. Metĩkĩtie atĩ mũthondekere ta ũcio no ũhũthĩrũo gũthondeka ngũbia cia kũgitĩra andũ magĩtwarithia nduthi, gũthondeka ngari ũndũ ĩngĩgitĩra mũndũ kwagĩa na aksidenti, na gũthondeka harĩa andũ arĩa mathiaga rĩera-inĩ maikaraga (space station) ũndũ hatangĩgũthwo nĩ indo iria ithiũrũrũkaga kũrĩa igũrũ.

 Ũgwĩciria atĩa? Hihi ngothi ya itunda rĩa pomelo ĩrĩa ĩtatũkaga rĩagwa nĩ kwĩyumĩria yeyumĩririe-ĩ, kana nĩ kũũmbwo yombirũo?