Hasho nandenande. Ndele mepingafano naasho, ngeenge otwa didilike kutya oshinima shonhumba osho twa itavela kashi li metwokumwe filufilu naasho Ombibeli tai ti, ohatu lundulula osho twa itavela.

 Fimbo inatu hovela okunyanyangida o-New World Translation of the Holy Scriptures mo 1950, otwa konakona tete Ombibeli. Otwa li twa longifa etoloko keshe olo li li po, nokukanghamekela eitavelo letu kwaasho twa konakona. Natu ka taleni komahongo manini omwaao a kala a itavelwa kEendombwedi daJehova, ndele to konakona ove mwene ngeenge otaa tu ngoo kumwe naasho Ombibeli tai hongo lela.

1.   Osho twa itavela: Kalunga ke fi Omukwatatu. Oshifo shoZion’s Watch Tower shaJuli 1882, osha ti: “Ovaleshi voshifo shetu ove shii kutya, fimbo twa itavela muJehova naJesus nosho yo momhepo iyapuki, otu na okuhenuka filufilu omahongo ehe li pamishangwa oo kutya ovo ove li Ookalunga vatatu muumwe, ile ngaashi vamwe hava ti, Kalunga umwe movanhu vatatu.”

     Osho Ombibeli tai hongo: “Omwene Kalunga ketu, Oye Omwene aeke.” (Deuteronomion 6:4) “Fye otu na Kalunga umwe, oTate, omuou mwa dja aishe, nefikilo letu omuye, nOmwene umwe, Jesus Kristus, omolwaou aishe i li po, nafye yo omolwaye.” (1 Ovakorinto 8:6) Jesus okwa ti: “Tate oku dule nge.”—Johannes 14:28.

2.   Osho twa itavela: Kaku na omundilo woheli hamu hepekwa ovanhu. Oshifo shoZion’s Watch Tower shaJuni 1882, osha li sha tofa mOvaroma 6:23 mOmbibeli yo-King James Version, oyo ya ti: “Ondjabi youlunde oyo efyo,” nosha popya yo sha ti: “Etumbulo olo inali yela tuu noli li paunafangwa! Ashike otashi kumwifa eshi ovanhu vahapu ovo va tala ko Ombibeli i li Eendjovo daKalunga eshi tava twikile okukala va itavela osho tashi kondjifafana nomushangwa oo mokukoleka kutya Ombibeli otai hongo kutya, ondjabi youlunde oyo okuhepekwa fiyo alushe.”

     Osho Ombibeli tai hongo: “Omwenyo tau nyono u nokufya.” (Hesekiel 18:4, 20) Ovatondi vaKalunga itava ka hepekwa fiyo alushe, ndele otava ka “hanaunwa po fiyo alushe.”—2 Ovatessaloniki 1:9, King James Version.

3.   Osho twa itavela: Ouhamba waKalunga epangelo lolela, ndele kau fi onghalo yomomutima. Oshifo shoZion’s Watch Tower shaDesemba 1881, osha popya shi na sha nOuhamba waKalunga sha ti: “Nopehe na omalimbililo, okudikwa po kwouhamba oo, okwa kwatela mo okufinda omauhamba aeshe okombada yedu.”

     Osho Ombibeli tai hongo: “Pomafiku eehamba dinya Kalunga ou komeulu ota ka dika ouhamba itau ka teka po fiyo alushe, nepangelo lawo itali ka yandjwa koshiwana shimwe. Ndele owo otau ka nyanyaula notau ka teyaula omauhamba aeshe noku a xulifa po, ndelenee owo vene tau ka kala fiyo alushe.”—Daniel 2:44.

 Hasho, molwaashi onghee ngoo hatu twikile okulongifa omatoloko e lili noku lili eembibeli moilonga yetu yokuyandja oundombwedi. Ashike nonande ohatu longifa o-New WorldTranslation mokukonakona Ombibeli navamwe nohatu i yandje oshali, ohatu hafele yo okukonakona naavo va hala okulongifa omatoloko eembibeli oo ve na.