Adam naEva ovo ovanhu votete va nyona. Ova li va nyona eshi inava dulika kuKalunga mokulya ‘komuti wokushiiva ouwa nowii,’ osho ovanhu vahapu hava ti kutya enyono lotete. a (Genesis 2:16, 17; 3:6; Ovaroma 5:19) Adam naEva kava li va pitikwa va lye komuti oo molwaashi owa li u lile po eenghonopangelo daKalunga, okutokola kutya shilipi sha yuka naasho sha puka kovanhu. Eshi va lya komuti oo, ova li tava ulike kutya ova tokola okulipangela vo vene, mokuhoolola kuvo vene osho shi li mondjila naasho sha puka. Eshi va ninga ngaho, ova ekelashi omifikamhango daKalunga dopaenghedi.

•  “Enyono lotete” ola li la kuma ngahelipi Adam naEva?

•  “Enyono lotete” ole tu kuma ngahelipi?

•  Ohatu dulu ngoo okumanguluka ko koilanduliko ‘yenyono lotete’?

•  Omitotolombo di na sha ‘nenyono lotete’

 Molwaashi Adam naEva ova li va nyona, ova ka enda tava kulupa, nohauxuuninwa ova ka fya. Ova li va nyona po ekwatafano lavo naKalunga nokukanifa oufembanghenda wokukala nomwenyo fiyo alushe nomalutu e na oukolele we lixwa po. — Genesis 3:19.

 Adam naEva ova tambekida oulunde koludalo lavo alishe. Osho osha faafana nanghee ovadali hava tambekida omaufyuululwakwatya avo kounona. (Ovaroma 5:12) Onghee ovanhu aveshe ova dalwa ‘moulunde,’ b sha hala okutya inatu wanenena notu na eamo lokulonga owii. — Epsalme 51:5; Ovaefeso 2:3.

  Oshitya shopaMbiibeli ‘oulunde’ itashi ulike ashike koilonga ii, ndele osha yukifwa yo kokuhawanenena oko twa fyuulula.

Molwaashi otwa fyuulula oulunde ile okuhawanenena, ohatu vele, hatu kulupa nokufya. (Ovaroma 6:23) Ohatu mono yo oilanduliko yomapuko etu vene nosho yo avakwetu. — Omuudifi 8:9; Jakob 3:2.

 Heeno. Ombiibeli oya popya kutya Jesus okwa fya e li “eyambo lekwatakanifo omolwomatimba etu.” (1 Johannes 4:10) Eyambo laJesus ole tu mangulula ko koulunde notu na oufembanghenda woku ka kala nomwenyo fiyo alushe nomalutu e na oukolele we lixwa po, oo wa kanifwa kuAdam naEva. — Johannes 3:16. c

 Omutotolombo: Itatu dulu vali okukala tu na ekwatafano naKalunga omolwenyono lotete.

 Oshili: Kalunga ihe tu pe oushima omolwenyono laAdam naEva. Oku shii kutya inatu wanenena, noiha kala a teelela tu ninge shihapu shi dulife pwaasho hatu dulu. (Epsalme 103:14) Nonande ohatu mono oixuna omolwoulunde oo twa fyuulula, otu na omhito nosho yo oufembanghenda wokupanga oukaume wopofingo naKalunga. — Omayeletumbulo 3:32.

 Omutotolombo: Eninginifo ohali mangulula ovanhu koulunde wenyono lotete, onghee nouhanana ova pumbwa okuninginifwa.

 Oshili: Oshoshili kutya otwa pumbwa okuninginifwa opo tu ka xupifwe, ndele eitavelo mekuliloyambo laJesus olo ashike hali kosho ovanhu koulunde. (1 Petrus 3:21; 1 Johannes 1:7) Molwaashi eitavelo lashili ola kanghamena keshiivo lOmbiibeli, itashi shiiva okahanana ka kale ke na eitavelo. Onghee Ombiibeli itai popile eninginifo louhanana. Noumbangi oo owa li wa yela kOvakriste vomefelemudo lotete. “Ovalumenhu novakainhu” ovo va li va itavela Eendjovo daKalunga, ova li va ninginifwa, ndele hauhanana. — Oilonga 2:41; 8:12.

 Omutotolombo: Kalunga okwa li a finga ovakainhu molwaashi Eva oye omukainhu wotete oo a lya komuti oo wa kelelwa.

 Oshili: Ponhele Kalunga a finge ovakainhu, okwa finga “eyoka likulu olo hali ifanwa Ondiaboli nosho yo Satana,” olo la ningifa Eva a nyone. (Ehololo 12:9; Genesis 3:14) Naashi shi didilikwedi oshosho kutya Kalunga okwa li ta vele ombedi Adam, ndele hamukulukadi waye. — Ovaroma 5:12.

 Omolwashike Kalunga a popya kutya Adam ota ka pangela omukulukadi waye? (Genesis 3:16) Eshi Kalunga a popya eendjovo odo, ka li ta ulike kutya okwa tambula ko oshinima osho. Ndele okwa li ta popi kutya oulunde owa li tau ka kuma ekwatafano lovalumenhu novakainhu. Kalunga okwa teelela ovalumenhu va kale ve hole nokukala va fimaneka ovakulukadi vavo, nokufimaneka neenghono omukainhu keshe. — Ovaefeso 5:25; 1 Petrus 3:7.

 Omutotolombo: Enyono lotete ola li omilele.

 Oshili: Enyono lotete kala li omilele omolwomatomheno taa shikula:

•   Kalunga okwa li a lombwela Adam aha lye komuti wokushiiva ouwa nouwii ofimbo a li natango oye aeke, ehe na omukulukadi. — Genesis 2:17, 18.

•   Kalunga okwa li a lombwela Adam naEva va ‘dalafane nokuhapupala,’ sha hala kutya va mone ounona. (Genesis 1:28) Osha li tashi ka kala shii neenghono ngeno Kalunga okwa li a handukila ovalihomboli votete eshi va ninga oshinima osho e va lombwela va ninge.

•   Adam naEva kava li va nyonena oshita, tete oEva, nolwanima oAdam. — Genesis 3:6.

•   Kalunga okwa pitika omilele pokati komushamane nomukulukadi. — Omayeletumbulo 5:18, 19; 1 Ovakorinto 7:3.