Heeno. Kalunga oku na ko nasha novapiya vaye ovo tava ehama. Ombiibeli oya popya shi na sha novapiya vaye ovadiinini ya ti: “Ngeenge ta nangala ta vele, Omwene ote mu pendula po.” (Epsalme 41:3) Ngeenge ou na ouyehame tau pula komesho, apa otapa landula eenghedi nhatu odo tadi dulu oku ku kwafela u lididimike:

1.   Ilikana kuKalunga e ku pe eenghono u lididimike. Ombiibeli oya ti kutya ote ku pe ‘ombili yaye oyo i dule eendunge adishe,’ oyo tai dulu okuloteka omadiladilo oye, opo u pule komesho. — Ovafilippi 4:6, 7.

2.   Kala u na omukumo. Ombiibeli oya ti: “Omutima u nehafo tau kwafa mokuveluka, ndelenee omhepo yoluhodi tai kukutike omakipa.” (Omayeletumbulo 17:22) Oshiwa okukala ho menye mo nokushendjula, molwaashi otashi ku kwafele uha kale unene wa wililwa po komalipulo nohashi ndjangeke omunhu.

3.   Dilonga keteelelo li na sha nonakwiiwa. Okukala u na eteelelo li na sha nonakwiiwa otaku ku kwafele u kale wa hafa, nonande oto ehama sha kwata moiti. (Ovaroma 12:12) Ombiibeli oya xunganeka shi na sha nefimbo olo, eshi itapa ka kala ‘nande oumwe ta ti: “Aame oshingone.”’ (Jesaja 33:24) Kalunga ota ka velula omikifi da kwata moiti, odo ovanongononi kunena va nyengwa okumonena epango. Pashihopaenenwa, Ombiibeli oya popya kutya ovanhu otava ka shuna kounyasha, ya ti: “Opo nee olutu laye tali ka fuluka vali eenghono dounyasha, ye ota shuna vali momafiku ounyasha waye.” — Job 33:25.

 Didilika: Nonande, tu li Eendombwedi daJehova, otwa dimina kutya Kalunga ohe tu kwafele, ohatu ka konga yo ekwafo lopaunamiti, ngeenge tu na omauyahame a kwata moiti. (Markus 2:17) Ndele ihatu fininikile omunhu ouhaku wonhumba kondadalunde. Keshe umwe okwa manguluka okuninga omatokolo kuye mwene, ngeenge tashi uya pokuhoolola ouhaku.