Ombiibeli inai tumbula okushila omakaya a ile oku a longifa meenghedi dimwe di lili. Ashike nande ongaho, oi na omafinamhango oo taa ulike kutya Kalunga ina hokwa oinima oyo hai nyono po oukolele ile eenghedi inadi koshoka, naasho otashi ulike kutya okushila omakaya okwa puka.

•   Okufimaneka omwenyo. ‘Kalunga okwa yandjela ovanhu aveshe omwenyo.’ (Oilonga 17:24, 25) Molwaashi omwenyo ou li oshali ya dja kuKalunga, otwa pumbwa okuhenuka keshe osho tashi dulu oku u nyona po, ngaashi okushila omakaya. Efyo lavahapu ovo va fya mounyuni aushe omolwokushila omakaya ola li tali dulu okukelelwa.

•   Ohole yokuhola mukweni. “Hola mukweni ngaashi ove u lihole mwene.” (Mateus 22:39) Okushila omakaya mokati kovanhu itashi ulike ohole. Ovo hava fudile mo omwifi womakaya ohava kwatwa noupu komikifi odo luhapu hadi kwata ovanhu ovo hava shili omakaya.

•   Okukala omuyapuki. “Yandjeni omalutu eni eyambo liyapuki li nomwenyo, la wapalela Kalunga.” (Ovaroma 12:1) “Tu likosheni kedilo keshe naali lombelela naali lomhepo, fye tu wanifeni eyapulo mokutila Kalunga.” (2 Ovakorinto 7:1) Okushila omakaya kaku li paushitwe, nohaku ningifa omunhu aha kale omuyapuki ile a koshoka, molwaashi ovo hava shili omakaya ohava fudile mo oudiyo oo hau nyonauna olutu.

 Ombiibeli inai tumbula epangwe ile oingangamwifi imwe ya yukila oko. Ashike oi na omafinamhango oo a tokola elongifo loinima ya tya ngaho. Kakele komafinamhango oo a tumbulwa metetekelo, oitwa tai landula nayo oya fimana:

•   Okupangela omadiladilo. “Hola Omwene Kalunga koye . . . neendunge doye adishe,” ile tu tye nomadiladilo oye aeshe. (Mateus 22:37, 38) ‘Lidilika.’ (1 Petrus 1:13) Omunhu ita dulu okupangela omadiladilo aye ngeenge oha longifa oingangamwifi, nokuli novanhu vahapu ova pikwa kuyo. Omadiladilo avo ohaa yandje elitulemo kokukonga nokulongifa oingangamwifi ponhele yokuyandja elitulemo koinima ei i na oshilonga. — Ovafilippi 4:8.

•   Okudulika keemhango. ‘Dulikeni kovapangeli nokovakulunhu voshilongo.’ (Titus 3:1) Eemhango domoilongo ihapu odi li omhinge nelongifo loingangamwifi. Ngeenge otwa hala okuwapalela Kalunga, otu na okukala hatu dulika kovapangeli vomoilongo yetu. — Ovaroma 13:1.