•  Oho litale ko ngahelipi?

•  Omolwashike sha pumbiwa?

•  Osho wa pumbwa okuninga

•  Lesha ouyelele muhapu

•  Osho oomakula voye tava ti

• Etaleko liwa

  Valerie okwa ti: “Onda li handi kendabala okukala nda hafa nokuhenuka okuhanduka. Ndele mbela omolwashike ihandi kala nda hafa efimbo alishe?”

• Etaleko lii

  Rebecca okwa ti: “Luhapu ngeenge pa ningwa sha oshinima shonhumba shiwa, ohandi hovela ashike okudiladila koinima ii.”

• Kala omunashili

  Anna okwa ti: “Ngeenge onda kala netaleko liwa ohashi ka udifa nge nai ngeenge oshinima osha kala inashi wanifwa, ofimbo etaleko lii hali nyemateke nge. Okukala omunashili osha kwafela nge ndi tale ko oinima i li ngaashi i li.”

Ombiibeli oya ti kutya “omutima tau hafe, otau dana oshivilo alushe.” (Omayeletumbulo 15:15) Osho osha yela kutya ovanhu ovo hava henuka okudiladila oinima ii nokudiladila oinima oyo iwa ohava kala va hafa. Ohava kala yo ve na ookaume vahapu. Mbela ope na ngoo oo a hala okukala nomunhu oo a kala a handuka noku na etaleko lii mukeshe shimwe?

Oushili oyoo kutya nonande oho kala u na etaleko liwa, ou na yo okukala ho shakeneke omaudjuu amwe. Pashihopaenenwa:

• Eenghundana otashi dulika di popya kombinga yoita, yominyonena ile oukolokoshi.

• Ile otashi dulika to ungaunga noupyakadi moukwaneumbo weni.

• Ile tashi dulika to kondjo nomaliudo ile nounghundi wonhumba.

• Ile tashi dulika wa udifwa nai kukaume koye.

Ponhele yokulipwililikila omaupyakadi ile okukala uhe na ko nasha nao, kendabala okukala u na ondjele. Okutambula ko onghalo i li ngaashi i li ohashi ku kwafele uha kale wa wililwa po komadiladilo a puka nouha kale wa teka omukumo.

• Kala u na etaleko la yuka li na sha nokuhawanenena kwoye.

  Ombiibeli oya ti: “Kombada yedu kape na nande omunhu omuyuki, ou ha ningi ngeno ouwa auke, ndele ita nyono.” (Omuudifi 7:20) Okuninga omapuko otashi ulike kutya ou li omunhu ina wanenena, ndele inashi hala okutya ove oshikwafangudu.

  Kala omunashili: Lihonga komapuko oye, ndele ino teelela u kale wa wanenena. Omulumenhu omunyasha wedina Caleb okwa ti: “Ohandi henuka okuyandja elitulemo komapuko ange, opo ndiha teke omukumo. Ponhele yaasho, ohandi lihongele ko, opo ndi xwepopale.”

• Henuka okuliyelekanifa navamwe.

  Ombiibeli oya ti: “Inatu kaleni tu na ounhwa molwaashi oo hau eta omhepo yefiyafanepo nokutwilafana ondubo.” (Ovagalati 5:26) Oto ka kala wa nyemata nowa teka omukumo ngeenge owa kala ho tale omafano oiningwanima oko ino shivwa, oo a tulwa komakwatafano opaintaneta. Osho otashi dulika shi ku ningife u diladile kutya ookaume koye ove ku li koshi.

  Kala omunashili: Dimina kutya ito ka shivwa koshiningwanima keshe. Shikwao vali, omafano oo haa tulwa komakwatafano okointaneta ihaa ulike oinima aishe. Omunyasha wedina Alexis okwa ti: “Luhapu ovanhu ohava tula ko omafano oinima oyo va hafela unene. Ohava henuka okutula ko omafano oo taa ulike onghalamwenyo yavo yakeshe fiku.”

• Kala ho pange ombili, unene tuu moukwaneumbo weni.

  Ombiibeli oya ti: “Ningeni ngaashi tamu dulu opo mu kale nombili novanhu aveshe.” (Ovaroma 12:18) Ito dulu naanaa okupangela eenghatu davakweni, ashike oto dulu okupangela eenghatu doye. Oto dulu okuhoolola okukala omunambili.

  Kala omunashili: Ponhele yokunaipika onghalo moukwaneumbo, kendabala okukala nombili noukwaneumbo weni ngaashi ho kala nookaume koye. Omunyasha wedina Melinda okwa ti: “Kape na oo a wanenena, nomafimbo amwe ohatu shindafafana. Ofye vene ashike hatu ka tokola ngeenge ohatu kala ovanambili ile otwa handuka.”

• Kulika olupandu.

  Ombiibeli oya ti: “Kaleni yo mu na olupandu.” (Ovakolossi 3:15) Ngeenge otu na olupandu otashi ke tu kwafela tu kale hatu yandje elitulemo koinima oyo iwa, ponhele yokuyandja elitulemo koinima oyo ii.

  Kala omunashili: Didilika osho hashi etifa oupyakadi woye, ndele ino shi lipwililikila. Omukainhu omunyasha wedina Rebecca okwa ti: “Efiku keshe ohandi shange oshinima shonhumba osho nda hafela. Osho ohashi ningifa nge ndi mone kutya ope na oinima ihapu iwa oyo handi dulu okudiladila kombinga yayo.”

• Konakona oukaume weni.

  Ombiibeli oya ti: “Ookaume vai ohava nyono po eenghedi diwa.” (1 Ovakorinto 15:33) Ngeenge ovanhu ovo ho kala navo ove hole okukembaula, ve na oshimbweenga nohava handuka diva, naave oto ka kala u na oikala ya fa yavo.

  Kala omunashili: Ngeenge ookaume koye tava piti meenghalo didjuu, omafimbo amwe otashi dulika va kale va nyemata ile va polimana. Va yambidida, ashike ino efa eenghalo davo di ku wilile po. Omukainhu omunyasha wedina Michelle okwa ti: “Inatu kala ashike hatu endafana novanhu ovo ve na alushe etaleko lii. Ponhele yaasho, natu kale yo hatu endafana naavo ve na omataleko mawa.”

Ombiibeli oya popya kutya otu li ‘momafimbo madjuu okukaliwa muo.’ (2 Timoteus 3:1) Mbela ohashi kala shidjuu kwoove okudiladila koinima iwa ngeenge wa taalela omaupyakadi mahapu? Lesha oshitukulwa “Omolwashike pe na okumona oixuna kuhapu?”