Briana, womido 15, okwa ti: “Ohandi kendabala okulesha Ombiibeli, ashike ohandi mono shi li omutengi, molwaashi oya kula unene.”

Mbela naave osho ho kala u udite ngaho? Oshitukulwa eshi otashi ke ku kwafela!

•  Omolwashike nda pumbwa okulesha Ombiibeli?

•  Ondi na okulesha ngahelipi Ombiibeli?

•  Osho oomakula voye tava ti

Mbela ediladilo lokulesha Ombiibeli otali monika la fa li fifa ounye? Ngeenge osho, oshi shii okuudiwa ko. Otashi dulika u diladile kutya Ombiibeli embo lomapandja e dulife peyovi, li yadi eendada nokali na omafano ngeenge to li yelekanifa no-TV, ile nouvidio.

Ashike diladila kwaashi: Ngeenge owe uya pelimba linene li na oinima yondilo yonale, mbela oto ka kala wa limbililwa osho shi li meni?

Ombiibeli oya fa elimba li na oinima yondilo. Omu na omamona mahapu ounongo oo taa dulu oku ku kwafela

• u ninge omatokolo e li pandunge

• u kale ho longele kumwe novadali voye

• u mone ookaume va denga mbada

• u ungaunge nomaupyakadi

Ongahelipi embo olo la dja nale li na omayele taa dulu oku tu kwafela kunena? Omolwaashi “Omishangwa adishe oda nwefwa mo kuKalunga.” (2 Timoteus 3:16) Osho osha hala kutya omayele Ombiibeli okwa dja kOdjo ya denga mbada kuhe na vali.

Onghedi imwe okulesha Ombiibeli okudja kehovelo fiyo okexulilo. Osho otashi ke ku kwafela u kale u udite ko etumwalaka lOmbiibeli. Ope na eenghedi dihapu omo to dulu okulesha Ombiibeli. Natu ka taleni koihopaenenwa ivali:

•  Oto dulu okulesha omambo Ombiibeli 66 palandulafano okudja kuGenesis fiyo okEhololo.

•  Oto dulu okulesha Ombiibeli palandulafano, she likolelela kelandulafano loiningwanima nghee ya ningwa.

Kendabala okuninga ngaha: Oshitukulwa 4 shokambo Okalongifwambo kokukonakona Eendjovo daKalunga, osha popya palandulafano oiningwanima ya tongomana yomokukalamwenyo kwaJesus kwokombada yedu.

Onghedi onhivali omo to dulu okulesha Ombiibeli omokuhoolola ehokololo olo la fela konghalo oyo wa taalela. Pashihopaenenwa:

• Mbela oto kongo ookaume ovalineekelwa? Lesha ehokololo laJonatan naDavid. (1 Samuel, etukulwa 18-20) Tala kutya omaukwatya elipi David a li a kulika, oo tashi dulika a nanena Jonatan kuye.

• Mbela owa pumbwa eenghono opo u dule okukondjifa eyeleko lonhumba? Lesha ehokololo laJosef li na sha nanghee a li a henuka eyeleko. (Genesis, etukulwa 39) Tala kutya Josef okwa li a hanga eenghono dokuya onhapo kodjo ilipi.

• Mbela owa hala okumona nghee eilikano tali dulu oku ku kwafela? Lesha oshimoniwa shaNehemia. (Nehemia, etukulwa 1, 2) Tala oidjemo iwa oyo ya etifwa keilikano laye.

Kendabala okuninga ngaha: Ngeenge to lesha Ombiibeli, shilipaleka kutya ponhele apa u li ope limwenenena opo u dule okuyandja elitulemo.

Onghedi onhinhatu yokulesha Ombiibeli, omokuhoolola ehokololo lonhumba ile epsalme, noku li lesha, opo nee to tale nghee to dulu okutula moilonga ouyelele oo. Konima eshi wa mana okulesha, lipula omapulo aa:

•  Omolwashike Jehova a shangifa ouyelele ou mOmbiibeli?

•  Osho otashi holola oukwatya ulipi waJehova, ile onghedi omo ha ningi oinima?

•  Ongahelipi handi dulu okutula moilonga ouyelele ou monghalamwenyo yange?

Kendabala okuninga ngaha: Litulila po elalakano. Shanga kutya onaini wa hala okuhovela okulesha Ombiibeli to longifa Elandulafano lokulesha Ombiibeli olo li li ko-website yetu.