Samuel omutivali 6:1-23
6 David okwa ongela natango omatangakwaita aeshe omuIsrael, oo a li e na owino, ovalumenhu 30 000.
2 Opo nee David okwa ya pamwe novalumenhu aveshe ovo kuBaal-juda va ka tale ko Oshikefa shaKalunga kashili, oko ovanhu hava ifanene edina laJehova womatangakwaita, oo e li omutumba kolukalwapangelo pombada* yovakerubi.
3 Onghee ova londeka Oshikefa shaKalunga kashili metemba lipe, ve shi kufa keumbo laAbinadab, olo la li koshikulundudu. Ussa naAhio, ovanamati vaAbinadab, ovo va li tava shingi eengobe odo tadi nane etemba.
4 Ova kufa ko Oshikefa shaKalunga kashili keumbo laAbinadab, olo la li koshikulundudu, na Ahio okwa li e li komesho yOshikefa osho.
5 David neumbo alishe laIsrael ova li va hafa, tava shiki oishikomwa ya longwa moiti yomaludi e lili noku lili, ouxumbafeta, oishikomwa yeengodi, oungoma, oishikomwa youngedjo nosho yo omayaxa koshipala shaJehova.
6 Ndele eshi ve uya poshipale shaNakon, Ussa okwa yelula eke laye nokwa kwata Oshikefa shaKalunga kashili, molwaashi eengobe odo da li tadi nane etemba hanga de shi ufa ko.
7 Onghee Jehova okwa li a handukila unene Ussa, na Kalunga kashili okwe mu denga, ndele ta file pOshikefa shaKalunga kashili, molwaashi ka li e mu fimaneka.
8 Ndele David okwa li a handuka omolwehandu laJehova olo la li la hanga Ussa, nonhele oyo oya kala hai ifanwa Peres-ussa* fiyo okunena.
9 Mefiku olo, David okwa li a tila Jehova, ndele ta ti: “Oshikefa shaJehova otashi dulu ngahelipi okuuya kwaame?”
10 David ka li a hala okutwala Oshikefa shaJehova opo a li ha di mOshilando shaDavid. Ndele ponhele yaasho, okwa ti nashi twalwe keumbo laObed-edom, Omugat.
11 Oshikefa shaJehova osha kala keumbo laObed-edom, Omugat, oule weemwedi nhatu, na Jehova okwa kala ta nangeke noupuna Obed-edom noukwaneumbo waye aushe.
12 Ohamba David oya lombwelwa taku ti: “Jehova okwa nangeka noupuna eumbo laObed-edom noinima yaye aishe omolwOshikefa shaKalunga kashili.” Opo nee David okwa ka tala ko Oshikefa shaKalunga kashili keumbo laObed-edom, ndele te shi twala nehafo kOshilando shaDavid.
13 Eshi ovahumbati vOshikefa shaJehova va katuka ko omanha ahamano, David okwa yamba po ongobe yomhedi noshimuna shimwe vali sha ondoka.
14 David okwa li ta dana nehafo te litanauka koshipala shaJehova; efimbo alishe olo David okwa kala a djala okatetahema koliina.
15 Eshi David neumbo alishe laIsrael va li tava twala Oshikefa shaJehova, ova li tava imbi nehafo notava shiki omanghuma mombada.
16 Ndele eshi Oshikefa shaJehova she uya mOshilando shaDavid, Mikal, omonakadona waSaul, okwa talela mekende nokwa mona ohamba David tai nhuka notai dana moipafi yaJehova, nokwa hovela oku i dina momutima waye.
17 Opo nee ova eta mo Oshikefa shaJehova, ndele tave shi tula metwali olo David e shi ningila. Konima yaasho, David okwa yamba omaxwikiloyambo nomayambo oukumwe koshipala shaJehova.
18 Eshi David a mana okuyamba omaxwikiloyambo nomayambo oukumwe, okwa nangeka noupuna ovanhu medina laJehova womatangakwaita.
19 Natango, okwa tukulila ovanhu aveshe, eengudu adishe dOvaisrael, omulumenhu nomukainhu keshe, omungome u li ongonga u na ombululu pokati, oshikuki shomadaakala* noshikuki shomandjebele a kukutikwa, opo nee ovanhu aveshe ova ya, keshe umwe keumbo lavo.
20 Eshi David a aluka e uye a nangeke noupuna oukwaneumbo waye, Mikal, omonakadona waSaul, okwa li e uya e mu shakeneke. Mikal okwa ti: “Ohamba yaIsrael inai lififa tuu ohoni, eshi ye lidula nena moipafi yovapika oukadona vovapiya vayo, ngaashi ashike omulumenhu ehe na eendunge te lidula moipafi yovanhu!”
21 Opo nee David okwa tya kuMikal: “Ohandi dana nehafo koshipala shaJehova, oo a hoolola nge ponhele yaxo neumbo laye alishe. Jehova okwa hoolola nge yo ndi ninge omuwiliki woshiwana shaye, Israel. Onghee ohandi dana nehafo koshipala shaJehova,
22 handi lininipike shi dulife opo, nonde litala ko ame mwene inandi tumbala. Ashike oukadona ovapika ovo to popi, otava tumbaleke nge.”
23 Mikal, omonakadona waSaul, ka li a mona ounona fiyo a fya.
