Esra 4:1-24
4 Eshi ovatondi vaJuda naBenjamin va uda kutya eenghwate, odo da aluka, otadi tungile Jehova, Kalunga kaIsrael, otembeli,
2 ova ya diva kuSerubbabel nokomitwe domaukwaneumbo omapata, ndele tava ti kuvo: “Natu tungeni pamwe nanye, molwaashi ngaashi nye, nafye ohatu longele* Kalunga keni, notwa kala hatu mu yambele okudja pefimbo lohamba Esar-haddon yaAsiria, oyo ye tu eta oku.”
3 Ashike Serubbabel, Jesua nomitwe adishe domaukwaneumbo omapata Ovaisrael, ova ti kuvo: “Nye kamu na okukufa ombinga pamwe nafye mokutungila Kalunga ketu otembeli, molwaashi ofye atuke hatu ka tungila Jehova, Kalunga kaIsrael, ngaashi ashike ohamba Kores yaPersia ye tu lombwela.”
4 Opo nee ovanhu vomoshilongo ova twikila okuteya omukumo* Ovajuda noku va shololifa vaha tunge.
5 Ova li va kuta ovayandjimayele ve va pataneke nokuya moshipala eemhangela davo pomafiku aeshe okupangela kwohamba Kores yaPersia, fiyo okepangelo lohamba Darius yaPersia.
6 Pehovelo lepangelo laAhasveros, ova shanga onhumwafo, omo va li va lundila ovakalimo vomuJuda novomuJerusalem.
7 Pefimbo lohamba Artasasta yaPersia, Bislam, Mitridat, Tabeel navakwao aveshe, ova li va shangela ohamba Artasasta; ova li va toloka onhumwafo oyo melaka lOshiaramea, ya shangwa meendada dOshiaramea.*
8 * Omukwanepangelo omukulunhu, Rehum, nomushangi, Simsai, ova shangela ohamba Artasasta onhumwafo i li omhinge novanhu vomuJerusalem, ngaashi tashi shikula:
9 (Oya dja komukwanepangelo omukulunhu Rehum, omushangi Simsai navakwao aveshe, ovatokoli, oongoloneya ovo ve na eendodo dopedu, oohamushanga, ovanhu vomuErek, Ovababilon, ovakalimo vomuSusa, sha hala okutya Ovaelami,
10 noiwana ikwao, oyo Asnappar munene nomufimanekwa a twala moukwatwa, ndele tai tula moilando yaSamaria, naikwao okoshitukulwa shoKombada yOmulonga.*
11 Ei okopi yonhumwafo, oyo ve mu tumina.)
“Onhumwafo ya yuka kohamba Artasasta, ya dja kovapiya voye, ovanhu ovo ve li koshitukulwa shoKombada yOmulonga:
12 ohamba nai shiive kutya Ovajuda, ovo ve uya kufye oku va dja kwoove, ova fika muJerusalem. Otava tungulula oshilando shovanhu ovanashibofa novakolokoshi, otava manifa omakuma nokuwapekulula ekanghameno.
13 Ohamba nai shiive kutya, ngeenge oshilando osho osha tungululwa nomakuma asho okwa pu, itava ka yandja vali oifendela, ile eemhale,* noitava ka kungudwa, nokungaho, eehamba otadi ka kanifa oyuuyemo yomeemhungulilo dayo.
14 Molwaashi ohatu li omongwa womombala,* inashi yuka okumona oshinima shii sha tya ngaho tashi ningilwa ohamba, onghee otwa tuma onhumwafo tu shiivifile ohamba oshinima osho,
15 opo ku dule okuningwa omakonakono membo londjokonona yooxokulululwa. Oto ka mona membo londjokonona nokushiiva kutya, moshilando eshi omu na ovanhu ovanashibofa, va nyika oshiponga keehamba nokoitukulwalongo, nomusho omwa kala ovo hava xwaxwameke ovanhu va twe ondubo nepangelo okudja pefimbo lonale. Nomolwaasho oshilando eshi sha li sha hanaunwa po.
16 Ohatu shiivifile ohamba kutya, ngeenge oshilando eshi osha tungululwa, nomakuma asho okwa pu, ito ka pangela* oshitukulwa shoKombada yOmulonga.”
17 Ohamba oya tuma ondjovo komukwanepangelo omukulunhu Rehum, komushangi Simsai nosho yo kuvakwao aveshe, ovo va li hava di muSamaria nokoshitukulwa shoKombada yOmulonga, ya ti:
“Kundweni!
18 Onhumwafo oyo mwa tumina nge oya leshwa* moipafi yange.
19 Palombwelo lange, opa li pa ningwa omakonakono, nokwa li kwa monika kutya okudja nale, ovanhu vomoshilando osho ova kala hava kondjifa eehamba, hava tukula ounashibofa nokukala omhinge nado.
20 MuJerusalem omwa li eehamba dinaenghono, odo da pangela oshitukulwa ashishe shoKombada yOmulonga, noda li hadi pewa oifendela neemhale, noda li hadi kunguda.
21 Paife yandjeni elombwelo kovalumenhu ovo va efe po oilonga, opo oshilando osho shiha tungululwe fiyo osheshi nda yandja elombwelo.
22 Lungameni muha ongaonge moshinima eshi, opo ohamba iha lumbulwe nande okaniingholi oyuuyemo yayo.”
23 Konima eshi onhumwafo yohamba Artasasta ya leshwa moipafi yaRehum naSimsai omushangi nosho yo vakwao, ova ya diva kuJerusalem kOvajuda nove va fininika va efe po oilonga.
24 Opo nee oilonga yotembeli yaKalunga, oyo ya li muJerusalem, oya kanghekwa, noya kala ya kanghekwa, fiyo omomudo omutivali wepangelo lohamba Darius yaPersia.
Eshangelo lopedu
^ Eln., “kongo.”
^ Eln., “okutyololifa omake.”
^ Ile tashi dulika, “ya li ya shangwa mOshiaramea, ndele tai tolokwa.”
^ Esra 4:8 fiyo 6:18 pehovelo okwa li a shangwa mOshiaramea.
^ Ile “shaEufrat.”
^ Ile “eefuto odo da li hadi pewa eehamba.”
^ Ile “ohatu mono ondjabi yetu tai di mombala.”
^ Eln., “ito ka kala u na oshitukulwa.”
^ Ile tashi dulika, “oya tolokwa nokuleshwa nawa.”
