Exodus 12:1-51
12 Jehova okwa lombwela Moses naAron medu laEgipiti, a ti:
2 “Omwedi ou otau kala ehovelo leemwedi deni. Otau kala wotete womeemwedi dokomudo domokalindeli keni.
3 Popya nOvaisrael aveshe ovo va ongala, to ti, ‘Mefiku etimulongo lomwedi ou, keshe umwe ne likufile odi youkwaneumbo waxe, odi moukwaneumbo keshe.
4 Ashike ngeenge oukwaneumbo omunini unene kodi oyo, vo* nosho yo ovashiinda shavo vopopepi ove na oku i lya pamwe, she likolelela komuvalu wovanhu* ovo ve li momaukwaneumbo oo. Ngeenge tamu ningi omavalulo, tokoleni kutya keshe umwe ota li oshitukulwa shodi shi fike peni.
5 Odi yeni oi na okukala ihe na oshipo, ondume yomudo umwe. Otamu dulu okuhoolola moudjona voundume, ile moukombwena.
6 Omu na oku i fila oshisho, fiyo omefiku eti-14 lomwedi ou, neongalo alishe lOvaisrael olo la ongala oli na oku i dipaa eshi taku wiwile.*
7 Ove na okukufa ohonde, ndele tave i shamine koikulo ivali yomuvelo nosho yo pombada yomuvelo weumbo omo tave i lile.
8 “‘Ove na okulya ombelela oufiku oo, nove na oku i yofa pomundilo noku i lya pamwe nomingome inadi ya efulika nosho yo oimbodi ilula.
9 Inamu i lya yahawiishu, ya fulukifwa, ile ya telekwa momeva, ndele i yofeni pomundilo, omutwe u li kumwe noitukulwa aishe, mwa kwatelwa oyo yomedimo.
10 Inamu i tuvikila fiyo ongula, ngeenge oya xupu po fiyo ongula, omu na oku i xwika po momundilo.
11 Omu na oku i lya ngaha, omakwamo omoiya yeni a mangwa,* mwa djala eenghaku keemhadi deni nosho yo mu na eedibo momake eni; omu na oku i lya tamu endelele. Oyo Opaasa yaJehova.
12 Ohandi ka endaenda medu laEgipiti konguloshi nohandi ka dipaa oiveli aishe yomedu laEgipiti, okudja komunhu fiyo okoshinamwenyo. Ame ohandi ka katukila onghatu ookalunga aveshe vomuEgipiti. Aame Jehova.
13 Ohonde otai ka kala edidiliko leni momaumbo omo mu li, nohandi ka mona ohonde, ndele handi pitilile po, nehandukilo itali ke mu hanga, eshi handi ka handukila edu laEgipiti.
14 “‘Efiku eli otali ka kala edimbuluko kunye, nomu na oku li dana ngaashi oshivilo shaJehova fiyo okomapupi aeshe. Omu na oku li dana ngaashi onghedimhango yaalushe.
15 Omu na okulya omungome inau ya efulika oule womafiku aheyali. Mefiku lotete omu na okukufa mo olumbololo olo la ya efulika momaumbo eni, molwaashi keshe oo ta li osho sha ya efulika okudja mefiku lotete fiyo omefiku etiheyali, omunhu* oo oku na okudimwa* mo muIsrael.
16 Mefiku lotete nomefiku etiheyali, omu na okwoongala mu longele Kalunga. Kamu na okulonga sha momafiku aeshe oo. Oikulya oyo omunhu* keshe a pumbwa oyo ashike i na okulongekidwa.
17 “‘Omu na okukala hamu dana Oshivilo shOmingome inadi ya Efulika, osheshi mefiku olo tuu eli, ohandi ka pitifa mo eemhunga* dovanhu medu laEgipiti. Omu na okudiinina efiku eli, fiyo okomapupi aeshe, li li ngaashi onghedimhango yaalushe.
18 Konguloshi yefiku eti-14 lomwedi wotete, omu na okulya omungome inau ya efulika, fiyo okonguloshi yefiku eti-21 lomwedi oo.
19 Moule womafiku oo aheyali, momaumbo eni kamu na okukala olumbololo la ya efulika, molwaashi ngeenge umwe okwa li osho sha ya efulika, kutya nee omunailongo, ile odalele yomoshilongo omo, omunhu* oo oku na okudimwa* mo mongudu yOvaisrael.
20 Inamu lya nande osha sha ya efulika. Momaumbo eni aeshe omu na okuliwa omungome inau ya efulika.’”
21 Moses okwa ifana diva ovakulunhu vaIsrael, ndele ta ti kuvo: “Indeni, ndele tamu hoolola oshinamwenyo* shinini shoukwaneumbo keshe, noku shi dipaa shi li eyambo lOpaasa.
22 Omu na okuyava oupandi vouxwa vaisopi* mohonde oyo i li moshiyaxa, ndele tamu va vaekifa ohonde pombada yomuvelo nosho yo koikulo ivali yomuvelo. Kape na nande oumwe womunye e na okupita momuvelo weumbo lavo fiyo ongula.
23 Opo nee eshi Jehova ta ka endaenda moshilongo a handukile Ovaegipiti, ndele ta mono ohonde i li pombada yomivelo nosho yo koikulo ivali yomivelo, Jehova ota ka pitilila po filufilu pomivelo, noita ka pitika nande ehandukilo lefyo* li uye momaumbo eni.
24 “Omu na okudana oshivilo osho ngaashi onghedimhango yaalushe, nye novana veni.
25 Ngeenge omwa i medu olo Jehova te ke mu pa ngaashi a popya, omu na okukala tamu shi dimbuluka.
26 Ngeenge ovana veni ove mu pula kutya, ‘Edimbuluko olo otali ti shike kunye?’
27 omu na okunyamukula kutya, ‘Oli li eyambo lOpaasa kuJehova, oo a pitilila po omaumbo Ovaisrael muEgipiti, eshi a handukila Ovaegipiti, ndele ta xupifa omaumbo etu.’”
Opo nee ovanhu ova twa eengolo nokulinyongamena pedu.
28 Ovaisrael ova ya, ndele tava ningi osho Jehova a lombwela Moses naAron. Osho naanaa va ninga.
29 Opo nee mokati koufiku, Jehova okwa dipaa oiveli aishe yomedu laEgipiti, okudja koshiveli shaFarao, oo a li omutumba kolukalwapangelo laye, fiyo okoshiveli shonghwate oyo ya li modolongo,* noimuna aishe oyo ya dalwa tete.
30 Farao okwa fikama oufiku oo pamwe novapiya vaye nosho yo nOvaegipiti aveshe, nomwa li elilaano linene mokati kOvaegipiti, molwaashi meumbo keshe omwa li mwa fiwa.
31 Oufiku oo, okwa li a ifana Moses naAron, ndele ta ti: “Fikameni, djeni mo mokati kovanhu vange, nye nOvaisrael vakweni. Indeni mu ka longele Jehova, ngaashi ashike mwa popya.
32 Kufeni yo eedi deni neengobe deni, ndele tamu i, ngaashi ashike mwa popya. Ashike omu na yo okunangeka nge noupuna.”
33 Ovaegipiti ova hovela okulombwela ovanhu va dje mo diva moshilongo, nova li tava ti kuvo: “Ngeenge itamu i, atushe ohatu fi.”
34 Onghee ovanhu ova kufa olumbololo ofimbo inali pya, nomatemba* avo okulungila olumbololo a tonyenwa moikutu yavo, ve a humbata komapepe.
35 Ovaisrael ova ninga osho Moses e va lombwela, nova pula Ovaegipiti oshisilveri noshingoli nosho yo oikutu.
36 Jehova okwa ningifa Ovaegipiti va file oshiwana shaye onghenda, onghee ove va pa osho va pula, nOvaisrael ova kufa mo omaliko Ovaegipiti.
37 Opo nee Ovaisrael ova dja mo muRameses va finda kuSukkot, ovalumenhu 600 000 lwaapo tava ende kolupadi. Momuvalu oo inamu kwatelwa ounona.
38 Eemhunga* dovanhu va lumbakana nado oda li da ya pamwe navo nosho yo eedi neengobe, omuvalu munene woimuna.
39 Olumbololo olo va dja nalo muEgipiti ova hovela oku li ninga omingome di li ongonga inadi ya efulika. Kada li da ya efulika, molwaashi ova li va tewa mo muEgipiti ombadilila, onghee kava li ve lilongekidila sha shokulya.
40 Ovaisrael ova kala muEgipiti oule weedula 430.
41 Pexulilo lomido 430, mefiku olo tuu olo, eengudu* dovanhu aveshe vaJehova oda dja mo medu laEgipiti.
42 Ova li tava ka dana oshivilo oufiku oo, eshi Jehova e va pitifa mo medu laEgipiti. Oufiku oo ou na okudimbulukiwa kovanhu aveshe vomuIsrael, fiyo okomapupi aeshe omolwaJehova.
43 Opo nee Jehova okwa lombwela Moses naAron kutya, “Ei omhango yOpaasa: Opaasa kai na okuliwa komunailongo.
44 Ngeenge umwe oku na omupiya omulumenhu oo a landwa noimaliwa, oku na okukengha omupiya oo. Kungaho, opo ashike ta dulu oku i lya.
45 Omunailongo oo ha di momaumbo eni, ile oo ha longo mo ke na oku i lya.
46 Oi na okulilwa meumbo limwe. Kamu na okutwala ombelela oyo pondje yeumbo, nokamu na okuteya omakipa ayo.
47 Ongudu aishe yOvaisrael oi na oku i dana.
48 Ngeenge omunailongo oha di punye nokwa hala okudanena Jehova Opaasa, omulumenhu keshe ha di meumbo laye oku na okukenghwa. Opo nee ota dulu okuuya e i dane, nota kala ngaashi odalele yomoshilongo. Ashike kai na okuliwa komulumenhu ina kenghwa.
49 Omhango oyo otai longo kodalele nokomunailongo oo e li mokati keni.”
50 Ovaisrael aveshe ova ninga ngaashi Jehova a lombwela Moses naAron. Osho naanaa va ninga.
51 Mefiku tuu olo, Jehova okwa pitifa mo medu laEgipiti Ovaisrael pamwe neengudu* dovanhu.
Eshangelo lopedu
^ Eln., “ye.”
^ Ile “weemwenyo.”
^ Eln., “pokati komaufiku avali.”
^ Eln., “noshiya sheni sha mangwa.”
^ Ile “omwenyo.”
^ Ile “okudipawa.”
^ Ile “omwenyo.”
^ Eln., “omatangakwaita.”
^ Ile “omwenyo.”
^ Ile “okudipawa.”
^ Sha hala okutya, okadjona, ile okakombwena.
^ Oumeno va yukila kouxwa oko haku ima omahola ovafita.
^ Eln., “ehanauno.”
^ Eln., “eumbo londungu.”
^ Ile “noiyaxa.”
^ Sha hala okutya, ongudu ya lumbakana yaavo vehe fi Ovaisrael, mwa kwatelwa Ovaegipiti.
^ Eln., “omatangakwaita.”
^ Eln., “omatangakwaita.”
