Job 2:1-13
2 Lwanima, efiku limwe, ofimbo ovanamati vaKalunga kashili* ve uya okufikama koshipala shaJehova, Satana okwa holoka yo mokati kavo koshipala shaJehova.
2 Opo nee Jehova okwa pula Satana, a ti: “Oto di peni?” Satana okwa nyamukula Jehova, a ti: “Onda li nda ka elaela nokweendaenda kombada yedu.”
3 Jehova okwa tya kuSatana: “Owa didilika tuu* omupiya wange Job? Kombada yedu kaku na umwe e mu fa. Ye omulumenhu omuyuki nomudiinini,* ha tila Kalunga noku tonde osho shii. Natango okwa kanyatela oudiinini waye, nonande oto kendabala okwiitavelifa nge ndi mu hanaune* po nopehe na etomheno lasha.”
4 Ashike Satana okwa nyamukula Jehova, a ti: “Oshipa omoshipa. Omunhu ota yandje po ashishe osho e na omolwomwenyo waye.
5 Ashike nana eke loye, ndele to denge ekipa nosho yo ombelela yaye, note ke ku tuka shili moipafi yoye.”
6 Opo nee Jehova okwa tya kuSatana: “Tala, ye oku li meke loye!* Ashike ino mu kufa omwenyo waye!”
7 Onghee Satana okwa dja po moipafi* yaJehova, ndele ta denge Job noitumba iyehameka,* okudja koshi yomhadi yaye fiyo okombada yomutwe waye.
8 Job okwa kufa okakangwa e linyaye, nokwa li e li omutumba momute.
9 Xuuninwa, omukulukadi waye okwa tya kuye: “Natango owa kanyatela ashike oudiinini woye? Tuka Kalunga u fye!”
10 Ndele okwe mu nyamukula, a ti: “Oto popi ngaashi umwe womovakainhu ovo vehe na eendunge. Mbela otu na ashike okutambula osho shiwa kuKalunga kashili, ndele itatu tambula yo osho shii?” Moinima aishe oyo, Job ina nyona nomilungu daye.
11 Ookaume* vatatu vaJob ova uda kombinga yomaupyakadi aeshe, oo e mu hanga, nakeshe umwe okwa dja konhele yaye; Elifas, Omuteman, Bildad, Omusuhi, naSofar, Omunaamati. Onghee ova dimina va shakene, opo va ye va ka udile Job oukwao wananghali noku mu hekeleka.
12 Eshi ve mu monena kokule, kava li ve mu dimbuluka. Ova hovela okulila mokule, okupombaula oikutu yavo nokufundila edu momhepo nomomitwe davo.
13 Opo nee ova kala omutumba pamwe naye pedu oule womafiku aheyali, omutenya noufiku. Kape na umwe a popya naye nande ondjovo imwe, molwaashi ova mona kutya oku li mouyehame mudjuu.
Eshangelo lopedu
^ Omupopyofano wOshiheberi tau ulike kovaengeli, ovanamati vaKalunga.
^ Eln., “tula omutima woye.”
^ Ile “omulumenhu ehe na etimba nomuyuki.”
^ Eln., “pone.”
^ Ile “mepangelo loye.”
^ Eln., “koshipala.”
^ Ile “noidinda idjuu.”
^ Ile “Vakwao.”
