Omapsalme 118:1-29
118 Panduleni Jehova, osheshi ye omuwa;Ohole yaye i na oudiinini otai kala po fiyo alushe.
2 Israel na tye paife:
“Ohole yaye i na oudiinini otai kala po fiyo alushe.”
3 Ovo ve li meumbo laAron nava tye paife:
“Ohole yaye i na oudiinini otai kala po fiyo alushe.”
4 Ovo hava tila Jehova nava tye paife:
“Ohole yaye i na oudiinini otai kala po fiyo alushe.”
5 Onda ifana Jah* moudjuu wange;Jah okwa nyamukula nge, nokwa twala nge monhele ya amenwa.*
6 Jehova oku li pamwe naame; itandi tila sha.
Omunhu ota dulu okuninga nge shike?
7 Jehova oku li pamwe naame e li omukwafi wange;*Ohandi ka tala nehafo, eshi ovo ve tonde nge va findwa.
8 Oshixwepo okukonga eameno kuJehova,Ponhele yokulineekela movanhu.
9 Oshixwepo okukonga eameno kuJehova,Ponhele yokulineekela movapangeli.
10 Oiwana aishe oya dingilila nge,Ashike medina laJehova,Onde i taataelashi.
11 Oya li ya dingilila nge, heeno, onda li nda dingililwa filufilu,Ashike medina laJehova,Onde i taataelashi.
12 Oya li ya dingilila nge, ngaashi eenyiki,Ashike oya dimwa po diva, ngaashi omundilo tau xwike omakiya.
Medina laJehova,Onde i taataelashi.
13 Onda li nda undulwa neenghono,* opo ndi lidenge po,Ashike Jehova okwa kwafela nge.
14 Jah oye onhele yange yokuyaama neenghono dange,Nokwa ninga exupifo lange.
15 Ewi lehafo nolexupifo*Oli li momatwali ovayuki.
Eke laJehova lokolulyo otali ulike eenghono dalo.
16 Eke laJehova lokolulyo otali litumbalekifa;Eke laJehova lokolulyo otali ulike eenghono dalo.
17 Itandi fi, ahawe, ohandi kala nomwenyo,Opo ndi dule okuhepaulula oilonga yaJah.
18 Jah okwa pa nge outekuduliko wa kwata moiti,Ashike ina efa nge ndi fye.
19 Yeululile nge omivelo douyuki;Ohandi pitile mo mudo nokutanga Jah.
20 Eshi osho oshivelo shaJehova.
Omuyuki ota piti mo musho.
21 Ohandi ku tange, osheshi owa nyamukula nge,Nowa ninga exupifo lange.
22 Emanya olo ovatungi va ekelashiOla ninga emanya la fimanenena.*
23 Ola dja kuJehova;Olikumwifi momesho etu.
24 Efiku eli olo Jehova a tula po;Ohatu ka kala twa hafa nokunyakukwa mulo.
25 Jehova, tu xupifa, alikana, ohatu ku indile!
Alikana, Jehova, tu pa efindano!
26 Ou a nangekwa noupuna oye ou te uya medina laJehova;Ohatu ku nangeke noupuna okudja meumbo laJehova.
27 Jehova oKalunga;Ohe tu pe ouyelele.
Waimina osheendo shaavo tava i koshivilo ve na oitai momake,Fiyo okeembinga* doaltari.
28 Oove Kalunga kange, nohandi ku tange;Ohandi ku tumbalekifa, Kalunga kange.
29 Panduleni Jehova, osheshi ye omuwa;Ohole yaye i na oudiinini otai kala po fiyo alushe.
Eshangelo lopedu
^ “Jah” exupipiko ledina Jehova.
^ Ile “monduda.”
^ Ile tashi dulika, “pamwe naavo tava kwafele nge.”
^ Ile tashi dulika, “Ova undula nge neenghono.”
^ Ile “nolefindano.”
^ Emanya olo ohali tulwa mohuke, opo ekuma li kale la kola.
^ Ile “okomaluvinga.”
