Omapsalme 35:1-28
Epsalme laDavid.
35 Omwene Jehova, popile nge moihokolola yange kwaavo tava pataneke nge;Lwifa ovo tava kondjifa nge.
2 Kufa oshikelelifo* shoye shinini nosho yo oshikelelifo sha kula,Ndele to fikama u popile nge.
3 Ovataatai vange va yelulila eonga nekuva loye lomolwoodi.*
Lombwele nge* to ti: “Aame exupifo loye.”
4 Ovo tava kongo omwenyo wange nava fifwe ohoni nokulengaifwa.
Ovo tava pangele omhangela va hanaune nge po nava ye onhapo va fya ohoni.
5 Nava ninge ngaashi olungu tali i nomhepo;Omweengeli waJehova ne va taataeleshi.
6 Elila lavo nali laule nokukala li na omufenu,Eshi omweengeli waJehova te va taataa.
7 Osheshi ova tela nge elulo* meholeko va kwate nge nopehe na etomheno lasha;Ova fela nge* elambo nopehe na etomheno lasha.
8 Na hangwe koudjuu ombadilila;Elulo, olo a holeka, nali mu kwate;Na wile mo, ndele ta hanaunwa po.
9 Ashike ohandi* hafe omolwaJehova;Ohandi hafele oilonga yaye yexupifo.
10 Omakipa ange aeshe otaa ka tya:
“Omwene Jehova, olyelye e ku fa?
Oho xupifa ovo vehe na omukwafi kwaavo ve na eenghono,Ovo vehe na omukwafi nosho yo eehepele kwaavo tave va nyeke.”
11 Eendombwedi doipupulu ohadi uyaTadi pula nge oinima oyo ndihe shii.
12 Nonande onde va ningila ouwa, ohava shunifile nge owii,Tava nyikifa nge* oluhodi.
13 Ashike eshi va li tava ehama, onda djala oshako;Onde* lihepeka mokulidilika;Nongeenge eilikano lange inali nyamukulwa,*
14 Ohandi ende nda nyika oluhodi, nda fa handi lili kaume kange, ile omumwamememati;Onde linyongamena nda nyika oluhodi, ngaashi oo ta lili ina.
15 Ashike eshi nda punduka, ova li va hafa, nova ongala pamwe;Ova ongala pamwe va nangela nge, opo va ponokele nge;Ova nyanyaula nge moinhimbu, noinava kala va mwena.
16 Ovahenakalunga ohava sheke nge nodino,*Ohave likweshele nge komayoo.
17 Omwene Jehova, fiyo onaini to kala ashike wa tala ko?
Xupife nge* komaponokelo avo,Xupifa omwenyo wange u na ondilo* keenghoshi deenyasha.*
18 Opo nee ohandi ke ku pandula meongalo linene;Ohandi ke ku tanga mokati keengudu dovanhu.
19 Ino efa ovo va ninga ovatondi vange nopehe na etomheno lasha, va hafe omolwange:Ino efa ovo ve tonde nge, nopehe na etomheno lasha, va fiikile nge omesho omolwoutondwe.
20 Osheshi ihava popi eendjovo dombili,Ndele ohava pangelele ovanambili vomoshilongo eemhangela doukengeleledi.
21 Ohava ekameke omakanya avo a pwa ko va lundile nge,Tava ti: “Aha! Aha! Omesho etu okwe shi mona.”
22 Omwene Jehova, oshinima eshi owe shi mona. Ino kala wa mwena.
Omwene Jehova, ino kala kokule naame.
23 Penduka, ndele to fikama, u popile nge;Kalunga kange, Jehova, popile nge ko moihokolola yange.
24 Omwene Jehova, Kalunga kange, tokole nge she likolelela kouyuki woye;Ino efa va hafe omolwange.
25 Inave lipopila nandenande tava ti: “Aha! Otwa mona osho twa li twa hala.”*
Inava tya nandenande: “Otwe mu pona po.”
26 Aveshe nava fifwe ohoni, vo nava lengaifwe,Ovo hava hafe omolwoupyakadi wange.
Ovo have litumbalekele nge nava djalekwe ohoni nosho yo elengwa.
27 Ashike ovo va hokwa ouyuki wange, nava hafe unene;Nava popye alushe tava ti:
“Jehova na fimanekwe, oo ha kala a hafa, ngeenge omupiya waye e na ombili.”
28 Opo nee elaka lange otali ka popya* kombinga youyuki woye,Noku ku tanga efimbo alishe.
Eshangelo lopedu
^ Oshikelelifo shinini, osho luhapu hashi humbatwa kovaumbi.
^ Ile “ekuva leememo keembinga mbali.”
^ Ile “omwenyo wange.”
^ Eln., “onete.”
^ Ile “omwenyo wange.”
^ Ile “omwenyo wange.”
^ Ile “omwenyo wange.”
^ Ile “Omwenyo wange.”
^ Ile “ola alukile monhulo yange.”
^ Ile tashi dulika, “Ovahenakalunga ohava sheke omolwoikulya inini.”
^ Ile “omwenyo wange.”
^ Eln., “Wange auke,” tashi ulike komwenyo waye, ile konghalamwenyo.
^ Ile “keenghoshi deendume eenyasha.”
^ Ile “Aha! Eemwenyo detu.”
^ Ile “dilonga.”
