Embo lOvaroma 12:1-21
12 Ovamwatate, ohandi mu kumaida omolwefilonghenda laKalunga, yandjeni omalutu eni onga eyambo liyapuki, li na omwenyo nola hokiwa kuKalunga, eshi tamu mu longele oilonga iyapuki nokukala tamu diladila pandunge.
2 Inamu hopaenena ovanhu vomounyuni ou, ndele lundululeni onghedi yeni yokudiladila opo mu kale hamu longo ehalo laKalunga.
3 Omolwefilonghenda olo nda pewa kuKalunga, ohandi lombwele keshe umwe womunye aha diladile kutya oku dule vamwe, ndele a kale ha diladila pandjele, she likolelela keitavelo olo a pewa kuKalunga.
4 Ngaashi ashike omalutu etu e na oilyo ihapu, ndele ihai longo oilonga ya faafana,
5 nafye, nonande otu vahapu, otwa hanganifwa kuKristus tu kale olutu limwe, ashike atusheni otwa pumbwa okulongela kumwe.
6 Ndele otwa pewa eeshali da yoolokafana omolwefilonghenda laKalunga; ngeenge okuudifa etumwalaka laKalunga, natu udifeni she likolelela keitavelo letu;
7 ngeenge okuyakula, natu yakule noudiinini; ile ngeenge okuhonga, natu honge nelitulemo;
8 ile ngeenge umwe oha tu omukumo, na twe omukumo; ou ha yandje na yandje nehalo liwa; ou ha kwatele komesho ne shi ninge noudiinini; ou ha ulike onghenda ne shi ninge nehafo.
9 Inamu kala nohole yoihelele. Tondeni owii; diinineni osho shiwa.
10 Kaleni mu holafane nohole ya xwama ngaashi ovamwainafana. Kaleni hamu katuka eenghatu mu ulike kutya omwa fimaneka vamwe.
11 Inamu kala mu na ondede, ndele kaleni hamu longo noudiinini. Omhepo iyapuki nai mu linyengife mu kale ovaladi. Longeleni Jehova.
12 Kaleni mwa hafa eshi mu na eteelelo. Lididimikileni omaudjuu. Diinineni okwiilikana.
13 Kaleni hamu yandje kovayapuki she likolelela keemhumbwe davo. Kaleni hamu yakula ovaenda.
14 Nangekeni noupuna ovo tave mu hepeke, ndele inamu va ula omalaka mai.
15 Hafeni pamwe naavo va hafa; lileni pamwe naavo tava lili.
16 Kaleni mu na ko nasha navakweni ngaashi nye vene; inamu kala mu na ounhwa, ndele kaleni ovalininipiki. Inamu diladila kutya omu na eendunge dihapu.
17 Inamu alulila omunhu owii. Longeni oilonga oyo ya hokiwa kovanhu aveshe.
18 Ningeni ngaashi tamu dulu opo mu kale nombili novanhu aveshe.
19 Inamu alulila omunhu owii, ndele efeni Kalunga oye e mu handukile, osheshi opa shangwa: “‘Ehandu olange,* aame handi handukile ou ta nyono,’ Jehova osho ta ti.”
20 Ndele “ngeenge omutondi woye okwa fya ondjala, mu pa a lye; ngeenge okwa fya enota, mu pa a nwe; osheshi kungaho, oto mu ongelele omakala a xwama komutwe waye.”*
21 Inamu efa mu findwe kowii, ndele kaleni hamu findi owii mokulonga ouwa.
