Mbela Kalunga oha udu ngoo omailikano etu?
Mbela owe lipulile nale ngoo ngeenge Kalunga oha pwilikine komailikano oye? Ngeenge osho, have auke. Vahapu ohava ilikana kombinga yomaupyakadi avo kuKalunga, ashike natango opo ashike eli. Mbela osho osha hala okutya Kalunga iha pwilikine komailikano etu? Ahowe! Ombiibeli oye tu shilipaleka kutya Kalunga oha pwilikine komailikano etu ngeenge hatu ilikana metwokumwe nehalo laye. Natu ka taleni osho Ombiibeli tai ti.
KALUNGA OTA PWILIKINE.
“Oove, Omuudi womailikano, ombelela aishe i nokuuya kwoove.” — Epsalme 65:2.
Ovanhu vamwe ohava ilikana molwaashi eilikano ohali va kwafele va kale ve udite xwepo, nonande ova itavela kutya kape oo ta pwilikine. Eilikano kali fi ashike oshinima osho hashi tu kwafele tu kale tu udite nawa ngeenge hatu lididimikile omaupyakadi etu. Ombiibeli oye tu shilipaleka ya ti: “Omwene [“Jehova,” NW] * oku li popepi naaveshe, have mu ifana, aveshe ava have mu ifana moshili. . . . Nonghuwo yavo ohe i udu.” — Epsalme 145:18, 19.
Ohatu dulu okukala tu na oushili kutya Jehova Kalunga oha udu omailikano ovalongeli vaye. Okwa popya pahole a ti: “Nye otamu ka ifana nge ndele tamu ke uya ko ndele tamu ilikana nge, ndele Ame handi ke mu uda.” — Jeremia 29:12.
KALUNGA OKWA HALA U ILIKANE KUYE.
“Diinineni okwiilikana.” — Ovaroma 12:12.
Ombiibeli otai tu ladipike tu ‘kale hatu ilikana’ “nokwiindila efimbo keshe.” Osha yela kutya Jehova Kalunga okwa hala tu ilikane kuye. — Mateus 26:41; Ovaefeso 6:18.
Omolwashike Kalunga a hala tu ilikane kuye? Pashihopaenenwa: Xe omudali oha kala a hafa ngeenge okaana kaye ta ke mu pula ekwafo. Oshoshili kutya xe omudali otashi dulika e shii eemhumbwe dokaana kaye ile e shii nghee ke udite. Ashike ngeenge taka pula ekwafo kuye, ohashi ulike kutya okaana oke mu lineekela noke na ekwatafano lopofingo naye. Sha faafana, ngeenge hatu ilikana kuJehova Kalunga, ohashi ulike kutya otwe mu lineekela notwa hala oku ehene popepi naye. — Omayeletumbulo 15:8; Jakob 4:8.
KALUNGA OKU NA KO NASHA NAAVE SHILI.
“Mu shiivifileni oisho yeni aishe, molwaashi oku na ko nasha nanye.” — 1 Petrus 5:7.
Kalunga okwa hala tu ilikane kuye molwaashi oku tu hole noku na ko nasha nafye. Okwa hala oku tu kwafela molwaashi oku shii omaupyakadi noisho yetu.
Ohamba David oya kala nokupula ekwafo nokuhololela Jehova omaliudo ayo mokukalamwenyo kwayo akushe. (Epsalme 23:1-6) Mbela Kalunga okwa li e uditile ngahelipi David? Kalunga okwa li e hole David nokwa pwilikina komailikano aye mahapu. (Oilonga 13:22) Sha faafana, Kalunga oha pwilikine komailikano etu molwaashi oku na ko nasha nafye.
“ONDI HOLE OMWENE, OSHESHI OHA UDU ONDAKA YANGE”
Eendjovo odo oda shangwa kuumwe womovashangi vEpsalme mOmbiibeli. Okwa li e shii kutya Kalunga okwa uda omailikano aye, naasho osha li she mu kwafela neenghono. Okwa li e udite a ehena popepi elela naKalunga, naasho osha li she mu pameka a ungaunge nomaupyakadi oo a li a taalela monghalamwenyo. — Epsalme 116:1-9.
Okukala tu shii kutya Kalunga oha pwilikine komailikano etu, otashi ke tu kwafela tu twikile okwiilikana kuye. Natu ka tale koshimoniwa shaPedro, oo ha di kolundume laSpain. Okwa filwa omonamati waye womido 19 moshiponga shohauto. Moluhodi laye, okwa mbubulila Kalunga omutima waye nokutwikila okwiilikana a yambididwe nosho yo okuhekelekwa. Oshike sha li sha ningwa po? Pedro okwa ti: “Jehova okwa nyamukula omailikano ange okupitila mOvakriste vakwetu eshi ve tu hekeleka noku tu yambidida nomukulukadi wange.”
Omailikano etu ohaa nyamukulwa okupitila mehekeleko olo tali di kookaume ketu
Nonande eilikano inali alulila omonamati waye momwenyo, ola kwafela Pedro nosho yo oukwaneumbo waye neenghono. Omukulukadi waye, María Carmen, okwa ti: “Eilikano ola kwafela nge ndi lididimikile oluhodi lange. Ondi shii kutya Jehova Kalunga okuudite ko, molwaashi ngeenge nda ilikana kuye ohandi kala ndi udite ombili.”
Ombiibeli nosho yo oimoniwa yavamwe oya ulika kutya Kalunga oha udu omailikano etu. Ashike, osha yela yo kutya Kalunga iha nyamukula omailikano aeshe. Omolwashike Kalunga ha nyamukula ashike omailikano amwe?
^ okat. 5 Jehova edina laKalunga. — Epsalme 83:18, NW.
Otashi dulika yo u hafele oikundafanwa ei
OMAHONGO OMBIIBELI A FIMANA
Mbela Kalunga oha pwilikine ngoo komailikano aeshe?
Ongahelipi ngeenge omunhu ota ilikana e na omatomheno okuliholamwene? Ongahelipi ngeenge omushamane oha ungaunga nai nomukulukadi waye, ndele ota ilikana Kalunga e mu nangeke noupuna?
OMAHONGO OMBIIBELI
Tala nghee eenghundafana detu dopaMbiibeli hadi ningwa
Konakona Ombiibeli naumwe oshali
