Ngeenge otwa lesha kombinga yeshito mOmbiibeli muGenesis, ohatu ka mona kutya omunhu wotete Adam, okwa li a lombwelwa kuKalunga a ti: “Lya komiti adishe domoshikunino ngaashi wa hala, ndelenee omuti wokushiiva ouwa nowii, ino u lya. Osheshi efiku tuu olo to u li, ou na okufya shili.” (Genesis 2:16, 17) Omushangwa oo owa yelifa kutya ngeno Adam okwa dulikile koshipango shaKalunga, ngeno ina fya, ndele ngeno okwa kala nomwenyo fiyo alushe moshikunino shaEden.

Shinyikifa oluhodi, ponhele yokudulika nokukala nomwenyo waalushe, Adam okwa li a hoolola okuhadulika koshipango shaKalunga ndele ta li oshiimati sha dilikwa osho omukulukadi waye Eva, e mu pa. (Genesis 3:1-6) Nafye kunena otwa hangwa koilanduliko yokuhadulika kwa tya ngaho. Omuyapostoli Paulus okwa yelifa oshinima osho a ti: “Oulunde wa etwa mounyuni komunhu umwe, nefyo okoulunde, osho nee efyo ole uya movanhu aveshe, shaashi aveshe va nyona.” (Ovaroma 5:12) ‘Omunhu umwe’ oo okwa li Adam. Ndele mbela oulunde oo owa li tau ulike kushike, nomolwashike wa etifa efyo?

Eshi Adam a nyonena owina omhango yaKalunga, kungaho okwa longa oulunde. (1 Johannes 3:4) Ngaashi Kalunga a lombwela Adam, ondjabi youlunde efyo. Ngeno Adam noludalo laye ova dulikile koshipango shaKalunga, ngeno kave fi ovalunde noinava fya. Kalunga ina shita ovanhu va kale hava fi, ndele ova kale nomwenyo fiyo alushe.

 Oumbangi otau ulike kutya efyo “ole uya movanhu aveshe,” ngaashi Ombiibeli ye shi popya. Ndele mbela ope na oshitukulwa shonhumba mufye hashi kala nomwenyo ngeenge twa fi? Vahapu otashi dulika va tye heeno ope na oshitukulwa shonhumba mufye ihashi fi hashi ifanwa omwenyo. Ashike okupopya ngaho, osha fa omunhu ta ti kutya Kalunga okwa lombwela Adam oipupulu. Ngahelipi mbela? Ngeenge mufye omu na oshitukulwa shonhumba hashi ka kala nomwenyo konhele yonhumba konima yefyo, ngeno efyo kali fi ondjabi youlunde, ngaashi Kalunga a popya. Ombiibeli oya ti: ‘Kalunga iha fufya.’ (Ovaheberi 6:18) Paulelalela, Satana oye a popya oipupulu eshi a lombwela Eva a ti: “Nye itamu fi shili.” — Genesis 3:4.

Osho osha etifa po epulo kutya: Ngeenge ehongo li na sha nomwenyo ihau fi ola kanghamena koipupulu, oshike naanaa hashi ningwa po pefyo?

Ehokololo li na sha neshito muGenesis ola ti: “Omwene Kalunga okwa ma omunhu nondwi yedu ndele te mu fudile meyulu laye omufudo womwenyo. Osho ngaha omulumenhu a ninga omwenyo u na omwenyo.” Outumbulilo “omwenyo u na omwenyo” owa tolokwa okudja koshitya shOshiheberi ne’phesh, * osho tashi ti lelalela “oshishitwa tashi fuda.” — Genesis 2:7.

Kungaho, Ombiibeli oya yelifa nawa kutya ovanhu inava shitwa ve na omwenyo ihau fi. Ponhele yaasho, omunhu keshe oku li “omwenyo u na omwenyo.” Nomolwaasho nonande ou konge mOmbiibeli, ito ka mona mo omushangwa wa longifa outumbulilo “omwenyo ihau fi.”

Molwaashi Ombiibeli inai popya kombinga yomwenyo ihau fi, mbela omolwashike omalongelokalunga mahapu haa hongo shimwe shi lili? Opo tu mone enyamukulo, natu ka kundafaneni kombinga yaEgipti shonale.

Herodotus, omunandjokonona Omugreka womefelemudo etitano K.O.P., okwa ti Ovaegipti ovo va li “va popila tete ehongo lomwenyo ihau fi.” Ovababilon vonale navo ova li tave litungile ouumbo nediladilo olo kutya omwenyo ihau fi. Eshi Alexander Munene a li a finda oilongo yokOushilo woPokati mo 332 K.O.P., ovafilosofi Ovagreka ova li va xumifa komesho ehongo olo, nola li la tandavela mOuhamba waGreka ashishe.

Mefelemudo lotete O.P., oimhanga yOvajuda ivali ya tongomana, Ovaessenes nOvafarisai, oya honga ovanhu kutya ngeenge olutu la fi omwenyo ohau xupu po. O-The Jewish Encyclopedia oya ti: “Eitavelo olo kutya omwenyo ihau fi ola tambulwa ko kOvajuda okudja kOvagreka, naunene tuu okupitila mehongo laPlato.” Sha faafana, omunandjokonona Omujuda wedina Josephus womefelemudo lotete okwa popya kutya ehongo olo inali kanghamena kOmishangwa Diyapuki, ndele “okeitavelo lOvagreka,” olo a li a tala ko kutya oli li omahepu ovatoti veengano.

Eshi enwefemo leenghulunghedi dOshigreka la enda tali xumu komesho, ovo have liti Ovakriste navo ova li va tambula ko ehongo olo loshipaani. Omunandjokonona Jona Lendering okwa ti kutya “ehongo laPlato olo kutya omwenyo wetu owa li pomhito imwe monhele i li xwepo nopaife owa fya ole shi ningifa shipu okulumbakanifa ehongo laPlato nolOukriste.” Nomolwaasho ehongo loshipaani olo kutya omwenyo ihau fi ola li la tambulwa ko meengeleka odo haku tiwa odopaKriste nola ninga oshitukulwa sha fimana shomahongo ado.

Mefelemudo lotete, omuyapostoli Paulus okwa li a yandja elondwelo eli a ti: “Omhepo otai popi eendjovo di uditike nawa nokutya, momafiku axuuninwa vamwe otave liteeka po eitavelo, ndele tava ka shikula eemhepo dipukifi nomalongo eendemoni.” (1 Timoteus 4:1) Eendjovo odo kadi fi tuu doshili! Ehongo lomwenyo ihau fi oli li limwe lomoihopaenenwa ‘yomahongo eendemoni.’ Itali yambididwa kOmbiibeli, nola dilila komalongelokalunga onale oshipaani nokounongo wopanhu.

Otwa hafa eshi Jesus a ti: “Tamu ka shiiva oshili, noshili otai mu mangulula.” (Johannes 8:32) Eshi twa mona eshiivo lashili loshili yOmbiibeli, otwa mangululwa komahongo aeshe oo itaa fimanekifa Kalunga nokeenghedi dihapu odo tadi xumifwa komesho komalongelokalunga mahapumahapu mounyuni. Natango, oshili yEendjovo daKalunga oye tu mangulula moupika womifyuululwakalo noidila ya kwatafana nefyo. — Tala oshimhungu “ Oonakufya ove li peni?”

Omushiti wetu ina shita ovanhu va kale nomwenyo eedula 70 ile 80 kombada yedu ndele tava ka kala konhele imwe i lili fiyo alushe. Elalakano laye lopehovelo li na sha novanhu olo okukala nomwenyo waalushe kombada yedu ve li ovana vaye ovaduliki. Elalakano laKalunga oli li euliko lohole yaye yokuhola ovanhu, nokape na oo ta dulu oku li ya moshipala. (Malakia 3:6) Omupsalme umwe okwa nwefwa mo a shange eendjovo tadi tu omukumo a ti: “Ovayuki, vo otava ka fyuulula oshilongo, ndele tava kala mo alushe.” — Epsalme 37:29.