OVAISRAEL ova li hava hafele omusika neenghono. Ombiibeli oya tumbula lwoikando ovanhu tava shiki oishikomwa nokwiimba omaimbilo. Oshoshili kutya oshitukulwa sha kula shOmbiibeli osha fikama po momaimbilo. Pashihopaenenwa, embo lOmapsalme, Eimbiloelela nosho yo Omaimbilokemo okwa shangwa monghedi yomaimbilo. Embo Music in Biblical Life ola popya kutya Ombiibeli “oya popya kutya Ovaisrael ova li hava longifa omusika monghalamwenyo yavo.”

Omusika oi li oshitukulwa shakeshe efiku. Ovaisrael ova li hava dana omusika opo va holole omaliudo avo. (Jes. 30:29) Ovakainhu ova li hava denge oungoma, tava imbi omaimbilo ehafo nokudana, ngeenge ta pa nangekwa ohamba, poivilo nongeenge Ovaisrael va findana molwoodi. (Ovatok. 11:34; 1 Sam. 18:​6, 7; 1 Eeh. 1:​39, 40) Ovaisrael ova li yo hava imbi omaimbilo va ulike kutya ova nyika oluhodi, ngeenge umwe a fya. (2 Omaf. 35:25) O-McClintock and Strong’s Cyclopedia oya ti kutya “Ovaisrael ova li ve hole omusika neenghono.”

Eehamba daIsrael oda li hadi hafele omusika. Ohamba Saul oya li ya ifana David kombala yayo, opo e i shikile okaxumbafeta. (1 Sam. 16:​18, 23) Lwanima, eshi David a ka ninga ohamba okwa li a shanga omaimbilo mawa, oo a li haa imbwa kotembeli yaJehova. (2 Omaf. 7:6; Amos 6:5) Ohamba Salomo oya li i na ovaimbi ovalumenhu novakainhu mombala yayo. — Omuud. 2:8.

Ovaisrael ova li hava longifa omusika opo va longele Jehova. Ovanhu 4 000 ova li hava imbi omaimbilo motembeli muJerusalem. (1 Omaf. 23:5) Ova li hava kala ve kwete omayaxa, oishikomwa yeengodi, ouxumbafeta nosho yo omanghuma. (2 Omaf. 5:12) Ovo va li ve na owino havo ashike va li hava imbi omaimbilo opo va longele Jehova. Ovaisrael vahapu ova li hava imbi omaimbilo, ngeenge tava i koivilo yokomudo kuJerusalem. (Eps. 120–134) She likolelela komashangelo Oshijuda, Ovaisrael ova li hava imbi omaimbilo a dja mOmapsalme a ngeenge ve li pouvalelo wOpaasa.

Omusika natango oi li oshitukulwa sha fimana kunena koshiwana shaKalunga. (Jak. 5:13) Ohatu imbi omaimbilo opo tu tange Jehova. (Ef. 5:19) Ngeenge hatu imbile Jehova, tu li pamwe novamwatate novamwameme, ohashi tu hanganifa. (Kol. 3:16) Omaimbilo ohae tu kwafele tu lididimikile omashongo. (Oil. 16:25) Ngeenge hatu imbi ohatu ulike kutya otu na eitavelo muJehova notu mu hole.