KOSHI yOmhango, Jehova okwa li a pitika Ovaisrael va yambe omayambo omalyamono nosho yo ounghutyona. Oudila ovo vavali alushe ova li hava tumbulwa pamwe mOmhango i na sha nomayambo, nomunhu okwa li ha dulu okuyandja kamwe komoudila ovo, oko e na po. (Lev. 1:14; 12:8; 14:30) Osho osha li shi na ouwa washike? Etomheno limwe ololo kutya omalyamono okwa li a pumba. Omolwashike mbela?

Omalyamono oo oudila ovo ve hole okukala muIsrael peemwedi odo hadi kala da pupyala. MuOktoba alushe ohava tembuka okudja kolukadi va finda koilongo oyo hai kala ya pupyala, nohava alukile kuIsrael pokwenye. (Eimb.lela 2:11, 12; Jer. 8:7) Osho osha li hashi kala shidjuu kOvaisrael okuyamba omalyamono pefimbo lokufu.

Mepingafano naasho, ounghutyona ihava tembuka naanaa nohava pange omudo aushe muIsrael. Shikwao vali, ounghutyona ohava dulu okutekulwa momaumbo. (Yelekanifa naJohannes 2:14, 16.) Embo li na sha noimeno nosho yo noinamwenyo yomOmbiibeli ola ti: “Ovanamukunda aveshe naavo hava kala meedolopa muPalestine ova li hava tekula momaumbo ounghutyona. Oovene vomaumbo vahapu ova li hava kala ve na oshikuku, ile omalambo a hokwa mekuma, omo hamu kala eenghuti davo.” — Yelekanifa naJesaja 60:8.

Jehova okwa ulika kutya omunahole noku na ondjele, eshi a li ha tambula ko omayambo oudila, ovo va li hava kala muIsrael momukokomoko womudo aushe.