1. Ohombo

Ovanhu ove na omataleko a yoolokafana e na sha nohombo nosho yo osho tashi dulu okukwafela ovalihomboli va kale va hafa.

OSHO OSHA HALA OKUTYA: Jehova oye omutoti wohombo, onghee oku shi shii kutya oshike ovalihomboli va pumbwa, opo va kale va hafa. (Markus 10:​6-9) Ngeenge ovalihomboli ova kala hava filafana oshisho, ponhele keshe umwe a lalakanene ouwa waye mwene, otashi ka pameka ohombo yavo. Omushamane oo e hole omukulukadi waye ohe shi ulike monghedi omo ha ungaunga naye nanghee he mu file oshisho. Ofimbo omukulukadi oo a fimaneka omushamane waye ohe shi ulike okupitila meendjovo nomeenghatu daye.

EWILIKO LOMBIIBELI OTALI LONGO: Quang naThi vokoVietnam ova li va itavela kutya kave na efiku va ka kale va hafa mohombo yavo. Quang ka li ha ulike onghenda luhapu. Okwa ti: “Kanda li ndi na ko nasha nomaliudo aThi naluhapu onda li handi mu fifa ohoni.” Osho osha ningifa Thi a kale a hala okuteya ohombo. Thi okwa ti: “Onda li ndi wete kutya kandi na vali efiku ndi ka kale nde mu lineekela, ile nde mu fimaneka e li omushamane wange.”

Mokweendela ko kwefimbo, Quang naThi ove lihonga osho Ombiibeli tai hongo nova tula moilonga omushangwa wOvaefeso 5:33. Quang okwa ti: “Ovelishe ei oya kwafela nge ndi mone kutya onda pumbwa okukala omunanghenda, nondi ulikile Thi ohole noku mu fila oshisho painiwe, palutu nopamaliudo. Eshi nda hovela okuungaunga naye ngaho, oshe mu ningifa a kale e hole nge nokwa fimaneka nge.” Thi okwa ti, “Luhapu, eshi nda kala handi tula moilonga Ovaefeso 5:33 nokuulikila omushamane wange kutya onde mu fimaneka, osha kwafela neenghono omushamane wange a kale e hole nge, a amene nge, noshe tu etela ombili.”

 2. Nghee tu na okuungaunga navamwe

Luhapu ovanhu ohava ungaunga nai navamwe omolweputuko, oukwashiwana, eholokepo, elongelokalunga, ile etaleko la yoolokafana li na sha nomilele.

OSHO OSHA HALA OKUTYA: Ombiibeli inai tu honga tu tonde ovanhu omolwoukwashiwana, ile eshi ve li omashenge. Ndele ponhele yaasho, otai tu ladipike tu kale twa fimaneka ovanhu aveshe, kashi na nee mbudi kutya ova dja momuhoko ulipi, moshiwana shilipi, ovakengeli, ile ovafyoona. (Oilonga 10:34) Kutya nee itatu tu kumwe naasho vamwe va itavela, ile oilonga yavo, natango otwa pumbwa okuungaunga navo nonghenda nosho yo nefimaneko. — Mateus 7:12.

EWILIKO LOMBIIBELI OTALI LONGO: Daniel okwa li a hongwa a tale ko ovanhu ovo va dja kuAsia kutya ove li ovatondi voshilongo shavo. Okwa li e tonde keshe umwe a dja koshilongo oko nokwa li he va ula omalaka a honga mokati kovanhu. Daniel okwa ti: “Okwa li handi diladila kutya ohandi yambidida oshilongo shetu.” Kanda li nda tala ko kutya onghedi omo nda li handi diladila oya li ya puka.”

Lwanima, Daniel okwe ke lihonga osho Ombiibeli tai hongo. Okwa ti: “Onda li ndi na okulundulula filufilu onghedi yange yokudiladila.” Onda li nda hovela okutala ko ovanhu ngaashi Kalunga he va tale ko, nonda mona kutya ovanhu aveshe ova faafana, kashi nee mbudi kutya ova dja koshilongo shilipi.” Daniel ota hokolola nghee a li ha kala e udite, ngeenge a shakena novanhu. Okwa weda ko a ti: “Luhapu, ihandi diladila nokuli kutya ova dja koshilongo shilipi. Ondi hole ovanhu vomaludi aeshe nonda panga oukaume wopofingo novanhu va dja koilongo i lili noku lili mounyuni aushe.”

 3. Oimaliwa

Ovanhu vahapu otava lalakanene oupuna, opo va kale va hafa nova ka kale ve na onakwiiwa i li xwepo.

OSHO OSHA HALA OKUTYA: Otwa pumbwa oimaliwa, ashike itashi ti kutya otai tu etele ehafo paife, ile monakwiiwa. (Omayeletumbulo 18:11; 23:​4, 5) Ndele ponhele yaasho, ehafo lashili nosho yo eameno ohali di mokutula moilonga ounongo, oo hau di kuKalunga, ngaashi tau hangwa mOmbiibeli. — 1 Timoteus 6:​17-19.

EWILIKO LOMBIIBELI OTALI LONGO: Omulumenhu wedina Cardo, wokoIndonesia, okwa li ta yandje elitulemo kokulalakanena omaliko. Okwa ti:“Onda li ndi na oinima aishe oyo ovanhu vahapu hava kala va hala. Onda li handi dulu okuya keshe pamwe nokulanda oinima yondilo, eetuwa, nosho yo omaumbo.” Oimaliwa yaye oya li ya pwa po mepakumo leisho. Okwa weda ko vali a ti: “Onda li nda kengelelwa kuumwe nokwa li a kufa po oimaliwa yange oyo nda kala nokulongela noudiinini oule womido. Onda li nda longa noudiinini oule womido, opo ndi punapale, ashike onda li nda nyemata, molwaashi kanda li nda xupa po na sha nokwa li ndi udite ndihe na oshilonga.”

Cardo okwa li a hovela okutula moilonga omayele Ombiibeli e na sha noimaliwa. Iha yandje vali elitulemo kokupunapala, ashike okwa hoolola okukala nonghalamwenyo i li paunafangwa. Okwa ti: “Paife ondi udite nda punapala, molwaashi ondi na ekwatafano liwa naKalunga. Ohandi kofa nawa onguloshi keshe nonda mona ehafo lashili.”

 4. Omilele

Ovanhu ove na omataleko mahapu, ngeenge tashi uya pomilele.

OSHO OSHA HALA OKUTYA: Ombiibeli oya tula po omhango i na sha nomahalo opamilele. Oshitya “oluhaelo” osha kwatela mo oluhaelo, oumbwada, ekwatafano lopamilele, ofimbo ovanhu inava hombola, oushenge nosho yo okunangala noimuna. (1 Ovakorinto 6:​9, 10) Omilele oshali ya dja kuKalunga, oyo a nunina ashike ovalumenhu novakainhu ovo va hombola. — Omayeletumbulo 5:​18, 19.

EWILIKO LOMBIIBELI OTALI LONGO: Omumwameme wedina, Kylie, wokoAustralia okwa ti: “Shaashi inandi hombolwa, onda li handi diladila kutya ngeenge onda i momilele ohandi ka kala ndi udite ndi holike nonda amenwa. Ashike osho hasho sha li sha ningwa po. Onda li ndi udite inandi amenwa, nomutima wange owa li wa tekauka.”

Lwanima, okwa li e lihonga nokutula moilonga osho Ombiibeli tai hongo kombinga yomilele. Okwa ti: “Onda li nda mona kutya omafinamhango aKalunga otae tu amene kouyahame nokukala twa nyemata. Paife ondi udite nda amenwa nondi holike, molwaashi ohandi ningi oinima monghedi omo Jehova a hala tu i ninge. Okutula moilonga omayele Ombiibeli osha amena nge filufilu komaupyakadi mahapu!”