OMIDO opo da di ko, Rúbia, omumwameme oo paife e na omido 30, okwa li a ka talela po Sandra, omukokolindjila oo ta longo meongalo linini olo li li kolukadi laBrasilia. Pefimbo a li ta talele po, opa li pa ningwa oshinima osho she mu kuma neenghono nosha li she mu linyengifa a lundulule onghedi yaye yokukalamwenyo. Mbela oshinima osho osha li shike? Natu ude eshi Rubia ye mwene te tu kufile ko.

“Onda li nda ya pamwe naSandra tu ka talele po omukainhu oo a li ha konakona naye Ombibeli. Omukainhu oo okwa li a popya fimbo hatu konakona, ta ti: ‘Sandra, ope na oukadona vatatu ovo handi longo pamwe navo va hala okukonakona Ombibeli, ndele onde va lombwela kutya nava teelele olufo lavo li fike. Ondi shii kutya ou na nale ovanhu vahapu ovo to konakona navo odula ei.’ Onda li nda kuminwa osho nda uda.  Ovanhu va hala okushiiva Jehova ndele ove na okuteelela olufo lavo li fike! Koshitukulwa shetu, oshidjuu okumona omukonakoni nande umwe. Pefimbo ashike olo, fimbo twa li natango meumbo lomukonakonimbibeli oo, onda li nda kwatwa kehalo lokukwafela ovanhu vomokadoolopa kavo. Diva ashike konima yaasho, onda li nda tembuka mo moshilando sha kula omo nda li handi di nokuya kodoolopa oko Sandra a li ta kokola ondjila.”

Mbela Rúbia osha li she mu endela ngahelipi? Okwa ti: “Moule ashike weemwedi mbali konima eshi nda tembukila kodoolopa oyo, onda li nda hovela okukonakona Ombibeli novanhu 15, ndele otashi dulika ito shi itavele kutya moule ashike wefimbo lixupi, ngaashi Sandra, naame onda ka kala ndi na omusholondodo wovanhu va hala okukonakona.”

Diego, omumwatate oo paife e na omido 20 nasha, okwa li a talela po ovakokolindjila vamwe ovo tava longo moPrudentópolis, okadoolopa ke li kolukadi laBrasilia. Etalelepo olo ola li le mu kuma neenghono, nola li le mu linyengifa a talulule oukalele waye. Okwa ti: “Kanda li lela handi longo noudiinini meongalo letu; onda li handi longo ashike eevili dinini omwedi keshe moukalele. Ndele eshi nda li nda talela po ovakokolindjila ovo nokupwilikina koimoniwa yavo, osha li sha ningifa nge ndi mone kutya vo otava hafele oukalele ofimbo ame ndi na ounye okuya moukalele. Eshi nda mona kutya ova hafa neenghono, osha ningifa nge ndi kale nda hala okukala nonghalamwenyo i na eityo ngaashi vo.” Konima yetalelepo olo, Diego okwa li a hovela okukokola ondjila.

Ngaashi Diego, mbela ou li omunyasha oo ha kufa ombinga moilonga yokuudifa noha kala pokwoongala kwopaKriste nohai moukalele shimha ashike tai ndele ihe u hafele? Ngeenge osho, mbela ito dulu okuninga omalunduluko opo u dule okumakela nokumona ehafo olo hali di mokulonga opo pe na omhumbwe inene yovaudifi vOuhamba? Otashi dulika shili u kale wa tila okuninga omaliyambo nokweefa po okulalakanena onghalamwenyo youdjeko. Ndele nande ongaho, ovanyasha vahapu ohava ningi omaliyambo. Ova ninga eenghendabala opo va ninge omalunduluko shi na sha nomalalakano nosho yo omahalo avo opaumwene opo va dule okulongela Jehova pauyadi. Natu ka taleni vali koshihopaenenwa shaBruno.

Omido da ya, Bruno, oo paife e na omido 28, okwa li kofikola yomusika ya fimana nokwa li a lalakanena okuninga  omuwiliki wongudu yovashiki voishikomwa. Okwa li e shi endifa nawa melihongo laye nopeemhito dihapu nokuli okwa li ha shivwa a ka wilike ongudu inene yovashiki voishikomwa. Okwa li ta lalakanene eifano tali timaumbwilifa. Bruno okwa ti: “Nande ongaho, onda li ndi udite kutya ope na sha sha kambela mo monghalamwenyo yange. Onde liyapulila Jehova, ndele onda kala ndi shi shii kutya ihandi mu pe sha wana, naasho osha kala hashi nyemateka nge. Onda li nda lombwela Jehova meilikano shi na sha nomaliudo ange nonda li yo nda popya novamwatate meongalo ovo va pyokoka. Konima eshi nda diladila moule, onda li nda tokola okupitifa komesho oukalele ponhele yokukala nda pitifa komesho omusika; handi efa po ofikola yomusika ndele handi ka longa koshitukulwa oko kwa li ku na shili omhumbwe yovaudifi vOuhamba.” Etokolo laye ole mu etela oidjemo ya tya ngahelipi?

Bruno okwa li a tembukila kodoolopa yaGuapiara (i na ovakalimo 7 000 lwaapo) oyo i li eekilometa lunga 260 okudja koshilando shaSão Paulo. Okwa li a ninga omalunduluko manene. Okwa ti: “Onda li nda tembukila meumbo linini omo mwa li muhe na okila yokutalaleka, o-TV ile ointaneta. Ashike, eumbo olo ola li li na oinima oyo nda li ndihe na nale; oshikunino shoikwambidi noshomiti doiimati.” Ofimbo ta longo oko meongalo linini, oshivike keshe Bruno oha pakele oikulya yaye mondjato, omeva nosho yo oishangomwa, nokulonda omota a ka udifile komikunda. Ovanhu vahapu vomoshitukulwa osho inava udifilwa nande onale onghundana iwa. Okwa ti: “Onda li handi ningi omakonakonombibeli e li 18. Okutala eshi ovakonakonimbibeli tava ningi omalunduluko meenghalamwenyo davo osha etela nge ehafo linene.” Okwa weda ko ta ti: “Paife onda mona kutya oshike sha li sha kambela po monghalamwenyo yange; omaliudo okukala nda wanenwa omolwokupitifa komesho oinima yOuhamba. Ngeno onda li nda lalakanena oinima yopamaliko, ngeno inandi mona ehafo la tya ngaho.” Mbela Bruno oha xupu ngahelipi painiwe moGuapiara? Okwa popya te limemesha ta ti: “Ohandi hongo ovanhu okushika oshiketala.” Bruno natango onghulungu mokuhonga nokushika omusika.

Mariana, oo paife e na omido 20 nasha okwa li monghalo ya faafana naayo yaBruno. Okwa li ha longo e li hahende, ndele nonande oilonga oyo oya li hai futu nawa, ka li e na ehafo lashili. Okwa ti: “Onda li ndi udite nda fa ‘handi shikula omhepo.’” (Omuud. 1:17) Ovamwatate novamwameme vamwe ova li ve mu ladipika a kufe  oukokolindjila. Konima eshi e lipula kombinga yao, ye nookahewa kaye Bianca, Caroline naJuliana ova li va tokola oku ka kwafela eongalo li li moBarra do Bugres, odoolopa ye likalela i li popepi naBolivia, i li eekilometa omayovi okudja pomaumbo avo. Mbela oshike sha li sha ningwa po okudja opo?

Mariana okwa ti: “Onda li ashike nda lalakanena oku ka kala ko eemwedi 3. Ndele efimbo olo eshi li li pokupwa ko, onda hangwa ndi na ovakonakonimbibeli 15. Kape na omalimbililo, ovakonakonimbibeli ovo ova li va pumbwa ekwafo lihapu opo va ninge exumokomesho moshili. Onghee hano, osha li shidjuu oku va lombwela kutya ohandi shuna. Onda li ashike ndi na okukala po.” Ovamwameme ovo aveshe va-4 osho naanaa va li va ninga. Mbela oilonga ipe yaMariana oye mu ningifa ngoo a kale nonghalamwenyo tai ti sha? Okwa ti: “Jehova ota longifa nge ndi kwafele ovanhu va xwepopaleke eenghalamwenyo davo, naasho ohashi hafifa nge. Oshi li enangeko noupuna kwaame eshi ndi shii kutya paife ohandi longifa efimbo neenghono dange moilonga oyo tai ti sha lela.” Caroline okwa popya shi na sha nanghee aveshe 4 ve udite, a ti: “Ngeenge nda nangala konguloshi, ohandi kala ndi udite nda wanenwa neenghono molwaashi ohandi longo noudiinini mokuxumifa komesho oinima yOuhamba. Paife ohandi lipula ashike shi na sha nanghee ndi na okukwafela ovakonakonimbibeli vange. Oshihafifa oku va tala tava ningi exumokomesho. Paife onda mona oushili weendjovo odo tadi ti: ‘Makeleni, nye mu tale ouwa wOmwene apa u fike.’” — Eps. 34:9.

Jehova iha kala tuu a hafa eshi pe na omuvalu tau hapupala wovamwatate novamwameme ovanyasha mounyuni aushe ‘ve lilongekida va longe nehalo liwa’ mokuudifa onghundana iwa yOuhamba koitukulwa ye likalela! (Eps. 110:3; Omayel. 27:11) Aveshe ovo tava longo nehalo liwa, Jehova ohe va nangeke noupuna munene. — Omayel. 10:22.