ESHI Jesus a li kombada yedu, okwa li a ulika omaukwatya a fa aXe monghedi ya wanenena nokwa li ha ningi oinima ngaashi ye. Okwa ti: “Ihandi longo sha pahalo lange; ndele ohandi popi ashike oinima oyo Tate a honga nge. . . . Ohandi longo alushe osho tashi mu hafifa.” (Johannes 8:28, 29; Ovakolossi 1:15) Onghee, eshi hatu ka konakona onghedi omo Jesus a li a ungaunga novakainhu nanghee he va tale ko, otashi ke tu kwafela tu ude ko nghee Kalunga a tala ko ovakainhu naasho a teelela va ninge.

She likolelela kwaasho sha popiwa momahokololo Omavaengeli, ovahongwanhu vahapu ova mona kutya Jesus okwa li e na etaleko li na sha novakainhu la yooloka kwaalo lovanhu vopefimbo laye. Ola li la yooloka ko ngahelipi? Naasho sha fimana, mbela ehongo laye otali pe ngoo natango ovakainhu emanguluko kunena?

Jesus ka li a tala ko ovakainhu ve li oshilongifo shomilele. Pataleko lovawiliki vamwe velongelokalunga lOshijuda, okuninga ekwatafano novanhu voukashikekookanhu wa yooloka ko kuwoye, ohashi twala shike mokahalu. Molwaashi ovakainhu ova li va talika ko ve li eyeleko kovalumenhu, kava li va pitikwa va popye novalumenhu meenhele daaveshe, ile va kale inava djala oshikaiwa komutwe. Mepingafano naasho, Jesus okwa li a ladipika ovalumenhu va kale ve na elipangelo ngeenge tashi uya komahalo avo opambelela, nokuungaunga novakainhu nefimaneko, ponhele yoku va ninga okatongo. — Mateus 5:28.

Jesus okwa ti yo vali: “Keshe ou ta teya ohombo nomukulukadi waye, ndele ta hombola umwe, ota haele noke fi omudiinini kuye.” (Markus 10:11, 12) Okwa li e li omhinge nehongo lOshirabi olo la li la pitika ovalumenhu va henge po ovakainhu vavo “omolwoshinima keshe.” (Mateus 19:3, 9) Okuhaela nokukala vehe fi ovadiinini kovakainhu vavo kasha li shi shiivike kOvajuda vahapu. Oorabi ova li hava hongo kutya ovashamane kave na efiku va haele, ndele ovakainhu ovo ashike tava dulu okukala vehe fi ovadiinini. Omuyandjimulombo umwe wOmbiibeli okwa ti: “Eshi Jesus a teelela ovashamane ve lihumbate monghedi ya koshoka ngaashi ovakulukadi vavo, osho sha ningifa ovakainhu va kale va fimanekwa.”

Nghee ehongo laJesus le va kuma kunena: Meongalo lopaKriste lEendombwedi daJehova, ovakainhu ova manguluka okweendafana novalumenhu. Ashike nande ongaho, ihava kala va tila okukala tava talwa monghedi inai koshoka, ile pa kale vamwe tave lixu muvo, molwaashi ovalumenhu Ovakriste ohava kala va lungama nohava ungaunga ‘novakainhu ovakulunhu ongaashi ooina, novakainhu ovanyasha ongaashi ovamwaina oukadona; nove va fimaneka neenghono.’ — 1 Timoteus 5:2.

Jesus okwa li a konga efimbo a honge ovakainhu. Mepingafano netaleko loorabi olo la li la ningifa ovakainhu va kale inava hongwa, Jesus okwa li a honga ovakainhu noku va twa omukumo va kale hava holola omaliudo avo. Eshi Jesus a li a popila Maria, opo aha pitililwe po kehongo laye, okwa li a ulika kutya ovakainhu kave fi ashike ovanhu vokukala ve lipyakidila noinima yomokombifa. (Lukas 10:38-42) Omumwaina waMaria, Marta, naye okwa li a mona ouwa mehongo olo, ngaashi sha ulikwa eshi a li a nyamukula Jesus pandunge konima eshi a nyumuna Lasarus koufi. — Johannes 11:21-27.

Jesus okwa li e na ohokwe mwaasho tashi hongwa ovakainhu. Pefimbo laye, ovakainhu Ovajuda ova li va itavela kutya opo va kale va hafa ova li ve na okumona okaana kokamati oko ka tumbala, nongeenge otashi shiiva oke li omuprofeti. Omukainhu umwe okwa popya a ti: “Omukainhu oo e ku humbata moshidalelo shaye nokwe ku nyamifa ota kala a hafa!” Jesus okwa li a longifa omhito oyo e mu lombwele kombinga yonghundana iwa. (Lukas 11:27, 28) Eshi Jesus a li a popya kutya osha fimana okudulika kuKalunga, okwa li e mu lombwela oshinima sha fimana shi dulife onghandangala yopamufyuulwakalo oyo ya li ya fininikilwa ovakainhu. — Johannes 8:32.

Nghee ehongo laJesus le va kuma kunena: Ovahongi meongalo lopaKriste ohava tambula ko omatyekosha oo haa yandjwa kovakainhu pokwoongala kweongalo. Ova fimaneka ovakainhu va pyokoka molwaashi ove li “ovahongi vaasho shiwa,” kutya nee omoinima yopaumwene nove li oihopaenenwa iwa. (Titus 2:3) Ove ve lineekelela yo oshilonga shokuudifa onghundana iwa yOuhamba waKalunga moipafi. — Epsalme 68:11; tala oshimhungu  “Mbela omuyapostoli Paulus okwa li a kelela ovakainhu vaha popye?” pepandja 9.

Jesus okwa li e na ko nasha novakainhu. Eshi Ombiibeli ya li tai shangwa, oukadona kava li va tumbalekwa ngaashi ovamati. OTalmud oya ulika ediladilo olo eshi ya ti: “Oo a hafa oyoo e na ounona voumati, ndele woo kwaao e na ounona voukadona.” Ovadali vamwe ova li va tala ko ounona voukadona ve li omutengi munene, nomolwaasho ova li have va kongele ovamati noku va pa omaano ohombo, nokava li hava kala ve likolelela kekwafo lavo ngeenge va kulupa.

Jesus okwa ulika kutya omwenyo wokakadona owa fimana ngaashi ashike wokamati, eshi a li a nyumuna okamonakadona kaJairus nosho yo omonamati womufiyekadi wokuNain. (Markus 5:35, 41, 42; Lukas 7:11-15) Konima eshi Jesus a velula omukainhu oo a li “e na omhepo ya nyata oyo ya li ye mu ningifa a kale ta vele oule womido 18,” okwa li e mu ifana “oludalo laAbraham,” outumbulilo oo wa li uhe shiivike naanaa momashangelo Ovajuda. (Lukas 13:10-16) Eshi a longifa outumbulilo oo wefimaneko nowopahole, ina ulika ashike kutya okwe mu tala ko e li omunhu a fimana moulikumwe wovanhu, ndele okwa ulika yo kutya oku na eitavelo la kola. — Lukas 19:9; Ovagalati 3:7.

Nghee ehongo laJesus le va kuma kunena: Ope na epopyo limwe lOshiasia tali ti: “Okutekula okaana kokakadona osha fa ashike to tekele oshikunino shopoushiinda.” Ooxe Ovakriste ovanahole inava nwefwa mo kediladilo olo molwaashi ohava tekula nawa ounona vavo aveshe, ovamati noukadona. Ovadali Ovakriste ohava shilipaleke kutya ounona vavo aveshe ohava mono ehongo nokufilwa oshisho pauhaku.

Jesus okwa li e lineekela ovakainhu. Momhangu yOvajuda, oumbangi wovakainhu owa li wa talwa ko wa faafana nau tau yandjwa kovapika. Josephus, omunandjokonona womefelemudo lotete, okwa yandja omayele a ti: “Oumbangi wovakainhu itau dulu okulineekelwa omolwoshitwe yavo.”

Mepingafano naasho, Jesus okwa li a hoolola ovakainhu va yandje oundombwedi u na sha nenyumuko laye. (Mateus 28:1, 8-10) Nonande ovakainhu ovo ovadiinini ova li va mona eshi Omwene wavo ta dipawa nokupakwa, eendjovo davo kada li da itavelwa kovayapostoli. (Mateus 27:55, 56, 61; Lukas 24:10, 11) Ndele nande ongaho, eshi Kristus e lihololela tete ovakainhu, otashi ulike kutya okwa li e va tala ko va wana okuyandja oundombwedi, ngaashi ashike ovahongwa vaye vakwao. — Oilonga 1:8, 14.

Nghee ehongo laJesus le va kuma kunena: Meongalo lEendombwedi daJehova, ovalumenhu ovo ve na oinakuwanifwa ohava ulike kutya ova fimaneka ovakainhu mokupwilikina komaetepo avo. Natango, ovashamane Ovakriste ova ‘fimaneka’ ovakulukadi vavo mokupwilikina kuvo nelitulemo. — 1 Petrus 3:7; Genesis 21:12.

Ngeenge ovashamane tava hopaenene Kristus, ovakainhu ohava fimanekwa nokumona emanguluko olo Kalunga a li a lalakanena va mone okudja pehovelo. (Genesis 1:27, 28) Ponhele yokuyambidida ediladilo olo kutya ovalumenhu ove na okukala ookanyamukulwa, ovashamane Ovakriste ohava wilikwa komafinamhango Ombiibeli, oo haa xumifa komesho ehafo lookaume kavo kopahombo. — Ovaefeso 5:28, 29.

Eshi Yelena a hovela okukonakona Ombiibeli, okwa li te lididimikile okuhepekwa komushamane waye. Okwa putukila momudingonoko omo mu yadi elongifo leenghono, omo ovalumenhu hava kwata po ovakainhu ovo va hala okuhombola nomu yadi omahepeko opalutu. Yelena okwa ti: “Osho nde lihonga mOmbiibeli osha pameka nge. Onda li ndi udite ko kutya ope na omunhu oo e hole nge, a lenga nge noha file nge oshisho. Onda li yo ndi shii kutya ngeenge omushamane wange okwa konakona Ombiibeli, osho otashi ka lundulula etaleko laye li na sha naame.” Osho osha li sha ningwa eshi omushamane waye a li a dimina okukonakona Ombiibeli nokwa ninginifwa e li umwe womEendombwedi daJehova. Yelena okwa ti: “Oku li oshihopaenenwa shiwa shelipangelo. Otwe lihonga okudiminafana po nehalo liwa.” Okwa ti vali: “Omafinamhango Ombiibeli okwa kwafela nge shili ndi kale ndi udite kutya onda pumbiwa nondi li meameno mohombo yange.” — Ovakolossi 3:13, 18, 19.

Oshimoniwa shaYelena hasho ashike. Ovakainhu Ovakriste omamiliyona ova hafa molwaashi vo novashamane vavo ohava ningi eenghendabala va tule moilonga omafinamhango Ombiibeli meehombo davo. Ova fimanekwa, ohava hekelekwa nova manguluka okweendafana nOvakriste vakwao. — Johannes 13:34, 35.

Ovalumenhu novakainhu Ovakriste ove shii kutya ove li ovalunde noinava wanenena, nove li oishitwa yaKalunga “oya ya menyonauko.” Ashike nande ongaho, ngeenge ova kulike ekwatafano liwa naKalunga Xe, Jehova omunahole, otava kala ve na eteelelo loku “ka mangululwa moupika wenyonauko” noku ka hafela ‘emanguluko loshinge shovana vaKalunga.’ Kali fi tuu eteelelo litunhula kovalumenhu novakainhu koshi yefiloshisho laKalunga! — Ovaroma 8:20, 21.