JEHOVA okwa li e shii kutya Omona waye omuholike ota ka mona oixuna nota ka dipawa. Exunganeko olo li li muGenesis 3:15 ola ulika kutya osho tashi ka kala ngaho nonande inali shi popya odikilila. Kalunga okwa li ta dulu ngahelipi okukwafela ovanhu va mone kutya ekuliloyambo lOmona waye oli li oshinima shi na ondilo? Oku shi faneka, Kalunga okwa li a pula Abraham a yambe po omona waye omuholike Isak.

Abraham okwa li e na eitavelo la kola. Dimbuluka kutya Kalunga okwa li e mu udanekela kutya Omuxupifi ile Oludalo la udanekwa otali ka dja mulsak. Molwaashi Abraham okwa li e shii kutya Jehova ota dulu okunyumuna Isak ngeenge osha pumbiwa, okwa li a tokola oku mu yamba po. Ndele eshi a li pokudipaa Isak, omweengeli umwe oo a li a tumwa kuKalunga okwa li e mu kangheka. Molwaashi Jehova okwa li a pandula Abraham eshi a li e na ehalo okuyamba po omona waye omuholike, okwa li e mu shilipaleka vali kutya ota ka wanifa po eudaneko laYe.

Lwanima, Isak okwa ka dala ovanamati vavali, Esau naJakob. Mepingafano naEsau, Jakob okwa li e na olupandu li na sha noinima yopamhepo, na Jehova okwa li e mu nangeka noupuna. Kalunga okwa li a pa Jakob edina lipe, Israel. Israel okwa li e na ovanamati 12, ovo va ka ninga omitwe domapata aIsrael. Osha li sha enda ngahelipi opo oukwaneumbo oo u ninge oshiwana shinene?

Opa li pa ningwa oiningwanima ihapu okudja eshi ovanamati vahapu vaJakob va li va twila ondubo ondenge yavo Josef. Ova li ve mu landifa po a ka ninge omupika ndele ta twalwa kuEgipti. Ndele Jehova okwa li a nangeka noupuna omunyasha oo a li ependa nomudiinini. Nonande Josef okwa li a pita meenghalo didjuu, lwanima, Farao, omupangeli waEgipti, okwa li e mu pa eenghonopangelo dinene. Osho osha li sha ningwa pefimbo la wapala, molwaashi pefimbo opo Jakob okwa li a tuma vamwe vomovanamati vaye va ye kuEgipti va ka lande oikulya omolwondjala oyo ya li moshilongo shavo, yo oikulya aishe muEgipti oya li mepashukilo laJosef. Konima eshi Josef a li a hangana novamwaxe ovo va li ve livela ombedi, okwa li e va dimina po nokwa li a unganeka opo oukwaneumbo wavo aushe u uye kuEgipti. Oukwaneumbo waJakob eshi we uya muEgipti owa li wa pewa edu liwa, nowa twikila okuhapupala nokuhepuluka. Josef okwa li e wete kutya Kalunga oye a unganeka oiningwanima aishe oyo opo a wanife po omaudaneko aYe.

Jakob okwa fila muEgipti omo a li noukwaneumbo waye. Fimbo a li pokufya, okwa li a xunganeka kutya Oludalo la udanekwa, ile Omuxupifi, ota ka kala Omupangeli omunaenghono nota ka dja mepata lomonamati waye Juda. Fimbo Josef ina fya, naye okwa li a xunganeka kutya fiku limwe Kalunga ota ka tembula mo oukwaneumbo waJakob muEgipti.

— Oshileshwa eshi osha kanghamena kuGenesis etukulwa eti-20 fiyo eti-50; nosho yo Ovaheberi 11:17-22.