OMAFELEMIDO mahapu fimbo Ovaisrael inava ya medu laKanaan, Jehova okwa li a udaneka kutya oludalo laAbraham ola li tali ka nangala edu olo. Eshi efimbo la fika, Josua okwa li ta wilike oshiwana shaIsrael shi ka kwate ko Edu lEudaneko olo.

Kalunga okwa li a tokolela Ovakanaan ehanauno, molwaashi ova li va duvila oluhaelo nova li ve hole elongifo leenghono netileshi lohonde. Onghee hano, Ovaisrael ova li ve na okuhanauna po sheke oilando yaKanaan oyo va li va kwata ko.

Ndele ofimbo Ovaisrael inava ya medu laKanaan, Josua okwa li a tuma ko eendadi mbali di ka lave oshilongo osho. Eendadi odo oda li da ya moshilando Jeriko noda kala meumbo lomukainhu wedina Rahab. Rahab okwa li e di yakula meumbo laye noku di amena nonande okwa li e shi shii kutya eendadi odo Ovaisrael. Okwa li a itavela muJehova, Kalunga kOvaisrael, molwaashi okwa li a uda nhumbi a xupifa oshiwana shaYe. Okwa li a anifa eendadi odo kutya nadi mu xupife pamwe noukwaneumbo waye eshi Ovaisrael tave ke uya okukwata ko edu laKanaan.

Eshi Ovaisrael ve uya muKanaan nove uya okukwata ko Jeriko, Jehova okwa li a ngumauna po omakuma oshilando osho pashikumwifilonga. Opo nee etangakwaita laJosua ola ponokela moshilando osho noku shi hanauna po, ndele ova xupifa Rahab noukwaneumbo waye. Nopehe na okwoongaonga, moule ashike womido hamano, Josua okwa li a kwata ko oshitukulwa shinene shEdu lEudaneko. Opo nee edu olo ola li la tukulilwa omapata aIsrael.

Fimbo Josua, omulumenhu oo a longela Kalunga noudiinini, ina fya, okwa li a shiva oshoongalele shinene. Okwa li a dimbulukifa Ovaisrael kombinga yanghee Jehova a li a ungaunga nooxekulululwa noku va ladipika va kale tava longele Jehova. Ndele eshi Josua novakulunhu vOmuisrael vepupi laye va fya po, Ovaisrael ova li va efa okulongela Jehova ndele tava ka longela oikalunga. Oule womido 300 lwaapo, oshiwana osho inashi kala lela tashi dulika keemhango daJehova. Lwopokati opo, momukokomoko weedula odo, Jehova okwa li ha efa ovatondi voshiwana shaye ngaashi Ovafilisti ve shi hepeke. Ndele nande ongaho, ngeenge Ovaisrael va li tava pula ekwafo kuye, okwa li ha nangeke po ovatokolipangeli ve va xupife. Ovatokolipangeli ovo Jehova a li a longifa momukokomoko wefimbo olo ove li 12 kumwe aveshe.

Embo lOvatokolipangeli ola hokolola oiningwanima yopefimbo lovatokolipangeli ovo, okudja ngoo kuOtniel fiyo okuSimson, oo a li e na eenghono de likalekelwa. Embo olo tali hokolola oiningwanima ididilikwedi ola divilika lwoikando oshili ei ya fimana, oyo kutya: Okudulika kuJehova ohaku etele ovanhu omanangeko noupuna, ndele okuhadulika ohaku etele ovanhu oilanduliko ya nyika oshiponga.

— Oshileshwa eshi osha kanghamena kuJosua; Ovatokolipangeli; naLeviticus 18:24, 25.