Jesus okwa li a fika muBetania, a dja kuPerea, omukunda oo u li eekilometa nhatu koushilo waJerusalem. Marta naMaria ova li tava lili omumwaina Lasarus. Vahapu ova li ve uya oku va hekeleka.

Umwe womwaavo va li ve uya oku va hekeleka, okwa li a lombwela Marta kutya Jesus okwa fika, na Marta okwa li a ka shakeneka Jesus. Marta okwa li a lombwela Jesus osho ye nomumwaina va li tava diladila oule womafiku ane, a ti: “Omwene, ngeno opo wa li, ngeno omumwameme ina fya.” Ashike osho inashi hala kutya ka li e na eteelelo. Marta okwa ti: “Ondi shi shii kutya keshe osho to pula Kalunga ote shi ku pe.” (Johannes 11:21, 22) Okwa li e shii kutya natango Jesus ota dulu okukwafela omumwaina.

Jesus okwa nyamukula a ti: “Omumwanyoko ota ka nyumuka.” Marta okwa li a fika pexulifodiladilo kutya Jesus ota ulike kenyumuko olo tali ka ningwa monakwiiwa kombada yedu, eteelelo olo Abraham nosho yo vamwe ve na. Okwa li a ulika kutya okwa itavela kutya osho otashi ka ningwa shili, a ti: “Ondi shi shii kutya ota ka nyumuka mefiku laxuuninwa.” — Johannes 11:23, 24.

Ndele mbela Jesus okwa li ngoo ta dulu oku va kwafela pomhito oyo? Okwa li a dimbulukifa Marta kutya Kalunga okwe mu pa eenghono dokufinda efyo, a ti: “Ou ta itavele nge, nande nafye, ota ka nyumuka. Ndele keshe ou e na omwenyo noku na eitavelo mwaame, ita ka fya fiyo alushe.” — Johannes 11:25, 26.

Jesus ka li a hala kutya ovahongwa vaye itava ka makela nandenande efyo. Naye okwa li ta ka fya, ngaashi a li a lombwela ovayapostoli vaye. (Mateus 16:21; 17:22, 23) Ashike Jesus okwa li ta divilike kutya ngeenge ova kala ve na eitavelo muye otava ka mona omwenyo waalushe. Vahapu otava ka nyumuka va kale nomwenyo fiyo alushe. Ashike ovadiinini ovo tava ka xupa pexulilo lounyuni ou itava ka makela efyo nandenande. Natango, aveshe ovo ve na eitavelo muye otava ka nyumuka.

Ndele mbela Jesus, oo a ti kutya “aame omwenyo nenyumuko,” ota dulu ngoo okunyumuna Lasarus oo a ninga omafiku a fya? Jesus okwa pula Marta a ti: “Mbela osho owe shi itavela?” Marta okwa nyamukula a ti: “Heeno Omwene, onda itavela kutya oove Kristus, Omona waKalunga, oo a li e na okuuya mounyuni.” Molwaashi Marta okwa li e na eitavelo kutya Jesus ota dulu okuninga po sha mefiku olo tuu olo, okwa ya keumbo ndele ta lombwele omumwaina ve li po ovo aveke, a ti: “Omuhongi okwe uya note ku pula.” (Johannes 11:25-28) Opo nee Maria okwa dja mo meumbo, nokwa li a shikulwa kuvamwe, ovo tashi dulika va li tava diladila kutya ota i kombila yaLasarus.

Ashike Maria okwa li a ya kuJesus ndele ta tu eengolo peemhadi daye ta lili, nokwa li a endulula osho sha popiwa komumwaina a ti: “Omwene,  ngeno opo wa li, ngeno omumwameme ina fya.” Eshi Jesus a mona Maria nongudu yovanhu tava lili, osha li she mu kuma komutima ndele ta nyika oluhodi, nokwa li a lila. Osho osha li sha kuma ovanhu ovo va li po. Opo nee vamwe ova pula tava ti: ‘Ngeenge Jesus okwa li a dula okutwikulula omulumenhu oo a li a dalwa omupofi, mbela ngeno ina dula okukelela efyo laau?’ — Johannes 11:32, 37.