Konima yomafiku omulongo eshi Jesus a ya meulu nosho yo eshi ovanhu va tililwa omhepo iyapuki pOpentekoste, osha yandja oumbangi kutya oku li meulu. Natango osha yandja vali oumbangi waasho sha ka ningwa po. Ofimbo omuhongwa Stefanus ina dipawa nomamanya omolwoudiinini waye wokuyandja oundombwedi, okwa popya a ti: “Taleni, ondi wete eulu la yeuluka nOmona womunhu e li ofika kolulyo laKalunga.” — Oilonga 7:56.

Ofimbo Jesus a li naXe meulu, okwa li a teelela a wanifilwe eudaneko lokondadalunde olo la xunganekwa mEendjovo daKalunga. David okwa nwefwa mo a shange ta ti: ‘Omwene okwa tya kOmwene wange [Jesus]: “Kala omutumba kolulyo lange, fiyo handi ningi ovatondi voye oshilyatelo shokeemhadi doye.”’ Ngeenge efimbo laye lokuteelela ola puko, ota i a ka ‘pangele mokati kovatondi vaye.’ (Epsalme 110:1, 2) Ndele mbela Jesus ota kala ta ningi shike meulu ofimbo a teelela a katukile onghatu ovatondi vaye?

Eongalo lopaKriste ola li la totwa po pOpentekoste 33 O.P. Jesus okwa hovela okupangela ovahongwa vaye ovo va vaekwa nomhepo iyapuki okudja meulu. (Ovakolossi 1:13) Okwe va wilika moilonga yavo yokuudifa noku va longekidila onghandangala oyo tava ka dana monakwiiwa. Otava ka dana onghandangala ilipi? Ovo tava ka kala ovadiinini fiyo omefyo otava ka nyumunwa ndele tava ka pangela pamwe naJesus ve li eehamba mOuhamba.

Naumwe womuvo oo ta ka kala womeehamba odo monakwiiwa noku li oshihopaenenwa sha denga mbada oSaul, oo a shiivika nawa nedina lOshiroma, Paulus. Okwa li Omujuda oo a li e na ouladi wOmhango yaKalunga, ashike okwa li a pukifwa kovawiliki vomalongelokalunga Ovajuda nokwa li a yambidida okudipawa kwaStefanus nomamanya. Eshi Saul ‘a ningila ovahongwa omatilifo nokwa li a halelela oku va dipaa,’ okwa li a ya kuDamaskus. Okwa li a pewa epitikilo komupristeri munene Kajafas opo a ka kwate po ovahongwa vaJesus noku va eta kuJerusalem. (Oilonga 7:58; 9:1) Ashike ofimbo Saul a li mondjila, okwa li a twiywa kouyelele wa twa wa dja meulu, ndele ta wile pedu.

Ondaka ya dja meulu oya ingida tai ti: “Saul, Saul, omolwashike to hepeke nge?” Saul okwa pula a ti: “Omufimanekwa, oove lyelye?” Ondaka  oya nyamukula ya ti: “Aame Jesus ou to hepeke.” — Oilonga 9:4, 5.

Jesus okwa li a lombwela Saul a ye kuDamaskus nokuteelela e mu pe omalombwelo a wedwa po, ashike okwa li e na okutwalwa koshilando osho molwaashi okwa li a twikifwa kouyelele oo we mu twiya. Memoniko vali limwe, Jesus okwa li e lihololela Ananias, umwe womovahongwa vaye ovo va li hava di muDamaskus. Jesus okwa li a lombwela Ananias a ye keumbo lonhumba a ka popye naSaul. Ananias okwa li ta ongaonga okuya ko, ashike Jesus okwe mu shilipaleka a ti: “Omulumenhu oo onde mu hoolola a udifile oiwana, eehamba nOvaisrael kombinga yange.” Saul okwa li a twikuluka, naashi a li muDamaskus okwa li a ‘hovela okuudifa kombinga yaJesus kutya Omona waKalunga.’ — Oilonga 9:15, 20.

Omolwekwafo laJesus, Paulus nosho yo ovaudifi vamwe vevaengeli ova li va twikila noilonga yokuudifa oyo Jesus a hovela. Kalunga okwa li e va nangeka noupuna opo va dule okupondola. Omido 25 lwaapo konima eshi Jesus e mu lihololela mondjila yokuya kuDamaskus, Paulus okwa shanga kutya onghundana iwa oya “udifilwa oishitwa aishe kombada yedu.” — Ovakolossi 1:23.

Konima yomido donhumba, Jesus okwa pa omuyapostoli waye omuholike, Johannes, omamoniko onhumba, oo taa hangwa membo lEhololo. Okupitila momamoniko oo, Johannes okwa li a mona nghee Jesus ta ka aluka e na eenghono dOuhamba. (Johannes 21:22) “Omhepo iyapuki oya ulikila [Johannes] oinima oyo tai ka ningwa mefiku lOmwene.” (Ehololo 1:10) Oinima oyo otai ka ningwa naini?

Exunganeko lOmbiibeli ola ulika kutya ‘efiku lOmwene’ ola hovela mo 1914. Oita yOtete yOunyuni oya li ya hovela momudo oo. Okudja momudo oo oinima ngaashi, oita, omikifi, ondjala, omakakamo edu nosho yo imwe oya hapupala noya wanifa po oshitukulwa shinene ‘shedidiliko’ olo Jesus a pa ovayapostoli vaye li na sha ‘nokukala po kwaye’ nosho yo ‘nexulilo.’ (Mateus 24:3, 7, 8, 14) Kunena, oilonga yokuudifa onghundana iwa yOuhamba otai longwa mounyuni aushe, ndele hamOuhamba ashike waRoma.

Johannes okwa li a nwefwa mo a shange kutya osho osha hala okutya ngahelipi, a ti: “Tala, Kalunga ketu okwa etela ovanhu exupifo, eenghono daye oda hololwa nOuhamba waye owa dikwa po.” (Ehololo 12:10) Ouhamba waKalunga womeulu, oo Jesus a kala ta udifa kombinga yao, ou li oshinima sholela.

Osho oshi li onghundana iwa kovahongwa aveshe vaJesus ovadiinini. Otava dulu okudilonga keendjovo daJohannes, odo tadi ti: “Onghee hano, eulu, nyakukwa nosho yo ovo mu li mo. Ndele woo edu nefuta molwaashi Ondiaboli oye uya kunye noya handuka neenghono osheshi oi shi shii kutya oi na ko efimbo lixupi.” — Ehololo 12:12.

Jesus ke li vali omutumba kolulyo laXe a teelela. Ota pangele e li Ohamba, nota ka hanauna po mafiku ovatondi vaye aveshe. (Ovaheberi 10:12, 13) Omanangeko noupuna elipi twa teelela oku ka mona?