Noa novaneumbo laye noinamwenyo ova li va ya monguluwato. Opo nee Jehova okwa li a idila omuvelo, nodula oya li ya hovela okuloka. Oya li ya loka neenghono, ndele onguluwato tai kaama kombada yomeva. Lwanima, edu alishe ola li la tuvikilwa komeva. Ovakolokoshi aveshe ovo va li pondje yonguluwato ova fya omeva, ashike Noa novaneumbo laye ova xupa. Kava li tuu va hafa eshi va dulika kuJehova!

Odula oya li ya loka omafiku 40, omutenya noufiku, ndele tai sheka. Omeva okwa li a enda taa pwiinine kanini nakanini. Lwanima, onguluwato oya ka kanghama keemhunda. Ashike Noa novaneumbo laye kava li tava dulu okudja mo monguluwato pefimbo opo molwaashi omeva okwa li mahapu natango.

Omeva okwa li a enda taa pwiinine kanini nakanini. Noa novaneumbo laye ova kala monguluwato oule wodula nasha. Opo nee Jehova okwa li e va lombwela va dje mo monguluwato nova ye mounyuni oo wa li tau monika mupe. Ova li va pandula unene eshi Jehova e va xupifa, nove shi ulika moku mu ningila exwikiloyambo.

Jehova okwa li a hokwa exwikiloyambo olo, nokwa li a udaneka kutya ita ka hanauna po vali oinima aishe oyo i li kombada yedu neyelu. Okwa li a tula outa wodula keulu u li edidiliko leudaneko olo. Mbela owa mona nale outa wodula?

Opo nee Jehova okwa li a lombwela Noa novaneumbo laye va dalafane nova yadife edu.