Mepingafano novanhu vakwao, Jesus okwa kala meulu e li omunhu wopamhepo ofimbo ina dalwa e li omunhu wokombada yedu. (Johannes 8:23) Jesus oye a shitwa tete kuKalunga nokwa kwafela yo mokushita oinima ikwao aishe. Jesus oye aeke a shitwa kuJehova odikilila nomolwaasho ha ifanwa Omona waKalunga ‘Ewifa.’ (Johannes 1:14) Okwa kala yo ta longo e li Omupopikalelipo waKalunga nomolwaasho ha ifanwa ‘ondjovo.’ — Lesha Omayeletumbulo 8:22, 23, 30; Ovakolossi 1:15, 16.

Kalunga okwa li a tuma Omona waye kombada yedu okudja meulu eshi a lundululila omwenyo waye moshidalelo shokakadona Okajuda kedina Maria. Onghee hano, Jesus ka li e na xe wopanhu. (Lukas 1:30-35) Jesus okwa li e uya kombada yedu opo (1) a honge ovanhu oshili kombinga yaKalunga, (2) e va tulile po oshihopaenenwa shi na sha nanghee ve na okulonga ehalo laKalunga nokuli nongeenge va taalela omaupyakadi nosho yo (3) okuyandja omwenyo waye wa wanenena u ninge “oikulila.” — Lesha Mateus 20:28.

Ekulilo olo ofuto oyo hai yandjwa okumangulula omunhu meemhango defyo. (Exodus 21:29, 30) Kalunga ka li a lalakanena ovanhu va kale hava fi nohava kulupa. Osho otu shi shii ngahelipi? Kalunga okwa li a lombwela omunhu wotete, Adam, a ti kutya ngeenge okwa nyono, ota ka fya. Ashike ngeno Adam ka nyonene, ngeno ina fya nandenande. (Genesis 2:16, 17; 5:5) Ombibeli oya ti kutya efyo “ole uya” movanhu aveshe omolwokunyona kwaAdam. Oludalo laAdam alishe ola fyuulula oulunde, nondjabi youlunde oyo efyo. Onghee hano,  otwa pumbwa ekulilo opo tuha mone ondjabi youlunde oo twa fyuulula kuAdam. — Lesha Ovaroma 5:12; 6:23.

Olyelye a li ta dulu oku tu kulila mefyo? Ngeenge omunhu a fi, oha futile po ashike omatimba aye mwene. Kape na nande omunhu ina wanenena ta dulu okukulila ovanhu vakwao. — Lesha Epsalme 49:8-10.

Mepingafano nafye, Jesus okwa li omunhu a wanenena. Nomolwaasho Jesus okwa li a fya omolwomatimba ovanhu, ndele hamolwomatimba aye mwene shaashi ye ina nyona sha. Eshi Kalunga a li a tuma Omona waye e tu file osha li euliko lohole yaYe inenenene yokuhola ovanhu. Jesus naye okwa li a ulika kutya oku tu hole eshi a dulika kuXe nokwa yandja omwenyo waye omolwomatimba etu. — Lesha Johannes 3:16; Ovaroma 5:18, 19.

Tala okavidio Omolwashike Jesus a fya?

Eshi Jesus a li kombada yedu, okwa li a velula ovanaudu, a nyumuna ovafi nokwa xupifa ovanhu moiponga. Kungaho, okwa li a ulika osho ta ka ningila ovanhu aveshe ovaduliki monakwiiwa. (Mateus 15:30, 31; Johannes 5:28) Konima eshi Jesus a fya, Kalunga okwa li e mu nyumuna e li omunhu wopamhepo. (1 Petrus 3:18) Opo nee, Jesus okwa ka kala omutumba kolulyo laKalunga a teelela a pewe eenghonopangelo dokupangela edu alishe e li Ohamba. (Ovaheberi 10:12, 13) Paife Jesus ota pangele meulu e li Ohamba novashikuli vaye kombada yedu otava udifa onghundana iwa mounyuni aushe. — Lesha Daniel 7:13, 14; Mateus 24:14.

Mafiku, Jesus ota ka longifa eenghonopangelo daye e li Ohamba opo a xulife po okumona oixuna akushe nosho yo ovo have ku etifa. Ovanhu aveshe ovo ve na eitavelo tali longo muJesus nohava dulika kuye otava ka kala nomwenyo moparadisa kombada yedu. — Lesha Epsalme 37:9-11.