OSHILESHWA 3
Mbela onghundana iwa oya dja ngoo shili kuKalunga?
1. Olyelye Omushangi wOmbibeli?
Onghundana iwa oyo kutya ovanhu otava ka kala nomwenyo fiyo alushe kombada yedu oya shangwa mOmbibeli. (Epsalme 37:29, NW) Ombibeli oya fikama po momambo manini e li 66. Oya shangwa kovalumenhu ovadiinini 40 lwaapo. Omambo atano Ombibeli opehovelo okwa shangwa kuMoses omido 3 500 lwaapo da ka lupuka. Embo laxuuninwa lOmbibeli ola shangwa komuyapostoli Johannes omido da konda pe 1 900 da pita. Mbela ovashangi vOmbibeli ova shanga omadiladilo alyelye? Kalunga oye a li a wilika ovashangi vOmbibeli okupitila momhepo yaye iyapuki. (2 Samuel 23:2) Ova shanga omadiladilo aKalunga, ndele kae fi avo vene. Onghee hano, Jehova oye Omushangi wOmbibeli. — Lesha 2 Timoteus 3:16; 2 Petrus 1:20, 21.
Tala okavidio Olyelye omushangi wOmbiibeli?
2. Ongahelipi hatu dulu okukala noushili kutya Ombibeli oi li paushili?
Otu shi shii kutya Ombibeli oya dja kuKalunga molwaashi oya xunganeka oshili i na sha nonakwiiwa. Kape na omunhu ta dulu okuxunganeka kombinga yonakwiiwa. (Josua 23:14) Kalunga Omunaenghono adishe oye aeke ta dulu okushiiva onakwiiwa yovanhu. — Lesha Jesaja 42:9; 46:10.
Ombibeli embo le likalekelwa, naasho osho shi na okukala ngaho molwaashi oya dja kuKalunga. Opa andjakanifwa Eembibeli omabiliyona momalaka omafele. Nonande oya dja nale, otai tu kumwe nounongononi. Shimwe vali, nonande ovashangi vayo ove li 40, ova shanga oinima tai tu kumwe. * Ombibeli oya ulika kutya Kalunga kashili omunahole noi na eenghono odo tadi dulu okulundulula omunhu a dule okukala nonghalamwenyo i li xwepo. Eeshili adishe odo oda kwafela ovanhu omamiliyona va tomhwe kutya Ombibeli Ondjovo yaKalunga shili. — Lesha 1 Ovatessaloniki 2:13.
Tala okavidio Ongahelipi hatu dulu okukala noushili kutya Ombibeli oi li paushili?
3. Ombibeli otai hongo naanaa shike?
Ombibeli otai hongo kutya Kalunga okwa lalakanena okuwanifa po elalakano laye lopehovelo li na sha novanhu. Omishangwa oda yelifa nghee ovanhu votete va kanifa oufembanghenda wokukala meduparadisa nonghee oparadisa tai ka etululwa monakwiiwa. — Lesha Ehololo 21:4, 5.
MOmbibeli omu na eemhango, omafinamhango nosho yo omayele. Kakele kaasho, omu na ondjokonona i na sha nanghee Kalunga a li a ungaunga novanhu monakudiwa, oyo tai holola omaukwatya aye. Onghee hano, Ombibeli otai dulu oku tu kwafela tu shiive Kalunga. Oya yelifa yo kombinga yanghee hatu dulu okuninga ookaume kaye. — Lesha Epsalme 19:8, 12; Jakob 2:23; 4:8.
4. Oshike tashi dulu oku ku kwafela u ude ko Ombibeli?
Oshishangomwa eshi otashi ke ku kwafela u ude ko nawa Ombibeli molwaashi otashi tu hongo monghedi ya faafana naai Jesus a li ha longifa. Jesus okwa li ha tofa mOmbibeli lwoikando noku i fatululila ovanhu opo va dule “okushiiva omishangwa.” — Lesha Lukas 24:27, 45.
Kape na lela oinima ihokwifa tai dulu okuyelekanifwa nonghundana iwa oyo ya dja kuKalunga. Ndele nande ongaho, ovanhu vamwe inava hala okupwilikina konghundana iwa, navamwe ohai va handukifa nokuli. Ashike osho inashi ku shololifa, molwaashi etimaumbwile loye li na sha noku ka mona omwenyo waalushe ole likolelela keshiivo loye lokushiiva Kalunga. — Lesha Johannes 17:3.
^ par. 3 Tala oshishangomwa shedina A Book for All People.
