باقىتقا باستار جول
سۇيىسپەنشىلىك
ادامدار سۇيىسپەنشىلىككە ٴزارۋ. ونسىز نەكەنىڭ دە، وتباسىنىڭ دا، دوستىقتىڭ دا ەش ٴمانى جوق. ادامنىڭ جان ساۋلىعى مەن باقىتى وسى قاسيەتكە تاۋەلدى.
بىراق ٴبىز اڭگىمە ەتىپ وتىرعان سۇيىسپەنشىلىك — ەر ادام مەن ايەل ادامنىڭ اراسىنداعى رومانتيكالىق سەزىم ەمەس. ول — شىن جۇرەكتەن باسقا ادامنىڭ قامىن ويلاۋعا، ٴتىپتى ونىڭ مۇددەسىن وزىنىكىنەن جوعارى قويۋعا تالپىندىراتىن اسقاق قاسيەت. بۇل سۇيىسپەنشىلىك قۇداي ورناتقان قاعيدالارعا باعىنا وتىرىپ تانىتىلادى. دەسە دە وعان جىلۋلىق سياقتى سەزىمدەر دە ٴتان.
كيەلى كىتاپتا سۇيىسپەنشىلىكتىڭ كەلەسىدەي ادەمى سيپاتتاماسى بار: «سۇيىسپەنشىلىك شىدامدى دا مەيىرىمدى؛ سۇيىسپەنشىلىك قىزعانبايدى، ماقتانبايدى، مەنمەنسىنبەيدى؛ ول ادەپسىز ەمەس، ٶزىمشىل دە، اشۋشاڭ دا ەمەس، كەك تە ساقتامايدى؛ سۇيىسپەنشىلىك ادىلەتسىزدىككە ەمەس، شىندىققا قۋانادى؛ ول بارىنە توزەدى... ەش ٷمىتىن ۇزبەيدى، بارىنە توتەپ بەرەدى. سۇيىسپەنشىلىك ەش سارقىلمايدى» (قورىنتتىقتارعا 1-حات 13:4—8).
مۇنداي سۇيىسپەنشىلىك ۋاقىت وتكەن سايىن كۇشەيە تۇسەدى. ول شىدامدىلىقپەن، مەيىرىمدىلىكپەن ٵرى كەشىرىمدىلىكپەن تىعىز بايلانىستى بولعاندىقتان، «ادامداردى تولىقتاي بىرىكتىرەدى» (قولوستىقتارعا 3:14). وسىنداي سۇيىسپەنشىلىك بار ورتادا ادامدار كەمشىلىكتەرىنە قاراماستان، باقىتتى ٵرى بەيقام ٶمىر كەشە الادى. بۇل اسىرەسە نەكە وداعىنا قاتىستى.
«ادامداردى تولىقتاي بىرىكتىرەدى»
يسا پايعامبار نەكە وداعى تۋرالى وتە ماڭىزدى قاعيدالاردى ايتقان. ولاردىڭ ٴبىرى مىناۋ: «ەركەك اكە-شەشەسىن قالدىرىپ، ايەلىنە قوسىلادى، ٴسۇيتىپ، ەكەۋى ٴبىرتۇتاس بولادى... قۇداي قوسقاندى ادام بالاسى اجىراتپاسىن!» (ماتاي 19:5، 6) وسى سوزدەردە، كەم دەگەندە، ەكى قاعيدا بار.
ەكەۋى ٴبىرتۇتاس بولادى. ەكى ادامدى تىعىز بايلانىستىراتىن بىردەن-ٴبىر وداق — نەكە. ال سۇيىسپەنشىلىك ولاردى وزگە ايەلمەن نە ەركەكپەن «ٴبىرتۇتاس» بولۋدان، ياعني وپاسىزدىق جاساۋدان ساقتايدى (قورىنتتىقتارعا 1-حات 6:16؛ ەۆرەيلەرگە 13:4). وپاسىزدىق سەنىمنەن ايىرىپ، نەكەنىڭ شىرقىن بۇزادى. ال بالالار بۇدان اۋىر ەموسيالىق سوققى الىپ، وزدەرىن الداپ كەتكەندەي، ەشكىمگە كەرەك ەمەستەي قورعانسىز سەزىنەدى.
ەكەۋىن قوسقان — قۇداي. نەكە — قاسيەتتى وداق. وسى جايتتى تۇسىنەتىن ەرلى-زايىپتىلار نەكەلەرىن بەرىك ەتۋگە كۇش سالىپ وتىرادى. قيىندىقتار تۋىنداعاندا، ولار ايىرىلىسۋدىڭ امالىن ىزدەمەيدى، ويتكەنى سۇيىسپەنشىلىكتەرى مىقتى ٵرى ەش ورتايمايدى. وسىنداي سۇيىسپەنشىلىكتىڭ ارقاسىندا ەرلى-زايىپتىلار ٶمىردىڭ ىستىق-سۋىعىندا بىرلىك پەن تىنىشتىق ساقتاي وتىرىپ، بارىنە توزە الادى.
اتا-اناسى ٴبىر-ٴبىرىن رياسىز سۇيەتىن وتباسىندا ٶسۋ — كەز كەلگەن بالا ٷشىن زور باقىت. 20 جاسار دجەسيكا بىلاي دەيدى: «مەنىڭ اكە-شەشەم ٴبىر-ٴبىرىن شىن جاقسى كورەدى، ٵرى قۇرمەتتەيدى. انام اكەمە قالاي قۇرمەت تانىتاتىنىن كورگەن كەزدە، مەن دە ول سياقتى بولعىم كەلىپ كەتەدى».
سۇيىسپەنشىلىك قۇدايدىڭ باستى قاسيەتى بولعاندىقتان، كيەلى كىتاپتا: «قۇداي — سۇيىسپەنشىلىك»،— دەلىنگەن (جوحاننىڭ 1-حاتى 4:8). وندا ەحوبانىڭ «باقىتتى قۇداي» دەپ تە اتالۋى بەكەر ەمەس (تىموتەگە 1-حات 1:11). ٴبىز دە جاراتۋشىمىزدىڭ قاسيەتتەرىن، اسىرەسە سۇيىسپەنشىلىگىن، ۇلگى ەتۋگە تىرىسساق، باقىتتى بولامىز. كيەلى كىتاپ: «سۇيىكتى بالالارى رەتىندە قۇدايعا ەلىكتەڭدەر... سۇيىسپەنشىلىك جولىمەن جۇرىڭدەر»،— دەپ شاقىرادى (ەفەستىكتەرگە 5:1، 2).
قىزىقتى بولار مالىمەتتەر
نەكە جانە وتباسى
نەكە باقىتتى بولۋ ٷشىن: نازىك سەزىمدەر تانىتۋ
جۇمىستىڭ، سترەستىڭ جانە ومىردەگى باسقا دا قيىندىقتاردىڭ كەسىرىنەن ەر-زايىپتىنىڭ اراسى سۋىپ كەتۋى مۇمكىن. مۇندايدا ماحابباتتى قالاي جانداندىرۋعا بولادى؟
