كيەلى كىتاپقا نەگىزدەپ اڭگىمەلەسۋ
قۇداي پاتشالىعى قاشان بيلىك ەتە باستادى؟ (1-ٴبولىم)
تومەندە ەحوبا كۋاگەرلەرى ادەتتە ادامدارمەن قالاي اڭگىمەلەسەتىنىنىڭ ۇلگىسى كەلتىرىلگەن. ەحوبا كۋاگەرىنىڭ ەسىمى ساكەن، ال ٷي يەسىنىڭ ەسىمى جاقىپ دەلىك.
تۇسىنىكتى «ىزدەي بەرىڭدەر»
ساكەن: جاقىپ، سىزبەن كيەلى كىتاپ تاقىرىپتارىن تالقىلاۋ وتە قىزىقتى a. وتكەن جولى قۇداي پاتشالىعى جايلى ٴسوز قوزعاعان ەدىك. سوندا ٴسىز قۇداي پاتشالىعى بيلىگىن 1914-جىلى باستاعانىن ەحوبا كۋاگەرلەرى قايدان بىلەدى دەپ سۇراعان ەدىڭىز.
جاقىپ: ٴيا، مەن جۋرنالدارىڭىزدان قۇداي پاتشالىعى 1914-جىلى بيلىك ەتە باستادى دەگەندى وقىدىم. بۇل ماعان قىزىق بولدى. سىزدەر تەك كيەلى كىتاپتا جازىلعانعا سەنەسىزدەر عوي.
ساكەن: ٴدال سولاي.
جاقىپ: مەن كيەلى كىتاپتى تۇگەل وقىپ شىققانمىن. الايدا وندا 1914-جىل جايلى ايتىلعان جەرى ەسىمدە جوق ەكەن. سودان كيەلى كىتاپتىڭ ەلەكتروندى تۇرىنەن «1914» سانىن تەرىپ، ىزدەپ كورىپ ەدىم، ونداي سان جوق بولىپ شىقتى.
ساكەن: جاقىپ، ٴسىزدى ەكى ٸسىڭىز ٷشىن ماقتاعىم كەلىپ تۇر. ٴبىرىنشىسى، كيەلى كىتاپتى تولىق وقىپ شىققانىڭىز ٷشىن. قۇداي ٴسوزىن شىنىمەن جاقسى كورەدى ەكەنسىز.
جاقىپ: بۇل راس. دۇنيەدە ودان ارتىق كىتاپ جوق دەپ ەسەپتەيمىن.
ساكەن: كەلىسەمىن. تۋىنداعان سۇراقتىڭ جاۋابىن كيەلى كىتاپتىڭ وزىنەن تابۋعا تىرىسقانىڭىز ٷشىن دە ماقتاعىم كەلەدى. كيەلى كىتاپتىڭ ٶزى دە ٴبىزدى تۇسىنىكتى «ىزدەي بەرۋگە» شاقىرادى b. ىزدەنگەنىڭىز وتە دۇرىس.
جاقىپ: راقمەت! بىلگىم كەلەتىندىكتەن ىزدەيمىن عوي. ەكەۋىمىز زەرتتەپ جۇرگەن كىتاپتان 1914-جىلعا قاتىستى ٴبىراز مالىمەت تاپتىم. ول جەردە ٴبىر پاتشانىڭ كورگەن ٴتۇسى جايلى ايتىلعان. تۇسىندە پاتشا ۇلكەن اعاشتىڭ شابىلىپ، كەيىن قايتادان وسكەنىن كورگەن.
ساكەن: ٴيا، بۇل دانيال پايعامبار كىتابىنىڭ 4-تاراۋىندا جازىلعان وقيعا عوي. ٴتۇستى كورگەن بابىلدىڭ پاتشاسى نابۋحودونوسور ەدى.
جاقىپ: سول كىسى عوي دەيمىن. پايعامبارلىقتى بىرنەشە رەت وقىپ شىقتىم. شىنى كەرەك، ونىڭ قۇداي پاتشالىعىمەن نە 1914-جىلمەن ەشقانداي بايلانىسىن كورمەدىم.
ساكەن: جاقىپ، دانيال پايعامبار قۇداي رۋحىنىڭ جەتەلەۋىمەن جازعان سول سوزدەردى ٶزى دە تولىق تۇسىنبەگەن!
جاقىپ: راس پا؟
ساكەن: راس. مىنە، دانيال 12:8 دە ول بىلاي دەگەن: «مەن ونىڭ ايتقانىن ەستىسەم دە، تۇسىنبەدىم».
جاقىپ: تۇسىنبەگەن جالعىز مەن ەمەس ەكەنمىن. جەڭىلدەپ قالدىم عوي.
ساكەن: سول ۋاقىت دانيال كىتابىنداعى پايعامبارلىقتاردى قۇدايدىڭ ادامزاتقا تولىعىمەن اشاتىن كەزى ەمەس ەدى. سوندىقتان دانيال ولاردى تۇسىنبەدى. الايدا بۇگىندە ٴبىز بۇل پايعامبارلىقتاردى تولىعىمەن تۇسىنە الامىز.
جاقىپ: بۇلاي دەۋىڭىزگە قانداي نەگىز بار؟
ساكەن: وسى تاراۋدىڭ كەلەسى تارماعىنا نازار اۋدارىڭىزشى. دانيال 12:9 دا بىلاي دەلىنگەن: «بۇل حابار وسى زاماننىڭ سوڭىنا دەيىن جابىلىپ، ساقتالىپ ٵرى مورلەنىپ بەكىتىلگەن». دەمەك، بۇل پايعامبارلىقتىڭ ٴمانى الدەقايدا كەيىن، ياعني «وسى زاماننىڭ سوڭىندا» اشىلۋ كەرەك بولعان. قازىر ٴبىز سول ۋاقىتتا ٶمىر ٴسۇرىپ جاتقانىمىزعا دالەل كوپ. مۇنى جاقىندا كيەلى كىتاپ زەرتتەۋلەردىڭ بىرىندە جاقسىلاپ قاراستىرامىز c.
جاقىپ: قازىر ماعان دانيالدىڭ وسى پايعامبارلىعىن ٴتۇسىندىرىپ بەرە الاسىز با؟
ساكەن: تىرىسىپ كورەيىن.
نابۋحودونوسوردىڭ ٴتۇسى
ساكەن: الدىمەن نابۋحودونوسور پاتشانىڭ ٴتۇسىن قىسقاشا ايتىپ بەرەيىن. كەيىن ونىڭ ٴمانىن قاراستىرامىز.
جاقىپ: جاقسى.
ساكەن: پاتشا تۇسىندە باسى كوككە دەيىن جەتكەن الىپ ٴبىر اعاشتى كوردى. سوسىن قۇدايدىڭ حابارشىسى اعاشتى كەسىپ، بىراق ونىڭ ٴتۇبىرى مەن تامىرىن قالدىرۋدى بۇيىرعانىن ەستىدى. بۇدان سوڭ «جەتى كەزەڭ» ٶتىپ، اعاش قايتادان وسە باستادى d. بۇل پايعامبارلىق ەڭ الدىمەن نابۋحودونوسور پاتشاعا قاتىستى ەدى. ول توبەسى كوككە جەتكەن اعاش سياقتى وتە بەدەلدى پاتشا بولسا دا، «جەتى كەزەڭگە» شابىلدى. مۇنىڭ قالاي بولعانى ەسىڭىزدە مە؟
جاقىپ: ەسىمدە جوق ەكەن.
ساكەن: كيەلى كىتاپتا پاتشانىڭ جەتى جىل بويى ەسى اۋىسىپ جۇرگەنى جازىلعان. سول ۋاقىت ارالىعىندا ول پاتشا رەتىندە بيلىك ەتە المادى. جەتى كەزەڭ وتكەندە، ونىڭ ەسى كىرىپ، قايتادان بيلىككە كەلدى e.
جاقىپ: ٴيا، مۇنى ٴتۇسىندىم. بىراق مۇنىڭ قۇداي پاتشالىعىنا جانە 1914-جىلعا قانداي قاتىسى بار؟
ساكەن: قىسقاسىن ايتقاندا، بۇل پايعامبارلىق ەكى رەت ورىندالماق ەدى. ٴبىرىنشىسى، نابۋحودونوسور پاتشانىڭ بيلىگى ۋاقىتشا توقتاتىلعاندا، ال ەكىنشىسى، قۇداي بيلىگى ۋاقىتشا توقتاعاندا. پايعامبارلىقتىڭ ەكىنشى ورىندالۋى قۇداي پاتشالىعىنا قاتىستى بولاتىن.
جاقىپ: قۇداي پاتشالىعىنا قاتىستى ەكەنىن قايدان بىلەسىزدەر؟
ساكەن: ەڭ الدىمەن، مۇنى پايعامبارلىقتىڭ وزىنەن كورۋگە بولادى. دانيال 4:17 دە: «پەندەلەردىڭ پاتشالىقتارىنا اللا تاعالانىڭ ۇستەمدىك جۇرگىزەتىنىن بارلىق ٴتىرى جان اتاۋلى ۇعاتىن بولادى. ول بيلىكتى ٶزى قالاعان كىسىسىنە تابىستايدى»،— دەپ جازىلعان. مۇندا «پەندەلەردىڭ پاتشالىقتارى» دەلىنگەنىن بايقادىڭىز با؟
جاقىپ: ٴيا، «پەندەلەردىڭ پاتشالىقتارىنا اللا تاعالا ۇستەمدىك جۇرگىزەدى» دەپتى عوي.
ساكەن: ٴدال سولاي. دەمەك، بۇل پايعامبارلىق تەك نابۋحودونوسورعا عانا قاتىستى ەمەس. ول «پەندەلەردىڭ پاتشالىقتارىنا ۇستەمدىك جۇرگىزەتىن» قۇدايدىڭ بيلىگىنە دە قاتىستى. وسى پايعامبارلىقتىڭ ٴمانماتىنى دە وسى ويدى راستايدى.
جاقىپ: قالايشا؟
كىتاپتىڭ باستى تاقىرىبى
ساكەن: دانيال كىتابىن وقي وتىرىپ، ٴجيى ٴسوز بولاتىن ٴبىر باستى تاقىرىپتى بايقاۋعا بولادى. بۇل يسانىڭ قولىنا بەرىلگەن قۇداي پاتشالىعىنىڭ ورناۋى جايلى. مىسالى، دانيال 2:44. وقىپ كورەسىز بە؟
جاقىپ: جارايدى. «سول پاتشالاردىڭ زامانىندا كوكتەگى قۇداي ٴبىر پاتشالىقتى ورناتادى. سول پاتشالىق ەشقاشان كۇيرەمەيدى، قۇداي بوتەن حالىقتىڭ ونى جاۋلاپ الۋىنا دا جول بەرمەيدى. قايتا، وسى پاتشالىق باسقا بارلىق پاتشالىقتاردى ٴبىرجولا قيراتىپ، ٶزى ماڭگى بەرىك تۇرادى».
ساكەن: راقمەت. وسى تارماقتىڭ قۇداي پاتشالىعى جايلى ەكەنىن بايقادىڭىز با؟
جاقىپ: ىم-م-م. سەنىمدى ەمەسپىن.
ساكەن: قاراڭىزشى، مۇندا پاتشالىقتىڭ «ماڭگى تۇراتىنى» ايتىلعان. قۇداي پاتشالىعىنىڭ ماڭگى تۇراتىنى انىق. ال ادام پاتشالىقتارى جايلى وسىلاي دەي الامىز با؟
جاقىپ: جوق، ولاي دەۋگە كەلمەس.
ساكەن: دانيال كىتابىندا قۇداي پاتشالىعى جايلى تاعى ٴبىر پايعامبارلىق بار. ول دانيال 7:13، 14 تە جازىلعان. وندا: «وعان قۇدىرەت، سالتاناتتى ۇلىلىق جانە پاتشالىق بيلىك تاپسىرىلدى. بارلىق حالىقتار، ۇلتتار جانە تىلدەردىڭ ادامدارى وعان بوي ۇسىنىپ قۇرمەت كورسەتۋگە ٴتيىس بولدى. ول ەشقاشان وشپەيتىن ماڭگىلىك بيلىك قۇرادى، ونىڭ پاتشالىعى ەش ۋاقىتتا جويىلمايدى!»— دەلىنگەن. وسى پايعامبارلىقتا سىزگە نە نارسە تانىس بولدى؟
جاقىپ: بۇل دا پاتشالىق جايلى ەكەن.
ساكەن: دۇرىس ايتاسىز. بىراق بۇل قاراپايىم پاتشالىق ەمەس. بۇل پاتشالىق «بارلىق حالىقتار، ۇلتتار جانە تىلدەردىڭ ادامدارىنا» بيلىك جۇرگىزەتىن بولادى، ياعني ونىڭ بيلىگى دۇنيەجۇزىن قامتيدى.
جاقىپ: بۇرىن مۇنى تۇسىنبەگەن ەكەنمىن. بۇل ايتقانىڭىزدىڭ جانى بار.
ساكەن: سونداي-اق پايعامبارلىقتا تاعى نە دەلىنگەنىنە كوڭىل ٴبولىڭىزشى: «ول ەشقاشان وشپەيتىن ماڭگىلىك بيلىك قۇرادى، ونىڭ پاتشالىعى ەش ۋاقىتتا جويىلمايدى!» بۇل سوزدەر دانيال 2:44 تەگى سوزدەرگە ۇقسايدى ەمەس پە؟
جاقىپ: ٴيا، سولاي.
ساكەن: ەندى وسى ايتقاندارىمىزدى قىسقاشا قايتالاپ كورەيىك. دانيال كىتابىنىڭ 4-تاراۋىنان «پەندەلەردىڭ پاتشالىقتارىنا اللا تاعالا ۇستەمدىك جۇرگىزەتىنىن» بىلدىك. وسى سوزدەردىڭ ٶزى پايعامبارلىقتىڭ نابۋحودونوسورعا عانا قاتىستى ەمەس ەكەنىن، الدەقايدا كەڭ كولەمدە ورىندالاتىنىن كورسەتەدى. دانيال كىتابىندا يساعا بەرىلگەن قۇداي پاتشالىعىنىڭ ورناۋى جايلى باسقا دا پايعامبارلىقتار بار ەكەنىن بىلدىك. ەندەشە، 4-تاراۋداعى پايعامبارلىق قۇداي پاتشالىعىنا قاتىستى دەۋ اقىلعا قونىمدى ما، قالاي ويلايسىز؟
جاقىپ: ٴيا، سولاي سياقتى. بىراق ٵلى دە مۇنىڭ 1914-جىلمەن بايلانىسىن كورمەي تۇرمىن.
«جەتى كەزەڭ ٶتسىن»
ساكەن: ەندەشە، نابۋحودونوسور پاتشاعا ورالايىق. پايعامبارلىقتىڭ ٴبىرىنشى ورىندالۋىندا پاتشا ۇلكەن اعاشتى ٴبىلدىردى. اعاشتىڭ شابىلىپ، جەتى كەزەڭ بويى وسپەي جاتقانى پاتشانىڭ بيلىگى توقتاپ، بەلگىلى ٴبىر ۋاقىت ەسى اۋىسىپ جۇرگەنىن بەينەلەدى. جەتى كەزەڭ بىتكەندە، نابۋحودونوسوردىڭ ەسى كىرىپ، ول قايتادان بيلىك قۇرا باستادى. پايعامبارلىقتىڭ ەكىنشى ورىندالۋىندا قۇداي بيلىگى بەلگىلى ٴبىر ۋاقىتقا توقتاۋ كەرەك ەدى، بىراق قۇدايدا قانداي دا ٴبىر كەمشىلىك بولعاندىقتان ەمەس.
جاقىپ: سوندا قالاي، تۇسىنبەدىم؟
ساكەن: كيەلى كىتاپ زامانىندا يەرۋساليمدە بيلىك قۇرعان يسرايل پاتشالارىن «ەحوبانىڭ تاعىندا» وتىر دەيتىن f. ويتكەنى ولار قۇدايدىڭ وكىلى رەتىندە بيلىك ەتەتىن بولعان. دەمەك، يسرايل پاتشالارىنىڭ بيلىگى قۇداي بيلىگىنىڭ كورىنىسى ەدى. الايدا ۋاقىت وتە پاتشالاردىڭ كوبى قۇدايعا مويىنسۇنباي كەتتى، ولارعا حالىق تا ەردى. سول سەبەپتى قۇداي ب. ز.ب. 607-جىلى بابىلدىڭ ٴيسرايلدى جاۋلاپ الۋىنا جول بەردى. سول ۋاقىتتان بەرى يەرۋساليمدە ەشبىر پاتشا ەحوبانىڭ وكىلى رەتىندە بيلىك ەتپەدى. وسى ماعىنادا قۇدايدىڭ بيلىگى توقتادى. ٴتۇسىنىپ وتىرسىز با؟
جاقىپ: ٴيا، ٴتۇسىنىپ وتىرمىن.
ساكەن: دەمەك، ب. ز.ب. 607-جىلى جەتى كەزەڭ، ياعني قۇداي بيلىگىنىڭ توقتاپ تۇراتىن كەزەڭى باستالدى. جەتى كەزەڭنىڭ سوڭىندا قۇداي ٶز وكىلى رەتىندە باسقا ٴبىر بيلەۋشىنى، كوكتەن بيلەيتىن پاتشانى، تاعايىنداماق ەدى. وسىلايشا دانيالدىڭ باسقا دا پايعامبارلىقتارى ورىندالۋ كەرەك بولدى. ەندىگى ماڭىزدى سۇراق: جەتى كەزەڭ قاشان بىتەدى؟ وسى سۇراقتىڭ جاۋابىن تاپساق، قۇداي پاتشالىعىنىڭ بيلىك ەتە باستاعان ۋاقىتىن انىقتايمىز.
جاقىپ: سوندا جەتى كەزەڭنىڭ بىتكەن ۋاقىتى 1914-جىل بولعانى عوي.
ساكەن: ٴدال سولاي!
جاقىپ: الايدا ونى قايدان بىلەمىز؟
ساكەن: يسا جەردەگى قىزمەتى كەزىندە جەتى كەزەڭنىڭ ٵلى بىتپەگەنىن ايتقان g. بۇل ۇزاق ۋاقىتقا سوزىلعان كەزەڭ ەدى. جەتى كەزەڭ يسا جەرگە كەلۋىنەن جۇزدەگەن جىل بۇرىن باستالىپ، ول كوككە ورالعاننان كەيىن دە ٴبىراز ۋاقىت جالعاسۋ كەرەك ەدى. ەسىڭىزدە شىعار، دانيال كىتابىنداعى پايعامبارلىقتاردىڭ ماعىناسى «وسى زاماننىڭ سوڭىنا دەيىن» جابىق بولۋ كەرەك h. ٴبىر قىزىعى، ٴحىح عاسىردىڭ سوڭىنا تامان كيەلى كىتاپ زەرتتەۋشىلەرى وسى جانە باسقا پايعامبارلىقتاردى مۇقيات قاراستىرعان بولاتىن. ولار جەتى كەزەڭنىڭ 1914-جىلى بىتەتىنىن تۇسىنە باستاعان. سودان كەيىن ورىن العان دۇنيەجۇزىندەگى وقيعالار قۇداي پاتشالىعى 1914-جىلى كوكتە بيلىك ەتە باستاعانىن دالەلدەدى. بۇل وسى دۇنيەنىڭ سوڭعى كۇندەرى نەمەسە اقىر زامان دەگەن ۋاقىت باستالعان جىل ەدى. ٴسىز ٷشىن مۇنىڭ ٴبارى جاڭا مالىمەت ٵرى بىردەن ٴتۇسىنۋ قيىن ەكەنىن بىلەمىن.
جاقىپ: قيىنداۋ بولىپ تۇر. بىراق جاقسىلاپ ٴتۇسىنىپ الۋ ٷشىن، بۇل مالىمەتتى قاراستىرىپ شىعۋىم كەرەك.
ساكەن: ماعان دا وسى پايعامبارلىقتاردىڭ بايلانىسىن كورۋ ٷشىن ۋاقىت قاجەت بولدى. بىردەن تۇسىنبەدىم دەپ ۋايىمداماڭىز. بۇگىنگى تالقىلاۋىمىزدىڭ ٶزى سىزگە ەحوبا كۋاگەرلەرى ىلىمدەرىن كيەلى كىتاپقا نەگىزدەيتىنىن كورۋگە كومەكتەستى دەپ ويلايمىن.
جاقىپ: بۇعان ەش كۇمانىم جوق. سەنىمدەرىڭىزدى كيەلى كىتاپقا سۇيەنىپ ٴتۇسىندىرىپ بەرە الاتىندارىڭىز ماعان قاتتى ۇنايدى.
ساكەن: مەن سىزدەن دە وسىنداي ىقىلاستى بايقاپ تۇرمىن. بۇگىن سىزبەن كوپ جاڭا مالىمەت قاراستىردىق. مىسالى، جەتى كەزەڭنىڭ قۇداي پاتشالىعىمەن بايلانىستى ەكەنىن جانە ونىڭ ب. ز.ب. 607-جىلى باستالعانىن بىلدىك. بىراق ٵلى دە اشىق سۇراق بار. جەتى كەزەڭنىڭ 1914-جىلى اياقتالعانىن قايدان بىلەمىز i؟
جاقىپ: سونى مەن دە بىلگىم كەلەدى.
ساكەن: جەتى كەزەڭنىڭ ناقتى قانشا جىل ەكەنىن انىقتاۋعا كيەلى كىتاپتىڭ ٶزى كومەكتەسەدى. كەلەسى جولى وسى سۇراقتى قاراستىرساق، قالاي قارايسىز؟ j
جاقىپ: جاقسى بولار ەدى.
كيەلى كىتاپقا قاتىستى قانداي دا ٴبىر سۇراقتىڭ جاۋابىن العىڭىز كەلە مە؟ ەحوبا كۋاگەرلەرى سەنەتىن نە ۇستاناتىن قانداي دا ٴبىر ٸلىمنىڭ دۇرىستىعىنا كوز جەتكىزگىڭىز كەلە مە؟ ولاي بولسا، ەش تارتىنباستان ەحوبا كۋاگەرىنىڭ بىرىنە سۇراق قويىڭىز. ول سىزبەن سول سۇراقتى قاراستىرۋعا قۋانىشتى بولادى.
a ەحوبا كۋاگەرلەرى كيەلى كىتاپتى اقىسىز زەرتتەۋ ساباقتارىن وتكىزىپ، ادامدارمەن كيەلى كىتاپ تاقىرىپتارىنا اڭگىمەلەسىپ تۇرادى.
c ەحوبا كۋاگەرلەرى باسىپ شىعارعان «كيەلى كىتاپ شىن مانىندە نەگە ۇيرەتەدى؟» كىتابىنىڭ 9-تاراۋىن قاراڭىز. بۇل مالىمەتتى www.mt1130.com. تور بەكەتىنەن دا تابۋعا بولادى.
f شەجىرەلەر 1-جازبا 29:23 (جد)
g سوڭعى كۇندەرگە قاتىستى يسا بىلاي دەگەن: «[قۇدايدىڭ بيلىگىن بىلدىرگەن] يەرۋساليمدى باسقا ۇلتتار وزدەرىنە بەرىلگەن ۋاقىت اياقتالعانشا، اياقتارىمەن تاپتايدى» (لۇقا 21:24). دەمەك، يسانىڭ كەزىندە قۇداي بيلىگى ٵلى توقتاپ تۇرعان، ٵرى سوڭعى كۇندەرگە دەيىن توقتاپ تۇرماق ەدى.
i «كيەلى كىتاپ شىن مانىندە نەگە ۇيرەتەدى؟» كىتابىنىڭ 215—218 بەتتەرىن قاراڭىز. بۇل مالىمەتتى www.mt1130.com تور بەكەتىنەن دا تابا الاسىز.
j كەلەسى ايداردا جەتى كەزەڭنىڭ ۇزاقتىعىن انىقتاۋعا كومەكتەسەتىن كيەلى كىتاپ تارماقتارى قاراستىرىلادى.
قىزىقتى بولار مالىمەتتەر
كۇزەت مۇناراسى
قۇداي پاتشالىعى قاشان بيلىك ەتە باستادى؟ (2-ٴبولىم)
كيەلى كىتاپتاعى پايعامبارلىق پەن قۇدايدىڭ بابىل پاتشاسىنا بەرگەن ٴتۇسى مۇنىڭ ناقتى قاي جىلى بولعانىن كورسەتەدى.
ٴبىز جونىندە
ەحوبا كۋاگەرلەرى جونىندە ٴجيى قويىلاتىن سۇراقتار
ەحوبا كۋاگەرلەرى جونىندە قويىلاتىن سۇراقتارعا جاۋاپ الىڭىز.
كيەلى جازبالار. جاڭا دۇنيە اۋدارماسى
دانيال پايعامبارلىق ەتكەن يمپەريالار
دانيالدىڭ 2-تاراۋىنداعى الىپ ٴمۇسىن جايلى اياندى جانە ونىڭ قالاي ورىندالعانىن كورىڭىز.
