1-تاراۋ
قۇدايدان كەلگەن ەكى حابار
-
جابىرەيىل پەرىشتە جاقيانىڭ تۋىلاتىنىن ايتتى
-
جابىرەيىل ٴماريامعا يسانىڭ تۋىلاتىنىن حابارلادى
كيەلى كىتاپتى تۇگەلىمەن قۇدايدىڭ حابارى دەپ قاراستىرۋعا بولادى. بۇل كىتاپ ارقىلى كوكتەگى اكەمىز بىزگە ٴتالىم بەرەدى. ەندەشە، 2000 جىل بۇرىن ايتىلعان ەرەكشە ەكى حابارعا كوڭىل بولەيىك. ولاردى جەتكىزگەن «قۇداي الدىندا قىزمەت ەتۋشى» جابىرەيىل پەرىشتە بولاتىن (لۇقا 1:19). وسى ماڭىزدى ەكى حاباردى پەرىشتە قانداي جاعدايدا ايتتى؟
شامامەن ب. ز. ب. 3 جىل. العاشقى حاباردى جابىرەيىل قاي جەردە ايتقانىن كورەيىك. ياھۋدەيانىڭ تاۋلى وڭىرىندە، يەرۋساليمگە جاقىن ماڭداعى ٴبىر قالادا ەحوبا قۇدايدىڭ زاكاريا ەسىمدى ٴدىني قىزمەتكەرى تۇرىپ جاتتى. ايەلىنىڭ ەسىمى — ەلىزابەت. قارتايىپ قالعان ولار بالا سۇيمەگەن بولاتىن. زاكاريا ٶز توبىنىڭ كەزەگى كەلىپ، قۇدايدىڭ عيباداتحاناسىنداعى ٴدىني قىزمەتكەرلىك مىندەتىن اتقارىپ جاتتى. ول عيباداتحانانىڭ ىشىندە بولعاندا، كەنەت تۇتەتۋ ۇستەلىنىڭ قاسىنان وعان جابىرەيىل پەرىشتە كورىندى.
زاكاريا قاتتى قورقىپ كەتتى. الايدا پەرىشتە وعان: «قورىقپا، زاكاريا، قۇداي تىلەگىڭدى ەستىدى. ايەلىڭ ەلىزابەت ۇل تاۋىپ، ونىڭ اتىن جاقيا دەپ قوياسىڭ»،— دەدى. سوسىن جابىرەيىل جاقيانىڭ «ەحوبانىڭ كوز الدىندا ۇلى بولاتىنىن» جانە «ەحوباعا دايارلانعان حالىقتى الىپ كەلەتىنىن» حابارلادى (لۇقا 1:13—17).
زاكارياعا بالالى بولۋ مۇمكىن ەمەستەي كورىندى. ويتكەنى ٶزى دە، ايەلى ەلىزابەت تە قارتايىپ قالعان. جابىرەيىل وعان بىلاي دەدى: «بەلگىلەنگەن ۋاقىتتا ورىندالاتىن مەنىڭ سوزدەرىمە سەنبەگەنىڭ ٷشىن، بۇلار جۇزەگە اساتىن كۇنگە دەيىن سويلەي الماي، مىلقاۋ بولىپ قالاسىڭ» (لۇقا 1:20).
بۇل كەزدە سىرتتا تۇرعان جۇرت زاكاريانىڭ ۇزاق كىدىرگەنىنە تاڭعالىستى. ٴبىر ۋاقىتتا ول سىرتقا شىقتى، ٴبىراق سويلەي المادى. ىم-يشاراتپەن عانا بەلگىلەر بەردى. سوندا جۇرت عيباداتحانانىڭ ىشىندە ونىڭ ەرەكشە بىردەڭە كورگەنىن ٴتۇسىندى.
عيباداتحاناداعى قىزمەتى اياقتالعان سوڭ، زاكاريا ۇيىنە قايتتى. كوپ ۇزاماي ەلىزابەت بالا كوتەردى. جۇكتىلىگىنىڭ سوڭعى بەس ايىندا ول ۇيىنەن شىقپاي ٴجۇردى.
كەيىنىرەك جابىرەيىل ەكىنشى حاباردى ايتۋ ٷشىن كورىندى. بۇل جولى ول كىمگە كورىندى؟ عاليلەيا ايماعىنىڭ سولتۇستىگىندەگى نازارەت قالاسىندا تۇرىپ جاتقان ٴماريام ەسىمدى جاس قىزعا. پەرىشتە وعان نە ايتتى؟ «قۇداي ساعان راقىمىن ٴتۇسىردى. سەنىڭ بويىڭا بالا ٴبىتىپ، ۇل تاباسىڭ، ونىڭ اتىن يسا دەپ قوياسىڭ،— دەدى. سوسىن پەرىشتە: —ول اسا ۇلى بولادى، ٵرى قۇداي تاعالانىڭ ۇلى دەپ اتالادى... جاقىپتىڭ اۋلەتىنە ماڭگىلىك بويى پاتشا رەتىندە بيلىك ەتەدى. ونىڭ پاتشالىعىنىڭ شەگى بولمايدى»،— دەپ قوستى (لۇقا 1:30—33).
وسى ەكى حاباردى جەتكىزۋ جابىرەيىل پەرىشتە ٷشىن مارتەبە بولعانى ٴسوزسىز. كەلەسى تاراۋلاردان جاقيا مەن يسا تۋرالى كوبىرەك بىلگەندە، كوكتەن كەلگەن بۇل حابارلاردىڭ نەلىكتەن سونشا ماڭىزدى بولعانىن تۇسىنەمىز.
