مۇسانىڭ 3-جازباسى 20:1—27
20 ەحوبا مۇساعا تاعى بىلاي دەدى:
2 «يسرايلدىكتەرگە مىنا ٴسوزىمدى جەتكىز: —ەگەر يسرايلدىك نە يسرايلدە تۇراتىن جاتجەرلىك بىرەۋ بالالارىنىڭ ٴبىرىن مولەككە باعىشتاسا*، ونداي ادام ٴتىرى قالماسىن+. سول جەردىڭ ادامدارى ونى تاس اتقىلاپ ٶلتىرسىن.
3 ٶز بالاسىن مولەككە بەرىپ، مەنىڭ قاسيەتتى ورنىمدى ارامداعانى جانە كيەلى ەسىمىمدى قورلاعانى ٷشىن، ول ادامعا قارسى شىعىپ، حالقىنىڭ اراسىنان كوزىن قۇرتامىن+.
4 ەگەر سول جەردىڭ ادامدارى ونىڭ ٶز بالاسىن مولەككە بەرگەنىنە كوز جۇمىپ، ونى ولتىرمەسە+،
5 وندا الگى ادام مەن ونىڭ ٷي ىشىنە ٶزىم قارسى شىعامىن+. مولەكپەن ازعىندىق جاساعانى ٷشىن ونى دا، وعان قوسىلعانداردى دا حالقىنىڭ اراسىنان كوزىن قۇرتامىن.
6 ەگەر الدەبىرەۋ ارۋاق شاقىراتىندار+ مەن كورىپكەلدەرگە+ جۇگىنىپ، وسىلايشا ولارمەن ازعىندىق جاساسا، مەن سول جانعا قارسى شىعىپ، حالقىنىڭ اراسىنان كوزىن قۇرتامىن+.
7 وزدەرىڭدى باسقا حالىقتاردان بولەك ۇستاپ، كيەلى بولىڭدار+، ويتكەنى مەن سەندەردىڭ قۇدايلارىڭ ەحوبامىن.
8 مەنىڭ نۇسقاۋلارىمدى ۇستانىپ، ولاردى ورىنداپ جۇرىڭدەر+. مەن سەندەردى قاسيەتتى ەتەتىن ەحوبامىن+.
9 ەگەر الدەكىم اكەسىنە نە اناسىنا قارعىس ايتسا، ول ٴتىرى قالماسىن+. اكە-شەشەسىن قارعاعاندىقتان، ونىڭ قانى ٶز موينىندا.
10 باسقا بىرەۋدىڭ ايەلىمەن ازعىندىق جاساعان ادام ٴتىرى قالماسىن. نەكە ادالدىعىن بۇزعان ەركەك تە، ايەل دە ٶلتىرىلسىن+.
11 ەگەر بىرەۋ اكەسىنىڭ ايەلىمەن جاقىنداسسا، ٶز اكەسىنىڭ ابىرويىن توگەدى+. ەكەۋى دە ٴتىرى قالماسىن. ولاردىڭ قانى ٶز موينىندا.
12 الدەبىرەۋ كەلىنىمەن جاقىنداسسا، ەكەۋى دە ٴتىرى قالماسىن. ولار تابيعاتقا جات نارسە ىستەدى. ولاردىڭ قانى ٶز مويىندارىندا+.
13 ەگەر ەر ادام ايەلمەن جاقىنداسقانداي ەركەكپەن جاقىنداسسا، بۇلارى — بارىپ تۇرعان جەكسۇرىندىق+. ولار مىندەتتى تۇردە ٶلتىرىلسىن. ولاردىڭ قانى ٶز مويىندارىندا.
14 بىرەۋ ايەل الىپ، ونىمەن دە، ەنەسىمەن دە جاقىنداسسا، بۇل — سوراقىلىق*+. ارالارىڭدا سوراقى ىستەردىڭ جاسالۋىنا جول بەرىلمەۋ ٷشىن، ۇشەۋىن دە ٶلتىرىپ، جاعىپ جىبەرۋ كەرەك+.
15 ەگەر ەر كىسى جانۋارمەن جاقىنداسسا، ول ٴتىرى قالماسىن. جانۋاردى دا ولتىرۋلەرىڭ كەرەك+.
16 ايەل ادام جاقىنداسۋ ٷشىن ٶزىن جانۋارعا ۇسىنسا+، ايەلدى دە، جانۋاردى دا ولتىرىڭدەر. ەكەۋى دە ٴتىرى قالماسىن. مۇنداي ەركەك پەن ايەلدىڭ قانى ٶز موينىندا.
17 ەگەر ەر ادام ٶز اپكە-قارىنداسىمەن، اكەسىنىڭ نە شەشەسىنىڭ قىزىمەن، جاقىنداسىپ، ٴبىر-ٴبىرىنىڭ جالاڭاش ٴتانىن كورسە، بۇل — ماسقارالىق+. حالقىنىڭ اراسىنان ولاردىڭ كوزى قۇرتىلسىن. ول اپكە-قارىنداسىنىڭ ابىرويىن توكتى، بۇل كۇناسى ٷشىن جاۋاپقا تارتىلۋى ٴتيىس.
18 ەگەر ەر كىسى ەتەككىرى كەلىپ جۇرگەن ايەلمەن جاقىنداسسا، ەكەۋىنىڭ دە قاندى قاستەرلەمەگەنى+. حالقىنىڭ اراسىنان ولاردىڭ كوزى قۇرتىلسىن.
19 اناڭنىڭ اپكە-سىڭلىسىمەن نە اكەڭنىڭ اپكە-قارىنداسىمەن جاقىنداسۋشى بولما، ويتكەنى قانداس تۋىسىڭنىڭ ابىرويىن توگەسىڭ+. ەكەۋىڭ دە كۇنالارىڭ ٷشىن جاۋاپقا تارتىلاسىڭدار.
20 اكەسىنىڭ اعا-ٸنىسىنىڭ ايەلىمەن جاقىنداسقان ەركەك اعا-ٸنىسىنىڭ ابىرويىن توگەدى+. ەكەۋى كۇناسى ٷشىن جازالانسىن. وسىلاي بالا سۇيمەي ٶلسىن.
21 ەگەر ەركەك باۋىرىنىڭ* ايەلىن السا، بۇل — سوراقىلىق+. ول باۋىرىنىڭ ابىرويىن توكتى. ولار دا بالا سۇيمەي ٶلسىن.
22 مەن الىپ بارا جاتقان جەر سەندەردى قۇسىپ تاستاماۋ ٷشىن+، نۇسقاۋلارىم مەن شەشىمدەرىمدى+ ۇستانىپ، ٴبارىن ورىنداڭدار+.
23 مەن الدارىڭنان قۋىپ شىعاتىن حالىقتاردىڭ ادەت-عۇرىپتارىن ۇستانباڭدار+. سەبەبى ولار وسىنىڭ ٴبارىن ىستەگەندىكتەن، ولاردان جەركەنەمىن+.
24 سوندىقتان دا: «سەندەر ولاردىڭ جەرىن يەمدەنەسىڭدەر. اعى مەن بالى اعىل-تەگىل مول وسى جەردى سەندەرگە بەرەمىن+. مەن سەندەردى باسقا حالىقتاردان ٴبولىپ العان قۇدايلارىڭ ەحوبامىن+»،— دەگەنمىن.
25 ادال مالدى ارام مالدان، ادال قۇستى ارام قۇستان اجىراتا بىلىڭدەر+. سونداي-اق مەن تازا ەمەس دەپ بەلگىلەگەن جانۋار، قۇس نە باۋىرىمەن جورعالايتىن باسقا دا ماقۇلىقتارمەن وزدەرىڭدى ارامداماڭدار+.
26 مەنىڭ الدىمدا كيەلى بولىڭدار، ويتكەنى مەن، ەحوبا، كيەلىمىن+. ٶز حالقىم ەتۋ ٷشىن سەندەردى باسقا حالىقتاردان ٴبولىپ الدىم+.
27 ارۋاق شاقىراتىن نە كورىپكەلدىكپەن اينالىساتىن كەز كەلگەن ەركەك نە ايەل ٴتىرى قالماسىن+. ولاردى تاسپەن اتقىلاپ ٶلتىرۋ كەرەك. ولاردىڭ قانى ٶز مويىندارىندا».
سىلتەمەلەر
^ نەمەسە «قۇرباندىققا شالسا».
^ نەمەسە «ۇياتسىزدىق».
^ ياعني كوزى ٴتىرى باۋىرىنىڭ.
