Жохан 8:12—59
8 12 Бұдан соң Иса халыққа тағы былай деді: “Мен осы дүние үшін жарықпын+. Маған ерген адам ешқашан түнекте жүрмейді, қайта, өмір беретін жарыққа ие болады+”.
13 Сонда парызшылдар оған: “Сен өзің туралы өзің куәлік етесің, біз сенің куәлігіңе сене алмаймыз”,— деді.
14 Иса былай жауап берді: “Мен өзім туралы куәлік етсем де, менің куәлігім шынайы. Себебі мен қайдан келгенімді және қайда баратынымды білемін+. Ал сендер менің қайдан келгенімді де, қайда баратынымды да білмейсіңдер.
15 Сендер сырт көрініске қарап* үкім айтасыңдар+, ал мен ешкімге үкім айтпаймын.
16 Ал үкім айтсам, менің үкімім шындыққа сай болады, өйткені мен жалғыз емеспін, өзімді жіберген Әкем менімен бірге+.
17 Сондай-ақ өздерің ұстанатын Мұса Заңында “екі адам куәлік етсе, істің шынайы болғаны” деп жазылған+.
18 Мен өзім туралы куәлік етемін, мені жіберген Әкем де мен туралы куәлік етеді+”.
19 Сонда олар: “Әкең қайда?”— деп сұрағанда, Иса: “Сендер мені де, Әкемді де білмейсіңдер+. Егер мені білсеңдер, Әкемді де білер едіңдер+”,— деді.
20 Бұл сөздерді ол ғибадатханадағы садақа салатын ыдыстар тұратын маңда+ тәлім беріп жатқанда айтты. Бірақ ешкім оны ұстап алмады, себебі оның уақыты әлі келмеген еді+.
21 Ол тағы былай деді: “Мен кетемін. Сендер мені іздейсіңдер, бірақ бәрібір күнәкар күйлеріңде өлесіңдер+. Мен баратын жерге сендер бара алмайсыңдар+”.
22 Яһудилер болса: “Ол өз-өзін өлтірмекші ме? “Мен баратын жерге бара алмайсыңдар” дегені несі?”— десті.
23 Иса мынаны айтты: “Сендер төменненсіңдер, ал мен жоғарыданмын+. Сендер осы дүниеденсіңдер, ал мен бұл дүниелік емеспін.
24 Сондықтан сендерге “күнәкар күйлеріңде өлесіңдер” дедім. Өйткені менің сол екеніме сенбесеңдер, күнәкар күйлеріңде өлесіңдер”.
25 Олар: “Сен кімсің?”— деп сұрағанда, Иса: “Сендермен несіне сөйлесіп тұрмын?
26 Сендер туралы айтарым да, айыптауға себебім де көп. Мені жіберген — хақ, әрі мен содан естігендерімді осы дүниеге айтып жүрмін+”,— деді.
27 Олар оның өз Әкесі туралы айтып тұрғанын түсінбеді.
28 Сондықтан Иса былай деді: “Адам Ұлын бағанаға көтеріп қойғандарыңда+, сендер менің сол екенімді+ және ештеңені өздігімнен істемей+, қайта, Әкем не үйретсе, соны айтатынымды білесіңдер.
29 Мені жіберген өзіммен бірге. Ол мені жалғыз қалдырған жоқ, өйткені мен әрқашан оған ұнайтынды істеймін+”.
30 Ол осыны айтып тұрғанда, оған көп адам сенді.
31 Сонда ол өзіне сенген яһудилерге: “Егер менің сөзімді ұстансаңдар, шынымен менің шәкіртімсіңдер,
32 әрі шындықты біле түсесіңдер+, ал шындық сендерді азат етеді+”,— деді.
33 Өзгелері болса: “Біз Ыбырайымның ұрпағымыз. Ешқашан біреудің құлы болған емеспіз. Қалайша бізге “азат етілесіңдер” дейсің?”— деді.
34 Иса былай жауап берді: “Сендерге нағыз шындықты айтамын, күнә жасайтын адам — күнәнің құлы+.
35 Құл қожайынының үйінде мәңгіге қалмайды, ал ұлы мәңгіге қалады.
36 Сондықтан Ұл сендерді азат етсе, шынымен азат боласыңдар.
37 Ыбырайымның ұрпағы екендеріңді білемін. Бірақ сендер мені өлтіргілерің келеді, себебі тәлімімді қабылдамайсыңдар.
38 Мен Әкеммен бірге болғанда көргенімді айтамын+, ал сендер өз әкелеріңнен естігендеріңді істейсіңдер”.
39 Олар: “Біздің әкеміз* — Ыбырайым”,— деді. Бұған Иса былай деді: “Ыбырайымның балалары болсаңдар+, Ыбырайым сияқты әрекет етер едіңдер.
40 Ал сендер мені, өздеріңе Құдайдан естіген шындықты айтқан адамды+, өлтіргілерің келеді. Ыбырайым бұлай етпеген.
41 Сендер өз әкелеріңнің ісін істейсіңдер”. Сонда олар: “Біз некесіз* туылған балалар емеспіз. Біздің бір ғана Әкеміз бар. Ол — Құдай”,— деді.
42 Иса мынаны айтты: “Әкелерің Құдай болса, мені жақсы көрер едіңдер+. Өйткені Құдай жібергендіктен мен осындамын. Мен өз бетімше келген жоқпын, мені жіберген — сол+.
43 Айтып тұрғанымды неге түсінбейсіңдер? Себебі сөзімді қабылдағыларың келмейді.
44 Сендердің әкелерің — Ібіліс, соның қалауларын орындағыларың келеді+. Ол әуел бастан кісі өлтіруші болған+ және шындықтан тайып кетті, өйткені онда шындық жоқ. Өтірік айтқанда, оны өз болмысына сай айтады, себебі ол — өтірікші әрі өтіріктің әкесі+.
45 Ал мен шындықты айтатындықтан маған сенбейсіңдер.
46 Қайсысың мені күнә жасады деп әшкерелей аласың? Ал шындықты айтсам, онда неге сенбейсіңдер?
47 Кім Құдайдан болса, сол оның сөздерін тыңдайды+. Сендер Құдайдан емессіңдер, сондықтан да мені тыңдамайсыңдар+”.
48 Әлгі яһудилер оған: “Саған “самариялықсың+, бойыңда жын бар+” деп дұрыс айттық емес пе?”— деді.
49 Иса: “Бойымда жын жоқ! Мен Әкемді құрметтеймін, ал сендер мені қорлайсыңдар.
50 Мен өзіме даңқ іздемеймін+, мұны істейтін де, төрелік ететін де Әкем.
51 Сендерге нағыз шындықты айтамын, менің сөзімді ұстанатын адам ешқашан өлімді көрмейді+”,— деді.
52 Олар былай деді: “Бойыңда жын бар екеніне көзіміз жетті. Ыбырайым да, пайғамбарлар да өлген, ал сен “менің сөзімді ұстанған адам ешқашан өлмейді” дейсің.
53 Әлде қайтыс болған бабамыз Ыбырайымнан да ұлысың ба? Пайғамбарлар да қайтыс болған. Өзіңді кіммін деп тұрсың?”
54 Иса: “Мен өзімді даңқтасам, даңқым түкке де тұрмайды. Мені даңқтайтын — Әкем+. Сендер оны Құдайымыз дейсіңдер.
55 Бірақ оны білмейсіңдер+, ал мен білемін+. Егер оны білмеймін десем, сендер сияқты өтірікші болар едім. Алайда мен оны білемін, әрі оның сөзін ұстанамын.
56 Бабаларың Ыбырайым менің күнімді көремін деп, қатты қуанды. Ол оны көріп, қуанды да+”,— деп жауап берді.
57 Ал олар: “Сен әлі 50-ге де келген жоқсың, сонда да Ыбырайымды көрдің бе?”— дегенде,
58 Иса: “Сендерге нағыз шындықты айтамын, Ыбырайым туылмай тұрып, мен бар болғанмын”+,— деді.
59 Сонда олар Исаға лақтырмақ болып жерден тас алды, бірақ ол жасырынып, ғибадатханадан шығып кетті.
Сілтемелер
^ Немесе “адамдар қоятын талаптарға сай”.
^ Немесе “бабамыз”.
^ Немесе “азғындықтан”. Грекше “порниа”. Түсіндірмені қараңыз.
