Ilinniarnissamut utoqqaavallaartoqarsinnaanngilaq

KSENIYA 1897-mi inunngorpoq. Pingasunik paneqarpoq, ataatsimik erneqarpoq, 15-nik ernutaqarpoq 25-nillu ernutaqqiuteqarluni. Angajoqqaami ajoqersuutigisimasaat inuunermini malittuarsimavai. Abjkhasiami sorsuttoqarfiusumit, Immap Qernertup Kaukasusillu akornaniittumit, qimaasutut Moskvamut pisimagaluarluni inuunini, pingaartumik meeraanerminiilli upperisani, naammagalugu atorpaa.

Kseniyap pania Meri 1993-mi Jehovamut Nalunaajaasunngorpoq. Merip Kseniya Jehova Guuti Biibililu pillugit oqaluttuuttalerpaa, tusarnaarusunngilarli. Kseniya paniminut oqartuaannarpoq: „Nutaanik ilinniarnissannut utoqqaavallaaqaanga.“

Paniatali Merip, ernutaatalu nuliata Londap ernutaqqiutaasalu Nanap Zazallu, tamarmik Jehovamut Nalunaajaasunngorsimasut, Biibili pillugu oqaloqatigiuarpaat. Ukioq 1999-mi unnuit ilaanni Kseniyap allassimaffimmik atuffarneqarnini killissutigingaarpaa. Atuagaat tassaavoq Jiisusip Naalakkap unnukkorsiortitsineranik atulersitsigami ajoqersukkaminut aalajaatsunut oqaaasii killinnartut. (Lukasi 22:19, 20) Unnuk taanna Kseniya 102-nik ukioqarluni aalajangerpoq Biibili atuaqqissaarniarlugu.

„Ukiuni 102-ni inooreerlunga inuunerup siunertaa kiisami paasivara,“ Kseniya oqarpoq. „Guutitsinnut, Jehovamut, tupinnangaartumut asannittumullu kiffartornermit allamit pitsaanerusoqanngitsoq paasilerpara. Suli eqiingasuullunga peqqippunga. Isaruaqarnanga atuarsinnaavunga ilaquttamalu katerisimaarnerannut peqataasinnaallunga.“

Kseniya ukioq 2000-mi novembarip ulluisa tallimaanni kuisippoq. Oqarpoq: „Maannakkut inuunera Jehovamut tunniuppara, asannittumillu kiffartorfiginiarpara. Angerlarsimaffinnut ungasinngitsumi bussit unittarfiani issiallunga atuagassianik naqitaaqqanillu agguaasinnaavunga. Eqqarlikka pulaakulasarput, Jehovalu pillugu sallusuissummik oqaluttuussinnaagakkit nuannaarutigaara.“

Kseniyap ’timimi inuusukkallarnermisut nukittornissaa inuusunnermilu ulluinisut ileqqinnissaa’ qilanaaraa. (Jobi 33:25) 100-t sinnerlugit ukiulik Biibili naapertorlugu inuunerup siunertaanik ilinniarnissaminut utoqqaavallaarsorinngippat, illimmi? (wE 4/1 02)