Nammineq atuaqqissaartarneq ilinniartitsisutut piginnaanngorsaatigaarput

„Tamakku eqqarsaatigeqqissaartakkit, itisilertakkit, siumukarnerit tamanit takuneqarsinnaaqqullugu. Imminut nakkutigiuarit ilinniartitsinerillu nakkutigiuarlugu.“ — 1 TIMOTHEUSI 4:15, 16, NV.

1. Qaqugukkut nammineq atuaqqissaartarnitsinnut tunngatillugu suna eqqumaffigisariaqarparput?

„SUUT tamarmik aalajangersimasumik piffissaligaapput,“ Oqaluussisartup oqaasii 3:1-imi taama allassimavoq. Nammineq atuaqqissaartarnermut tunngatillugu aamma taamaalluinnarpoq. Anersaamut tunngasut eqqarsaatigeqqissaarnissaat ajornakusoortarpoq sumiiffik piffissarluunniit eqqortuunngikkaangat. Assersuutigalugu ullormut assoruunnartumik sulereerlutit unnukkorsiorluareerlutillu tv-ip saavani issiavinnaannut ingilluartitaaraangavit atuaqqissaarusussuseqartarpit? Ilimananngilaq. Suna aaqqiissutaasinnaava? Paasilluartariaqarpat qaqugukkut sumilu atuaqqissaaruit pissarsiffigilluarnerusinnaanerlugu.

2. Qaqugukkut nammineq atuaqqissaarnissaq pitsaanerpaasarpa?

² Inuppassuit paasisimavaat ullaakkut, eqeersimaarfiginerusaminni, atuaqqissaaraangamik pissarsiffiginerusarlugu. Allat ulloqeqqarnerminni atuaqqissaalaartarput. Assersuutini tulliuttuni anersaamut tunngasunik sammisaqartarnissamut piffisaliineq malugiuk. Israelikkut kunngiat Daavi ima allappoq: „Ajunngissutsit uannut nalunaajaatiguuk ullaat tamaasa, tatigigakkit illit. Aqqutigisassannik  ajoqersunnga, illit eriniffigigakkit.“ (Tussiaat 143:8) Pruffiiti Esaja assingusumik pingaartitsinini ersersippaa ima oqarami: „Guutip [Jehovap] tunivaanga ajoqersukkap oqaanik qasusut ikiorsersinnaaqqullugit oqaatsinnik; ullaat tamaasa siutiga itersartarpaa ajoqersukkap pisarneratut tusarnaaqqullunga.“ Taakkunannga ilinniagassarput tassaavoq eqeersimaarnerpaagaangatta eqqarsarluarsinnaanerugaangattalu, ullup qanoq ilineraniluunniit, atuaqqissaartassasugut Jehovamullu qamannga pisumik qinusassasugut. — Esaja 50:4, 5; Tussiaat 5:4; 88:14.

3. Atuaqqissaassagaanni pissutsit suut pitsaanerpaappat?

³ Atuaqqissaarnerup pissarsiffigilluarnerpaanissaanut tunngatillugu eqqarsaatigisassarput alla tassaavoq illumi issiaviit illorrisimaarnarnerpaartaanni sofamiluunniit issiannginnissarput, eqeersimaarnissamut ilasaataanngimmat. Atuaqqissaarnermi qarasaq sulisussaavoq kaammattorneqartussaallunilu, ilorrisimaarpallaaraanni akerlianik pisoqarsinnaavoq. Aammattaaq nipaatsumiilluni allamullu saasaarisoqanngitsumiilluni, atuaqqissaarusussuseqarnarnerusarpoq eqqarsaatersornarnerusarlunilu. Radio, tv meeqqalluunniit malugeqqusaartillugit atuaqqissaarneq pissarsiffiulluarnarnerpaanngilaq. Jiisusi arlaannik itisuumik eqqarsaatigisaqarniaraangami nipaatsumukartarpoq. Aamma eqqaavaa qinunermi kisimiinnissap pingaaruteqarnera. — Matthæusi 6:6; 14:13; Markusi 6:30-32.

Nammineq atuaqqissaartarnerup akissutissaqartissavaatigut

4, 5. Atuagassiaaraq Guutip sumik piumaffigaatigut? qanoq iluaqutigisinnaavarput?

⁴ Nammineq atuaqqissaarneq nalerisimaalersitsingaartarpoq arlaannik misissuineruniarluta, ingammik allat ilumoorlutik apeqqutaannik akissutissaqarniarluta, Biibililersaarutit iluaqutaasut assigiinngitsut atoraangatsigik. (1 Timotheusi 1:4; 2 Timotheusi 2:23) Inuppassuit siulliullugu atuaqqissaartarpaat atuagassiaaraq Guutip sumik piumaffigaatigut?, * maanna oqaatsini 261-ni saqqummersimasoq. Paasiuminartuuvoq eqqorluartuullunilu, Biibilimillu tunngaveqarluinnartuulluni. Tamatuminnga atuartut paasipallattarpaat pallorfiginninnermut ilumoortumut Guutip suut piumasarinerai. Atuagassiaaraannaagamili sammisaneqartut tamaasa sukumiisumik samminngilai.  Atuaqqissaaqatigisartakkavit ilumoorluni aperippatit Biibilimut tunngasumik sammisassi arlaannik, apeqqutimi akissutissarsiornerani iluaqutaasinnaasut paasissutissat amerlanerusut qanoq nassaarisinnaavigit?

⁵ Nammineq oqaatsini cd-romi Watchtower Library pigigaanni, qarasaasiaq atorlugu paasissutissarpassuit assigiinngitsut pissarsiareriaannaapput. Taamaattuuteqanngikkaannimi? Atuagassiaaqqami Guutip sumik piumaffigaatigut?-mi sammineqartut marluk misissoriartigik, takullugulu qanoq paasisaqarnerusinnaanersugut sukumiinerusumillu akissutissaqalersinnaanersugut. Apeqqutit uku misissussavavut: ’Guuti kinaava?’ aamma ’Jiisusi Kristusi kinaava?’ — 2 Mosesi 5:2; Lukasi 9:18-20; 1 Petrusi 3:15.

Guuti kinaava?

6, 7. (a) Guuti pillugu suna apeqqutaalerpa? (b) Palasip oqalugiaammini pingaarutilik suna atunngilaa?

⁶ Atuagassiaaqqami Guutip sumik piumaffigaatigut?-mi ilinniagassaq 2-mi apeqqut pingaarutilik una akineqarpoq: Guuti kinaava? Ajoqersuutit tunngaviusut taanna ilagaat, Guutimi ilumoortoq pallorfigineqarsinnaanngilaq ilisarisimanngikkaanni piuneraluunniit qularigaanni. (Romamiut 1:19, 20; Hebræerit 11:6) Silarsuaq tamakkerlugu Guutip kinaanera pillugu isummat amerlaqaat. (1 Korinthimiut 8:4-6) Upperisarsioqatigiit tamarmik Guutip kinaassusia pillugu assigiinngitsunik akissuteqartarput. Upperisarsiortut kristumiuunerartut amerlanersaanni Guuti ataasiullunilu pingasuunerartarpaat. USA-mi palasi nuimasoq oqalugiaateqarpoq ima qulequtalimmik: „Guuti ilisarisimaviuk?“, ataasiaannarluniluunniilli Guutip aqqa taanngilaa, Allakkat Hebræerisuut arlaleriarluni issuaaffigigaluarlugit. Ilimagineqarsinnaasutut Biibilimik nutsikkami atugaani „Naalagaq“ marloqiusamik paasineqarsinnaasoq kinaassuseqanngitsorlu atorneqarpoq, Jehova imaluunniit Jahve atorneqarnani.

⁷ Palasip pingaarutilik maluginngitsoorpaa Jeremia 31:33, 34-lu issuaramigit: „Nunaqqatigiit qatanngutigiilluunniit imminnut ilinniartittarunnaassapput oqarlutik: ’Naalagaq ilisimajuk! [hebræerisoorlugu: Jehova ilisimajuk]’ — tassa tamarmik minnernit annernut ilisimammannga, oqarpoq Naalagaq [hebræerisoorlugu: Jehova].“ Nutsikkami palasip atugaani Guutip aqqa immikkut ittoq atorneqanngilaq. — 2 Mosesi 3:15.

8. Suup ersersippaa Guutip aqqanik atuineq pingaaruteqartoq?

⁸ Tussiaat 8:9-mi takuneqarsinnaavoq Jehovap aqqata atorneqarnissaa qanoq pingaaruteqartigisoq. Ny Verden-nutsigaq naapertorlugu imaappoq: „Jehova, Naalagarput, aqqit ataqqinangaarami nunarsuarmi tamarmi!“ Kalaallisut atortussaatitaasumi Tussiaat 8:10-mut naleqqiuguk: „Naalagaq Naalagarput! Naalannangaarpoq aqqit nunarsuarmi tamarmi!“ (Aamma takuuk tugsiaut 8:10.) Allaaserisalli siuliani allassimaneratut ’Guuti ilisimalersinnaavarput’ oqaasianik qaammaasaqarutta. Guutip aqqanik atuinerup pingaaruteqarnera pillugu apeqqutinut Biibililersaarutini sorlerni akissutissarseriaannaavugut? — Ussatit 2:1-6.

9. (a) Atuagaq suna atorlugu Guutip aqqanik atuinerup pingaaruteqarnera nassuiarsinnaavarput? (b) Biibilimik nutserisorpassuit Guutip aqqanik qanoq ataqqinninngitsuliorsimappat?

⁹ Atuagaq Ilisarsineq inuunermut naassaanngitsumut sammisoq, oqaatsinut 154-inut nutserneqarsimasoq, atorsinnaavarput. * Kapitalimi „Kina Guutiua ilumoortoq“-mik qulequtalimmi qulequtaaqqap „Guuti ilumoortoq ateqarpoq“-ip ataani (qupperneq 24-mi), erseqqissumik takutinneqarpoq tetragrami (oqaaseq grækerisuujuvoq isumaqartoq „naqinnerit sisamat“) hebræerisooq hebræerisut allassimaqqaarfiani 7000-t pallillugit atorneqartoq. Taamaakkaluartoq juutit kristumiullu silarsuaanni nutserisut palasillu Biibilimik nutsikkaminni amerlanerni piaaralutik atunngilaat. * Qanoq ilillutik Guuti ilisarisimanerarsinnaavaat taassumanngalu iluarisaanerarsinnaappat aqqa akueriumanagulu atunngikkunikku? Guutip aqqa ilumoortoq taassuma siunertaanik kinaaneranillu paasinninnissamut aqqutissiuivoq. Guutip aqqa atorneqanngippat Jiisusip qinunermut najoqqutassiaa qanoq isumaqassava: „Ataatarput qilanniittutit! Aqqit illernartitaali“? — Matthæusi 6:9; Johannesi 5:43; 17:6.

 Jiisusi Kristusi kinaava?

10. Jiisusip inuunera kiffartorneralu pillugit sumi tamakkiisumik paasisaqarsinnaavugut?

¹⁰ Atuagassiaaqqami Guutip sumik piumaffigaatigut?-mi ilinniagassaq 3 ima qulequtaqarpoq: „Jesus Kristus kinaava?“ Immikkoortuni arfinilinni Jiisusip kinaanera, suminngaaneernera aamma sooq nunaliarnera naatsumik oqaluttuarineqarpoq. Inuunera sukumiinerusumik paasisaqarfigerusukkukku iivangkiiliut saniatigut allamik pitsaanerusoqanngilaq atuakkamit Inuk inuit inuusimasut pingaarnerpaartaat-mit, oqaatsinut 111-nut nutserneqarsimasumit. Atuakkap kapitaliini 133-usuni iivangkiiliut sisamat tunngavigalugit Jiisusip inuunera ajoqersuutaalu tamakkiisumik pisimaneri tulleriiaarlugit oqaluttuarineqarput. Indsigt i Den Hellige Skrift-imi, atuagaq 1-imi, qulequttap „Jesus Kristus“-ip ataani aamma atuakkami Ilisarsineq inuunermut naassaanngitsumut sammisoq-mi kapitali 4-mi misissorneqarnerusinnaavoq.

11. (a) Jiisusimik upperinninnerminni Jehovap Nalunaajaasui allanit qanoq allaaneruppat? (b) Ataasiullunilu pingasuussutsimik ajoqersuutip eqqunngitsuunera allassimaffiit sorliit uppernarsarpaat, atuagassiarlu suna tamatumani iluaqutaalluarpa?

¹¹ Kristumiuunerartuni akerleriissutaasimavoq Jiisusi tassaanersoq ’Guutip Ernera’ aamma ’Guuti Erneq’. Katuullit katekisimuusianni (Catechism of the Catholic Church-mi) ataasiullunilu pingasuussuseq ima taaneqarpoq: „Kristumiut upperisaanni paasiuminaatsut pingaarnersaat.“ Kristumiuunerartut upperisaannit allaanerullutik Jehovap Nalunaajaasuisa upperaat Jiisusi Guutimit pilerfeqartoq, tassa Guutimit pinngortitaq, namminerli Guutiunani. Tamanna pitsaalluinnartumik sammineqarpoq atuakkami pâratîsime nuname nâgssáungitsumik inûsínauvutit-mi, oqaatsinut 131-nut nutserneqarsimasumi. * Ataasiullunilu pingasuussutsip eqqunngitsuuneranik uppernarsaanermi allassimaffippassuit atorneqartut ilagaat Markusi 13:32, Korinthimiunut allakkat siulliit 11:3 aamma 15:28.

12. Maanna suna apeqqutaalerpa?

¹² Taamatut „Guuti“ aamma „Jiisusi Kristusi“ pillugit misissuerup takutippaa Biibilip sallusuissutaanik nalusut eqqorluartumik ilisarsinissaannik ikiorniarlugit qanoq nammineq atuaqqissaartoqarsinnaanersoq. (Johannesi 17:3) Ukiorpassuarnimi kristumiut ilagiivinut najuuttarsimasut? Biibilimik ilisarsineq eqqarsaatigalugu Jehovap oqaasianik nammineq atuaqqissaarnertik suli eqqumaffigisariaqarpaat?

Sooq ’imminut nakkutigiuartariaqarpugut’?

13. Nammineq atuaqqissaarnermut isiginnittaaseq suna eqqunngitsuua?

¹³ Ukiorpassuarni ilagiinnut ilaasimasut ilaat immaqa isumaqarput Jehovap Nalunaajaasuatut ukiuni siullerni Biibilimik ilisarsinertik naammattoq. Ima imminut oqarfigineq ajornanngeqaaq: „Nutaatut eqiasuitsigalunga atuaqqissaartariaqanngilanga. Eqqarsaatigiinnarsinnaavarput ukiut ingerlaneranni Biibili atuagassiallu Biibililersaarutit qasseriarlunga naasimanerikka.“ Imatulli oqaraanni assigiinnarpaa: „Qanoq neritiginerlunga sutornerlungalu taama eqqumaffigitigisariaqanngilara, eqqarsaatigeriartigimmi piffissap ingerlanerani nerisartakkakka tamaasa.“ Nalunngilarput peqqissuussagutta inuummarissuussaguttalu peqqinnartunik eqqortumik nerisassiarineqartunik neriuartariaqarluta. Anersaakkut peqqissuunissatsinnut atatillugu aamma taamaappoq. Anersaakkut peqqissuujuarumalluta nukittuujuarumallutalu eqqortumik inuussuteqarnissarput eqqumaffiginerusariaqarparput! — Hebræerit 5:12-14.

14. Sooq ’imminut nakkutigiuartariaqarpugut’?

¹⁴ Taamaattumik tamatta, sivisuumik sivikitsumilluunniit Biibilimik atuaqqissaarsimagaluarutta, Paulusip Timotheusimut oqaasii malugisariaqarpavut. Timotheusi nakkutilliisuusoq inersimalluartoq akisussaassutsimik ilisimannittoq ima kajumissaarneqarpoq: „Imminut nakkutigiuarit ilinniartitsinerillu nakkutigiuarlugu. Taamaaliortuarit, taamaaliorlutit imminut annaatissagavit tusartitillu annatsissagakkit.“ (1 Timotheusi 4:15, 16, NV) Nammineq atuaqqissaartarnerup eqqumaffiginissaanut pissutaasoq alla Paulusip uparuarpaa oqarami ’Diaavulup qoqassisiiniarneri’ sianigisariaqarivut ’ajussutsillu anersaavi pissaasut qilaap ataaniittut’ akiortariaqarivut. Aamma apustili Petrusip mianersoqqussutigaa Diaavulup ’iisassarsiornera’, uagullu  pisariniagaanut ilaasinnaavugut. Imminut naammagisimaarneq eqqumaniannginnerlu sanngiiffiusinnaapput Saatanip alapernaassai. — Efesosimiut 6:11, 12; 1 Petrusi 5:8.

15. Qanoq imminut illersorsinnaavugut, qanorlu iliortuartariaqarpugut?

¹⁵ Suna illersuutigisinnaavarput? Apustili Paulusi ima oqarpoq: „Guutip sakkutuussutai tamarmiusut atiniarsigit ullussami ajortumi akiuussinnaaqqullusi, suullu tamaasa ajugaaffigalugit atattuinnaqqullusi.“ (Efesosimiut 6:13) Anersaakkut sakkutuussutitta qanoq pitsaatiginerannut aalajangiisuuginnanngilaq aallaqqaammut qanoq ittuunera, aammali ’aserfallatsaalineqarnera’. Taamaattumik Guutip sakkutuussutaanut ilaavoq Guutip oqaasianik tamakkiisumik paasinninnissaq. Sallusuissummik paasinninneq Jehovap oqaatsini aamma kiffaqatigiit aalajaatsut ilumoortullu aqqutigalugit saqqummersitaa malinnaaffigisariaqarparput. Biibilimik atuagassianillu Biibililersaarutinik aalajangersimasunik nammineq atuaqqissaartarneq anersaakkut sakkutuussutitta aserfallatsaalineranut pingaaruteqarpoq. — Matthæusi 24:45-47; Efesosimiut 6:14, 15.

16. „Uppernerup eqqortinnaveeqqutaa“ siunertamisut innersoq qanoq qulakkeerneqarsinnaava?

¹⁶ Sakkutuussutitta pingaartortaa alla, tassa „uppernerup eqqortinnaveeqqutaa“, Paulusip erseqqissarpaa. Taassuminnga Saatanip qarsui ikumasut, eqqunngitsumik unnerluussinerit tunussisullu ajoqersuutaat, itigartissinnaavavut qamillugillu. (Efesosimiut 6:16) Taamaattumik pingaaruteqarpoq uppernerup eqqortinnaveeqqutaata qajannaatsuunerata qulakkeernissaa, paasillugulu qanoq aserfallatsaalineqarsinnaanersoq qajannaallisinneqarsinnaanersorlu. Assersuutigalugu ima imminut aperisinnaavugut: ’Sapaatip-akunneranut Napasuliaq Alapernaarsuiffiup atuaqqissaaqatigiissutigineqarnissaanut qanoq piareersartarpunga? ’Asaqatigiinnermut ajunngitsuliornermullu kajumissaarisinnaallunga’ naammattumik atuaqqissaartarpunga eqqarsaatigilluagaasunik ataatsimiinnerni akissuteqartarnikkut? Allassimaffiit innersuussutigineqartut, issuarneqanngitsulli, Biibilimi qupperlugit atuartarpakka? Ataatsimiinnermi angorniorlunga peqataanikkut allat qiimmassartarpakka?’ Sassaalliutigineqartut tassaapput anersaakkut inuussutissat tamuasarissat, tamakkiisumillu pissarsiffiginiarlugit uulluarneqartariaqarput. — Hebræerit 5:14; 10:24.

17. (a) Toqunartoq suna atorlugu Saatanip anersaamut tunngasunik pingaartitsiunnaarsinniarpaatigut? (b) Suna illersuutaava?

¹⁷ Inuup naammalluinnanngitsup sanngiissutai Saatanip nalunngilai, pilersaarutipiluilu qoqassiiniutaapput. Sunniipilunniarnerisa ilagaat imaaliallaannaq tv-mi, internetimi, videoni atuagassianilu assigiinngitsuni tiingasulersaarutinik isiginnaartoqarsinnaanera. Kristumiut ilaasa illersuutertik sanngiillisimasoq toqunartumik tamatuminnga pitartissimavaat, taamaattumillu ilagiinni kiffartornermi immikkut pisinnaatitaaffitik annaasimavaat ajornerusumilluunniit kingunerlutsitsillutik. (Efesosimiut 4:17-19) Saatanip anersaakkut toqunartuutaanut suna illersuutaava? Biibilimik nammineq aalajangersimasumillu atuaqqissaartarneq, kristumiut ataatsimiinnerinut najuuttarneq Guutillu sakkutuussutaanik tamarmiusumik aserfallatsaaliineq. Taamaaliorutta eqqortoq eqqunngitsorlu immikkoortissinnaassavavut Guutillu uumigisaa uumigalugu. — Tussiaat 97:10; Romamiut 12:9.

18. Anersaakkut akiuunnitsinni ’anersaap panaa’ qanoq iluaqutigisinnaavarput?

¹⁸ Atuaqqissaartarneq ileqqorilluarutsigu Guutip oqaasianik eqqortumik ilisarsilissaagut, ilisarsinerullu tamatuma illersuutissaqartilluaannassanngilaatigut aammattaarli akiuunnitsinni sakkussaqarluartissavaatigut ’panamik Anersaap panaanik, tassa Guutip oqaasianik’. Taanna ’panamit  illuttut kiinalimmit ipinneruvoq. Magguttarpoq avissaartillugu tarneq anersaamit taamatullu aamma pateq saanermit, uummatip eqqarsaatai isumaalu eqqartuuttarlugit.’ (Efesosimiut 6:17; Hebræerit 4:12) ’Panamik’ tamatuminnga atuillaqqissigutta, arlaannit ajoqutaarpasinngitsunit kajungernarpasittunillu ussernartorsiortinneqaraangatta nakutitaanata, Saatanip nakutsitsiniutaasa toqunartut ilaattut qulaassavarput. Biibilimik ilisarsinermik Biibilimillu paasisaqarnermik peqqumaasivipput iluaqutigalugu ajortoq itigartissinnaavarput ajunngitsuliorlutalu. Taamaattumik imminut ima aperisariaqarpugut: ’Panara ipippa, ikkiippaluunniit? Allassimaffiit akiuunninni atorluarsinnaasakka eqqaamajuminaatsippakka?’ Diaavulu akiorsinnaajumallugu atuaqqissaarnermik ileqqorilluagarput aalajangiusimatigu. — Efesosimiut 4:22-24.

19. Nammineq atuaqqissaartarneq qanoq iluaqutigissavarput?

¹⁹ Paulusi ima allappoq: „Allakkat illernartut tamarmik Guutip sunniineratigut isumassarsiarititaapput iluaqutaallutik ajoqersuutaallutillu inerteqqutaallutik, iluarsiartuutaallutik, iluarnermut perorsaataallutik, inuk Guutip pigisaa piginnaaneqarluaqqullugu, ajunngitsuliornernut tamanut piareersarluagaaqqullugu.“ Oqaatsit taakku Timotheusimut oqaatigineqarput, uagulli aamma uummammiuliukkutsigik nakussatsinneqassaagut allanillu ilinniartitsisuunissatsinnut piukkunnarnerulerluta. Utoqqaanertat ilagiinnilu kiffartortut ilagiinnut iluaqutaanerulersinnaapput, tamattalu uppernikkut aalajaattuarsinnaavugut. — 2 Timotheusi 3:16, 17, NV; Matthæusi 7:24-27.  (wE 12/1 02)

[Quppernerup ataani ilanngussaq]

Eqqaamavigit?

• Pissutsini qanoq ittuni atuaqqissaarneq pissarsiffiulluarnarnerua?

• Guutip aqqanut atatillugu Biibilimik nutserisorpassuit suna kukkussutigisimavaat?

• Ataasiullunilu pingasuussutsip eqqunngitsuunera uppernarsarniarlugu allassimaffiit sorliit atussavigit?

• Ukiorpassuarni kristumiooreeraluarluni Saatanip peqqusersusaarnerinut illersorniarluni qanoq iliortoqartariaqarpa?

[Atuaqqissaarnermi apeqqutit]

[Qupp. 15-mi assiliartat]

Pissutsit eqqortuusariaqarput atuaqqissaarneq tamakkiisumik pissarsiffigissagaanni

[Qupp. 19-mi assiliartat]

’Panat’ ipippa ikkiippaluunniit?