Ernumanartorsiorfiit maanna atuuttut

BIIBILIMI siulittuutigineqarpoq „ernumanartorsiorfiit anigoruminaatsut“ (NV) inuiaat misigiumaaraat, piffissarlu tamanna ’ullussanik kingullernik’ taaneqarpoq. (2 Timotheusi 3:1-5; 2 Petrusi 3:3-7) Jiisusip Kristusip ajoqersukkami apeqqutaat „pissutsit aaqqissuussaanerata naggataatungaanut“ tunngasoq akigamiuk piffissaq tamanna eqqaavaa. (Matthæusi 24:3, NV) Ullut kingulliit maanna inuuffigaavut? Biibilimi siulittuutit nalunaarusiallu nutaanerusut imminnut sanilliutikkit namminerlu isummerlutit.

Biibilimi siulittuutigineqartut: nunarsuaq tamakkerlugu akerleriinnerit — Lukasi 21:10; Saqqummersitat 6:4.

Ullumikkut nalunaarusiani allassimasut: „1900-kkunni sorsunnerup kingunerisaanik toqusut Kristusip inunngornerata nalaaniilli 1800- kkut tikillugit toqusunit pingasoriaammik amerlanerupput.“ — Worldwatch Institute.

Biibilimi siulittuutigineqartut: nerisassaaleqineq nappaalanerlu — Lukasi 21:11; Saqqummersitat 6:5-8.

Ullumikkut nalunaarusiani allassimasut: 2004-mi missiliuunneqarpoq inuit 863 millionit nerisassakilliortut, 2003-mut naleqqiullugu 7 millioninik amerlanerullutik. — FN-ip inuussutissarsiornermik nunalerinermillu peqatigiiffia (FAO).

Inuit milliardit missaanniittut illupalaannguani najugaqarput; 2,6 milliardit eqqakkanut attakkunullu eqqaavissanik pingaaruteqarnerpaanik peqanngillat; 1,1 milliardit minguitsumik imissaqanngillat. — Worldwatch Institute.

Ukiut tamaasa inuit 500 millionit malarialertarput; 40 millionit hiv-imik aids-imilluunniit nappaateqarput; 2005-imi 1,6 millionit tuberkulosemik toqquteqarput. — Silarsuarmi Peqqissaanikkut Suliniaqatigiiffik (WHO).

Biibilimi siulittuutigineqartoq: nunarsuaq aserorterneqassasoq — Saqqummersitat 11:18.

Ullumikkut nalunaarusiani allassimasut: „Inuit suliarisartagaasa kingunerisaannik nunarsuup uumasui naasuilu assigiinngitsorpassuit nungutaangajalerput.“ „Pinngortitarsuup inuiaat piujuarnissaannut tapersiissutaasa 2/3-ii nunarsuaq tamakkerlugu aseroriartorput.“ — Millennium Ecosystem Assessment.

„Gassit kissattoorutaasut inuit pilersitaat pissutaallutik nunarsuup silaannartaa pinngitsoorneqarsinnaanngitsumik nalorninartorsiorpoq nunarsuup aarlerinartorsiorneranik kinguneqarsinnaasumik.“ — NASA, Goddard Institute for Space Studies.

Biibilimi siulittuutigineqartoq: nunarsuaq tamakkerlugu Guutip naalagaaffia pillugu nutaarsiassaq nuannersoq oqaluussissutigineqassasoq — Matthæusi 24:14; Saqqummersitat 14:6, 7.

Ullumikkut nalunaarusiani allassimasut: 2007-ip ingerlanerani Jehovap Nalunaajaasuisa 6.957.854-it nunani 236-ni Guutip naalagaaffia pillugu nutaarsiassap nuannersup oqaluussissutiginerani nalunaaquttap-akunneri 1,4 milliardit sinnerlugit atorpaat. — Jehovas Vidners Årbog 2008.

Qulaani oqaatigineqareersutut, Biibilimi siulittuutigineqarpoq nutaarsiassat nuanniitsorpassuugaluartut isumalluarnissamut pissutissaqartoq. Jiisusip eqqartorpaa Guutip naalagaaffia pillugu „iivangkiiliu“, imaluunniit „nutaarsiassaq nuannersoq“ (NV). Guutip naalagaaffia suua? Guutip naalagaaffia inuiaat siunissamut neriuutissaannut pitsaanerusumut qanoq attuumassuteqarpa? Guutip naalagaaffia ilinnut qanoq attuumassuteqarpa?

[Qupp. 5-mi issuagaq]

Silarsuarmi pissutsit ullumikkut takusinnaasavut Biibilimi siulittuutigineqarput