Guutip soqutigaanga?

Inuppassuit qanoq oqartartut:

▪ “Guuti ajornartorsiutima isumaginissaanut ataqqinarpallaarpoq.”

▪ “Isumaqarpunga Guutip soqutiginngikkaanga.”

Jiisusi qanoq oqarpa?

▪ “Qupaloraarsuit tallimat skillinginik marlunnik akilersillugit tunineqartannginnerpat? Taamaattorli taakkua ilaat ataaserluunniit Guutimit puiorneqanngilaq. Ilami ilissi nutsasiluunniit tamarmik kisissimapput. Erseqinasi, qupaloraarsuppassuarnit pingaarneruvusi.” (Lukasi 12:6, 7) Erseqqissumik Jiisusi ajoqersuivoq Guutip soqutigigaatigut.

▪ “Isumakuluuteqassanngilasi ima aperalusi: Suna nerissavarput? Suna imissavarput imaluunniit suna atissavarput? Tamakku tamaasa Guutimik nalusut ujartarpaat, ataatassilu qilammiittup nalunngilaa tamakku tamaasa pisariaqartikkisi.” (Matthæusi 6:31, 32) Jiisusip qularutiginngilaa Guutip nalunngikkaa tamatta immikkut suut pisariaqartinnerivut.

BIIBILIMI erseqqissarneqarpoq Guutip isumassoraatigut. (Tussiaat 55:23; 1 Petrusi 5:7) Soormiuna ullumikkut inuit taama naalliuuteqartigisut? Guuti asannittuuguni ajugaqanngitsuugunilu, taava sooq naalliuutit atuukkunnaarsinniarlugit iliuuseqanngila?

Apeqqummut tamatumunnga akissut inuit amerlanersaasa nalusaannut — tassa Saatanip Diaavulup silarsuarmut matumunnga ajortumut naalagaaneranut — tunngassuteqarpoq. Saatanip Jiisusi usseramiuk, silarsuup naalagaaffiinik tamanik neqeroorfigalugu, ima oqarfigaa: “Pissaaneq tamanna tamaat alutornassuserlu ilinnut tunniukkumavakka, uannummi pigititaammata kimulluunniit piumasara malillugu tunniussinnaavakka.” — Lukasi 4:5-7.

Kia Saatani silarsuarmut naalaganngortippaa? Siuaasatta siulliit, Adamip Evallu, Saatani naalakkamikku Guutilu tunullugu Saatani naalakkamissut qinerpaallusooq. Taamatut pikitsitsisoqarmalli Jehovap Guutip kamagittarluni piffissaq sivisooq ingerlatissimavaa Saatanip naalakkersuinerata iluatsinngilluinnarnera takutinniarlugu. Jehovap inuk kinaluunniit imminut kiffartortinniarlugu pinngitsaalisimanngilaa, imminulli uternissamut periarfissippaatigut. — Romamiut 5:10.

Guutip isumassoramisigut Jiisusi aqqutigalugu aniguisinneqarsinnaalersippaatigut Saatanip naalakkersuineranit. Qanittukkut Jiisusip ‘pissaaneerutitikkumaarpaa toqup pissaaneranik peqartoq, tassa Diaavulu.’ (Hebræerit 2:14) Taamaaliornermigut ‘Diaavulup suliai suujunnaarsissavai.’ — 1 Johannesi 3:8.

Paratiisi nunarsuarmi maani pilerseqqinneqassaaq. Taamanikkussamut Guutip ‘qulliit tamaasa inuit isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit peersimassammata.’ — Saqqummersitat 21:4, 5. *

[Quppernerup ataani ilanngussaq]

[Qupp. 8-mi issuagaq]

Paratiisi nunarsuarmi maani pilerseqqinneqassaaq