Jiisusip sumik ilinniartikkaatigut

Toqusimasunut neriuutissaq pillugu

Jiisusip ikinnerpaamik inuit pingasut makitippai, taamaalilluni toqusimasunut neriuutissaqartoq ersersippaa. (Lukasi 7:11-17; 8:49-56; Johannesi 11:1-45) Toqusimasunut neriuutissaq paasiumallugu toqusoqartarneranut pissutaasoq paaseqqaartariaqarparput.

Sooq inuit napparsimasarlutillu toqusarpat?

Jiisusip inuit ajortaat isumakkeerfigigaangagit inuit ajorunnaarsinneqartarput. Assersuutigalugu nukillaarsimasoq Jiisusimut aggiunneqarmat Jiisusi ima oqarpoq: “‘Suna ajornannginnerua, ima oqaraanni: Ajortinnik isumakkeerfigineqarputit, imaluunniit: Nikuigit pisullutillu? Ilisimaqqullusiulli Inuup Ernera nunarsuarmi ajortinik isumakkiisinnaatitaasoq’ — taava nukillaarsimasoq oqarfigaa: ‘Nikuillutit siniffiit tiguuk angerlarlutillu.’” (Matthæusi 9:2-6) Tassa ajorti nappaatinut toqunermullu pissutaavoq. Ajortiliussuseq kingornussarput inummit siullermit, Adamimit, naggueqarpoq. — Lukasi 3:38; Romamiut 5:12.

Sooq Jiisusi toqua?

Jiisusi ajortuliunngisaannarpoq. Taamaattumik toqusariaqanngikkaluarpoq. Uagulli pilluta toqunermigut Jiisusip ajortuliatsinnut akiligassarput akilerpaa. Oqarpoq aani ‘amerlasuut pillugit kuineqassasoq ajortit isumakkeerneqaatissaannik’. — Matthæusi 26:28.

Jiisusi aamma ima oqarpoq: “Inuup Ernera [tikiutinngilaq] kiffartorfigeqqulluni, namminerli kiffartussalluni inuuninilu akissatut tunniutissallugu amerlasuut utertinneqaatissaattut.” (Matthæusi 20:28) Jiisusip akiligassaq akilikkani ‘utertinneqaatissaq’-mik taavaa inuit toqumit aniguisinneqartarmata. Jiisusi aamma ima oqarpoq: “Uanga tikiuppunga inooqqullugit naammangaartumillu pissaqaqqullugit.” (Johannesi 10:10) Toqusimasunut neriuutissaq paasilluinnarniarlugu aamma toqugutta qanoq pisoqassanersoq paasisariaqarparput.

 Toqugutta qanoq pisoqassava?

Jiisusip ikinngutini Lazarusi toqummat toqusoqaraangat qanoq pisoqartarnersoq oqaluttuaraa. Ajoqersukkani ima oqarfigai: “‘Ikinnguterput Lazarusi sinippoq, itersariartussavarali.’ . . . Ajoqersugai isumaqarsimapput sininneraannaraa. Taava Jiisusip oqarfigilluaannarpai: ‘Lazarusi toquvoq.’” Taamaalilluni Jiisusip erseqqissarpaa toqusimasut sinittut, tassa sunnguamilluunniit ilisimanngitsut. — Johannesi 11:1-14.

Lazarusi Jiisusimit makitinneqarami ulluni sisamani toqungareerpoq. Lazarusili toqunganermini misigisaqarsimanersoq Biibilimi oqaluttuarineqanngilaq. Lazarusi toqungatilluni sunnguamilluunniit ilisimasaqanngilaq. — Oqaluussisartup oqaasii 9:5, 10; Johannesi 11:17-44.

Toqusimasunut sumik neriuutissaqarpa?

Toqusimasut uummaqqikkumaarput naassaanngitsumillu inuunissamik neriuuteqarlutik. Jiisusi ima oqarpoq: “[Piffissaq] nalliukkumaarpoq ilivermiittut tamarmik taassuma [Jiisusip] nipaanik tusarumaarfissaat ilivernillu aniumaarfissaat.” — Johannesi 5:28, 29.

Neriuut tamanna Guutip asanninneranut uppernarsaataavoq. Jiisusi ima oqarpoq: “[Guutip] silarsuaq ima asatigaa ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu.” — Johannesi 3:16; Saqqummersitat 21:4, 5. (wp08 11/01-E)

Amerlanerusunik paasissutissaqarpoq atuakkami Biibilimi sorpiaat ajoqersuu- tigineqarpat? *-imi kapitali 6-imi

[Quppernerup ataani ilanngussaq]