“Anersaap panaanik” atuillaqqissigit

“[Panaleritsi] Anersaap panaanik, tassa Guutip oqaasianik.” — EFESOSIMIUT 6:17.

1, 2. Guutip naalagaaffianik oqaluussissutiginnittartunik amerlanerusunik pisariaqartitsisoqarnera eqqarsaatigalugu susariaqarpugut?

JIISUSIP inuppassuit anersaakkut pisariaqartitsinerat takugamiuk ajoqersukkani ima oqarfigai: “Katersugassat amerlaqaat sulisussalli ikittuinnaallutik. Taamaattumik katersuinermi naalagaasoq qinnuigisiuk katersuisussanik aallartitseqqullugu.” Jiisusilli taamatut oqaannarani tamatuma kingorna “ajoqersukkani aqqaneq-marluk imminut qaaqquai” oqaluussiartortillugillu, imaluunniit ‘katersuiartortillugit’. (Matthæusi 9:35-38; 10:1, 5) Kingusinnerusukkut “72-it [70-it, 1936] allat qinerpai, siuartillugillu marlukkuutaarlugit” aamma tamatuminnga suliaqaqqullugit. — Lukasi 10:1, 2.

² Ullumikkuttaaq Guutip naalagaaffianik oqaluussissutiginnittartut pisariaqartinneqangaarput. Ukiumi kiffartorfiusumi 2009-mi silarsuaq tamakkerlugu eqqaaniaalluni nalliuttorsiornermut 18.168.323-t najuupput. Tassa inuit Jehovap Nalunaajaasuinit 10 millionit sinnerlugit amerlanerusut najuupput. Aap, narsaatit katersuiffigeriaannaapput. (Johannesi 4:34, 35) Taamaattumik katersuisussat amerlinissaat qinnutigisariaqarparput. Qanorli ililluta qinnut tamanna naapertorlugu iliorsinnaavugut? Qinnummut tamatumunnga naapertuuttumik iliuuseqarsinnaavugut oqaluussinermi pikkorinnerulernitsigut, Guutip naalagaaffianik oqaluussissutiginneqataalluta ajoqersuganngortitsiortoqataallutalu. — Matthæusi 28:19, 20; Markusi 13:10.

3. Guutip anersaava oqaluussisartutut pikkorinnerulernissamut qanoq iluaqutigisarparput?

³ Allaaserisap matuma siuliani sammineqarpoq Guutip anersaava ‘nakimaalluta’ Guutip oqaasiata nalunaajaatiginissaanut qanoq iluaqutigisinnaagipput. (Apustilit Suliaat 4:31) Aamma anersaaq illernartoq oqaluussillaqqinnerulernissamut iluaqutigisinnaavarput. Pikkorinnerulissutigisinnaasatta ilaat tassaavoq atortussamik nalissaqanngitsumik — Jehovap oqaasianik, Biibilimik — taassuma uagutsinnut tunniussaanik atorluaanerput. Taannami anersaaq illernartoq atorlugu pilersitaavoq. (2 Timotheusi 3:16) Tamatumani tusarliunneqartoq Guutimit isumassarsiarititaavoq. Tassa Biibili oqaluussinermi atorluaraangatsigu anersaamit illernartumit siulersortittarpugut. Tamatumanngali qanoq siulersortissinnaanersugut misissunnginnerani Guutip oqaasiata sunniisinnaassusia sammeriartigu.

‘Guutip oqaasia sunniisinnaassuseqarpoq’

4. Tusarliussaq Biibilimiittoq inummik qanoq allannguisitsisinnaava?

⁴ Guutip oqaasia sunniinertoqaaq! (Hebræerit 4:12) Tusarliussaq Biibilimiittoq inuit panaliaannit ipinneruvorlusooq, taakkua ‘patiinik saarnginillu avissaartitsisarluni’. Sallusuissut Biibilimeersoq inuup eqqarsaataanik misigissusiinillu ilorlerpaanik attuisarpoq, taakkununnga sunniuteqartarluni uummammiuinillu qulaarisarluni. Inunnut ima sunniuteqartigisinnaavoq inuttut pissusiinik allannguisitsilluni. (Atuaruk Kolossemiut 3:10). Aap, Guutip oqaasia inuit inuunerminnik allannguissutigisinnaavaat!

5. Sutigut Biibili iluaqutigisinnaavarput, qanorlu kinguneqartumik?

⁵ Aamma Biibili ilisimassusermik nalissaqanngitsumik imaqarpoq. Paasissutissat iluaqutaasut tassaniittut iluaqutigalugit inuit paasisinnaavaat silarsuarmi paasiuminaatsumi matumani qanoq inuussanerlutik. Guutip oqaasia isikkatsinnut naneruaannaanani aamma aqqutitsinni qaammaqqutaavoq. (Tussiaat 119:105) Ajornartorsiuteqaleraangatta imaluunniit ikinngutinik toqqaanermut, aliikkutassanut, suliffimmut, atisalersoriaatsimut allanullu tunngatillugu aalajangigassaqaleraangatta  iluaqutigingaartarparput. (Tussiaat 37:25; Ussatit 13:20; Johannesi 15:14; 1 Timotheusi 2:9) Najoqqutassiat Guutip oqaasianiittut maleruartarutsigit allanut attaveqarluarsinnaassaagut. (Matthæusi 7:12; Filippimiut 2:3, 4) Aqqut aqqutigisarput qaammarsarneqarsimappat aalajangikkatta piffissaq ungasinnerusoq eqqarsaatigalugu uagutsinnut qanoq sunniuteqarsinnaanerat takusinnaassavarput. (1 Timotheusi 6:9) Aamma Biibilimi paasitinneqarpugut Guuti siunissamut qanoq siunertaqarnersoq, aamma siunertamut tamatumunnga naapertuuttumik inuunissamut taanna iluaqutigaarput. (Matthæusi 6:33; 1 Johannesi 2:17, 18) Tassa najoqqutassianit Biibilimiittunit siulersortikkutta inuuneq siunertaqarluartoq nuannaarutigisinnaassavarput.

6. Biibili anersaakkut sorsunnitsinni qanoq sunniinertutigaa?

⁶ Aamma eqqarsaatigeriaruk Biibili anersaakkut sorsunnitsinni sakkutut qanoq sunniinertutigisoq. Paulusip Guutip oqaasia “Anersaap panaanik” taavaa. (Atuakkit Efesosimiut 6:12, 17). Tusarliussaq Biibilimiittoq saqqummiunneqarluaraangat, tamanna inuit Saatanimut anersaakkut inussiaajunnaassutigisinnaavaat. Panaavoq toqutsissutaanani inuunermik annaassissutaasoq. Taamaattumik panamik tamatuminnga atuillaqqinnerulernissarput ilungersuutigisigu.

‘Anersaap panaa’ eqqortumik atoruk

7. Sooq “Anersaap panaanik” atuillaqqissinissaq pingaaruteqarpa?

⁷ Sakkutuup sakkuni sorsunnermi atorluarsinnaassaguniuk sungiusartariaqarpoq sakkuminillu atuillaqqissisariaqarluni. Anersaakkut sorsunnermi peqataaffigisatsinni “Anersaap panaanik” atuinermut tunngatillugu aamma taamaappoq. Paulusi ima allappoq: “Noqqaassutiginiaruk sulisutut kanngusuutissaqanngitsutut oqaatsimik sallusuissutaasumik nassuiaasutut [eqqortumik atuisutut, NV] Guutip saavani misiligaaninni attassinissat.” — 2 Timotheusi 2:15.

8, 9. Biibilimi allassimasunik paasinninnissamut suna iluaqutigissavarput? Assersuuteqarit.

⁸ Oqaluussinermi ‘oqaatsimik sallusuissutaasumik eqqortumik atuinissamut’ suna iluaqutigisinnaavarput? Biibilimi allassimasut pillugit allat oqaluttuussinnaassagutsigit siullermik uagut nammineq paasilluarsimasariaqarparput. Aamma paasilluassagutsigu versit ataqatigiinneri misissortariaqarpavut.

⁹ Misissuisariaqarnerput Paulusip Galatiamiunut allagaanit 5:13-imit erserpoq, taanna ima allakkami: “Qatanngutit, ilissi inussiaajunnaarnermut qaaqqusaavusi. Kisianni inussiaajunnaarsitaaneq atoqinasiuk uinimmut patsisiginiagassatut, asannillusili kiffartorfigeqatigiigitsi.” Sumit-una inussiaajunnaarneq Paulusip eqqartoraa? Ajortimit toqumillu, ajoqersuutinit eqqunngitsunit allarluinnarnilluunniit inussiaajunnaarneq pivaa? Versit ataqatigiinnerinit erserpoq Paulusip ‘inatsisit perloqqussutaanni akiliunneqarluta aniguisitaanitta’ kingunerisaanik inussiaajunnaarneq eqqartoraa. (Galatiamiut 3:13, 19-24; 4:1-5) Allatut inussiaajunnaarneq, Kristusimik malinninnermikkut kiffaanngissuseqalersimanertik, eqqartorpaa. Kiffaanngissusermik  tamatuminnga pingaartitsisut asanninneq kajumississutigalugu imminnut kiffartorfigeqatigiipput. Asannissuseqanngitsut akerleriinnerit ingutsinerillu ulapputigaat. — Galatiamiut 5:15.

10. Paasissutissat suut Biibili eqqortumik paasiumallugu eqqarsaatigisariaqarpavut, aamma paasissutissat taakku qanoq ililluni paasineqarsinnaappat?

¹⁰ Allassimaffik eqqortumik paasiumallugu aamma ilaannikkut pisariaqartarsinnaavoq tunuliaqutaasunik aalajangersimasunik, soorlu kimit allagaanerannik aamma qanga pissutsinilu qanoq ittuni allanneqarsimanerannik, misissuinissaq. Aamma pitsaassaaq paasissallugu allakkat taakku allanneqarsimanerannut suna siunertaanersoq, aamma ajornanngippat tamatuma nalaani innuttaaqatigiinnikkut, ileqqussatigut upperisarsiornikkullu suut ileqqorineqarnerunersut. *

11. Sallusuissutinik Biibilimiittunik nassuiaagaangatta suna mianersuutigisariaqarparput?

¹¹ ‘Oqaaseq sallusuissutaasoq eqqortumik atussagutsigu’ sallusuissutinik Biibilimiittunik eqqortumik nassuiaasinnaanerinnaq naammanngilaq. Soorunami Biibili sallusuissummik illersuinermut atorsinnaavarput, soorluttaaq Jiisusi Diaavulumit usserneqarami taamaaliortoq. Biibilili qunusaarutitut atornaveersaartariaqarparput, anaatarilerlugulusooq. (5 Mosesi 6:16; 8:3; 10:20; Matthæusi 4:4, 7, 10) Apustilip Paulusip oqaaqqissaarutaa una malillugu iliortariaqarpugut: “[Naalagaq] Kristusi uummatissinni illernartissiuk, piareersimajuaritsilu neriuutigisaq ilissinniittoq pillugu isumarsi illersorsinnaaqqullugu nassuiaaqqusisumut kimulluunniit. Taamaaliortassaasili qanilaarlusi, mianerinnittuullusi.” — 1 Petrusi 3:15, 16.

12, 13. Sallusuissut Guutip oqaasianiittoq ‘pallittaalisalianik’ sunik aserorterisinnaava? Assersuuteqarit.

¹² Sallusuissut Guutip oqaasianiittoq ‘eqqortumik atoraanni’ qanoq sunniuteqarsinnaava? (Atuakkit 2 Korinthimiut 10:4, 5). ‘Pallittaalisalianik’, tassa ajoqersuutinik eqqunngitsunik, ileqqupalaanik eqqarsaatersuutinillu inuit naammalluinnanngitsut ilisimassusiannik ersersitsisunik, ‘aserorterissutaasinnaavoq’. Biibili tunngavilersuutinik ‘Guutimik ilisimasaqarnermut assortuisunik’ sunilluunniit aserorterissutigisinnaavarput. Biibilimi ajoqersuutigineqartut allat eqqarsartaatsiminnik sallusuissummut naapertuuttunngortitsinissaminnut iluaqutigisinnaavaat.

¹³ Assersuutigeriartigu arnaq 93-inik ukiulik Indiami najugaqartoq. Meeraallunili toqup kingorna inooqqittarnermik ajoqersuummik upperinninnissamut ilinniartinneqarsimavoq. Ernermi nunami allami najugallip allaqatigisarneratigut Biibilimik atuaqqissaaqatigineqartalerami Jehova taassumalu neriorsuutai pillugit ilikkakkani kajumilluni akuerai. Toqulli kingorna inooqqittarnermik ajoqersuut isummamini ima pigiliussimatigaa, ernini toqusut qanoq pisarnerat pillugu allammat akerliliilluni. Ima oqarpoq: “Allagaatissinni allassimasut ilumoornerat upperiuminaatsittorujussuuara. Upperisarsioqatigiinnimi  tamani ajoqersuutigineqarpoq ilutsinniittoqartoq toqujuitsumik. Upperiuaannarnikuuara timi toqusartoq aamma ilutsinniittoqartoq takussaanngitsumik timini allani 8,4 millioneriarluni ernioqqittaqattaartartumik. Tamanna ilumut eqqunngila? Upperisarsioqatigiit amerlanersaat kukkuppat?” ‘Anersaap panaa’ ‘pallittaalisaliamik’ taama ittumik aserorterisinnaava? Sapaatip-akunnialui tamatuma kingorna Biibili tunngavigalugu tamanna oqaloqatigiissutigisaqattaareerlugu ima allappoq: “Toqu pillugu sallusuissut kiisami paasilerpara. Nuannaarutigeqaara paasillugu toqusunit makititsisoqarpat asasavut takoqqissinnaagivut. Neriuppunga Guutip naalagaaffia qanittukkut tikiutissasoq.”

‘Anersaap panaa’ qularunnaarsitsissutigiuk

14. Oqaloqatigisatsinnik qularunnaarsitsineq qanoq paasisariaqarpa?

¹⁴ Oqaluussinermi Biibilimik atuillaqqissagaanni allassimaffinnik issuaanissaq naammanngilaq. Paulusi qularunnaarsitsisarpoq, uaguttaaq taamaaliortariaqarpugut. (Atuakkit Apustilit Suliaat 19:8, 9; 28:23). Ajoqersuut Biibilimeersoq pillugu qularunnaarsitsigaangatta, taava allat ajoqersuummik tamatuminnga upperinnilersittarpavut oqaatsittalu ilumoornerannik qularunnaarsittarlugit. Ilaatigut qanoq qularunnaarsitsisinnaasugut sammeriartigu.

15. Biibili qanoq ililluta innersuussutigisinnaavarput Biibilimik ataqqinninnerulersitsisumik?

¹⁵ Biibili innersuussutigisaruk ataqqineqalersillugu. Allassimaffik atuarnialeraangatsigu Guutip oqaloqatigiissutigineqartumut qanoq isiginnittaaseqarneranik ilisimanninnerup pingaaruteqassusia erseqqissartariaqarparput. Apeqquteqareerutta pulaagarpullu akereerpat immaqa imatupajaaq oqarsinnaavugut: ‘Guutip tamanna qanoq isigineraa takoriartigu.’ Imaluunniit ima aperisinnaavugut: ‘Guutip tamanna qanormita isumaqarfigaa?’ Allassimaffimmik atuaannginnitsinni taamatupajaaq oqartarutta Biibilip Guutimeersuunera erseqqissartarparput, aamma pulaakkap Biibilimik ataqqinninnerulernissaanut iluaqutaassaaq. Taamaaliornissaq ingammik pingaaruteqarpoq Guutimut uppertunut, Biibilimili ajoqersuutigineqartunik ilisimanninngitsunut, oqaluussigaangatta. — Tussiaat 19:8-11.

16. Allassimaffiit eqqortumik nassuiarnissaannut suna iluaqutigisinnaavarput?

¹⁶ Allassimaffiit atuaannarnagit nassuiakkit. Paulusip allanut ilinniartitsissutigisani ‘nassuiartarpai erseqqissartarlugillu’. (Apustilit Suliaat 17:3) Allassimaffimmi ataatsimi amerlanertigut arlallit maluginiarneqarsinnaasarput, taamaattumillu aalajangersimasut oqaloqatigiissutigisatsinnut tunngassuteqartut erseqqissartariaqarsinnaasarput. Taamaaliortoqarsinnaavoq oqaatsit pingaarnerit uteqqinnerisigut imaluunniit pulaakkap oqaatsit pingaarnerit uteqqinniassammagit apeqquteqarnikkut. Taava allassimaffiup ilaata tamatuma qanoq paasisariaqarnera nassuiarsinnaavarput. Naggataatigut pulaagaq allassimaffiup imminut qanoq tunngassuteqarneranik paasinninnissaanut ikiorsinnaavarput.

17. Allakkat atorlugit qanoq ililluta qularunnaarsitsisumik eqqarsalersitsiniarsarisinnaavugut?

¹⁷ Allakkat atorlugit qularunnaarsitsisumik eqqarsalersitsiniarsarigit. Ilungersorluni kajumissaarilluni paasiuminartumillu tunngavilersuilluni Paulusip inuit “oqaloqatigisarpai Allakkat najoqqutaralugit”. (Apustilit Suliaat 17:2, 4) Paulusip pisimaneratut uummatinik angusinissarput ilungersuutigaarput. Pulaakkatsinnik inuttut soqutiginninnitsinnik ersersitsisumik inussiarnersumik apeqquteqartarnitsigut uummammiuinik ‘qalooraasinnaavugut’. (Ussatit 20:5) Ingasaassinaveersaarit. Tunngavilersuutitit paasiuminartumik saqqummiutikkit. Taakku aamma  uppernarsaatinik qularunnaarnartunik tunngaveqartariaqarput. Oqaatsivut Guutip oqaasianik tunngaveqarluartariaqarput. Allassimaffimmik ataatsimik nassuiaallunilu paasiuminarsaaneq pitsaaneruvoq allassimaffiit marluk pingasulluunniit tulleriiginnarlugit atuarnissaaninngarnit. Aamma uppernarsaatit tunngavilersuutigisatsinnik Biibilimeersunik uppernarnerulersitsisinnaapput. Ilaannikkut pisariaqarsinnaasarpoq pulaakkap paasiniaassunnerunissaa. Arnap 93-inik ukiullip eqqaariikkatta tarnermik (imaluunniit anersaamik) toqujuitsumik ajoqersuutip sooq taama nalinginnaatigineranik paasinninnissani pisariaqartippaa. Ajoqersuutip tamatuma sumit aallaaveqarnera silarsuarmilu upperisarsioqatigiit amerlanersaannit qanoq ililluni akuerineqarsimanera paasigamiuk aatsaat tamatumunnga tunngatillugu Biibilimi ajoqersuutigineqartut qularutigiunnaarpai. *

Guutip oqaasianik atuillaqqinnerit attatiinnaruk

18, 19. Sooq “Anersaap panaanik” atuillaqqinnerulertariaqarpugut?

¹⁸ Biibilimi ima allassimavoq: “Silarsuup matuma pissusia nikittarpoq.” Aamma allassimavoq ‘inuit ajortut ajortumut nakkaakkiartuinnartussaasut’. (1 Korinthimiut 7:31, NV; 2 Timotheusi 3:13) Taamaattumik pingaaruteqarpoq ‘pallittaalisalianik aserorteriuarnissarput’ “Anersaap panaanik, tassa Guutip oqaasianik” atuinitsigut.

¹⁹ Guutip oqaasia pigigatsigu tusarliussarlu sunniuteqarluartoq tamatumaniittoq ajoqersuutinik eqqunngitsunik aserorterinermut eqqortuliorusuttunillu killiinissamut atorsinnaagatsigu nuannaaqaagut! Pallittaalisaliaqanngilaq tusarliussamit matumannga sunniuteqarluarnerusinnaasunik. Taamaattumik Guutip naalagaaffianik oqaluussissutiginninnermi Guutip suliassiissutigisaani “Anersaap panaanik” atuillaqqinnerulerumalluta ilungersorluta suliniuteqarta.

[Quppernerup ataani ilanngussat]

Suna ilikkarpiuk?

• Guutip oqaasia qanoq sunniisinnaassuseqartigaa?

• ‘Oqaaseq sallusuissutaasoq’ qanoq ililluta ‘eqqortumik atorsinnaavarput’?

• Tusarliussaq Biibilimiittoq ‘pallittaalisalianut’ qanoq sunniuteqarsinnaava?

• Qanoq ililluta qularunnaarnarnerusumik oqaluussisinnaavugut?

[Atuaqqissaarnermi apeqqutit]

[Qupp. 18-mi ungalusaq/​assiliartaq]

Guutip oqaasia qularunnaarsitsisumik atorsinnaavarput . . .

▪ Biibilimik ataqqinnilersitsinitsigut

▪ allassimaffinnik nassuiaanitsigut

▪ inuit uummataat angullugit eqqarsalersinniarnerisigut

[Qupp. 17-mi assiliartaq]

“Anersaap panaanik” atuillaqqinnerulertariaqarpugut