Guutip oqaasia ilinniarfigiuk

Guutip inatsisai qanoq iluaqutigisinnaavavut?

Apeqqutit ataaniittut eqqarsaatigisarpigit? Akissutaat illit nammineq Biibilinni qanoq nassaarisinnaaneritit allaaserisami matumani sammineqarpoq. Akissutissarsiorneranni Jehovap Nalunaajaasuisa ikiorusuppaatsit.

1. Sooq Guuti naalassavarput?

Guutimut naalakkutta pissusissamisuussaaq — taannami pinngortitsisorigatsigu. Allaat Jiisusip Guuti naalattuaannarpaa. (Johannesi 6:38; Saqqummersitat 4:11) Guutip inatsisai naalakkutsigit ersersissinnaavarput taanna asallutigu. — Atuaruk 1 Johannesi 5:3.

Jehovap Guutip inatsisai tamarmik uagutsinnut iluaqutaapput. Taakku iluaqutigalugit inooriaaseq pitsaanerpaaq suunersoq siunissamilu inuuneq naassaanngitsoq qanoq angusinnaaneripput ilinniartinneqarpugut. — Atuakkit Tussiaat 19:8, 12; Esaja 48:17, 18.

2. Guutip inatsisai peqqissutsitsinnut qanoq iluaqutaappat?

Aalakuunnginnissamut Guutip inatsisaa toqussutaasumik nappaateqalernermut ajunaarnissamullu illersuutigaarput. Imigassartorpallaarneq pinngitsuuisinnaajunnaarnermik sianiitsumillu pissusilersornermik kinguneqarsinnaavoq. (Ussatit 23:20, 29, 30) Jehovap ingasaassinata imigassartortarnerput akueraa. — Atuakkit Tussiaat 104:15; 1 Korinthimiut 6:10.

Jehovap sinnganermut, nununani kamannermut ajoqutaasunillu allanik pissusilersornernut mianersoqquaatigut. Siunnersuutaanik maleruaagutta peqqissutsitsinnut iluaqutaassaaq. — Atuakkit Ussatit 14:30; 22:24, 25.

3. Guutip inatsisai qanoq illersuutigisinnaavavut?

Guutip inatsisaani katissimanani atoqatigiinneq inerteqqutigineqarpoq. (Hebræerit 13:4) Aappariit inatsimmik tamatuminnga maleruaasut toqqissisimanerusarput meeqqaminnullu pitsaanerusumik avatangiiseqartitsisarlutik. Katissimananili atoqateqaraanni nappaateqalernermik, avinnermik, nakuusernermik, misigissutsikkut anniarnermik kisimiillunilu pilersuinermik kinguneqarsinnaavoq. — Atuakkit Ussatit 5:1-9.

Pissutsit katissimanani atoqateqarnermut ussernartut ingalassimagutsigit Guutimik ikinnguteqarnerput illersussavarput. Taamaaliorutta aamma allanik ajoqusiissanngilagut. — Atuakkit 1 Thessalonikamiut 4:3-6.

  4. Inuunermik ataqqinninneq qanoq iluaqutigaarput?

Inuit inuunermik, Guutip tunissutaanik, ataqqinnittut pujortartarunnaarnertik inuunermilu allanik navianaataasunik pinngitsuuisinnaannginnermut taamaatitsinertik peqqissutsitsiminnut iluaqutigissavaat. (2 Korinthimiut 7:1) Guutip naartu naleqangaartutut isigaa. (2 Mosesi 21:22, 23) Taamaattumik piaaraluta naartuertitsissanngilagut. Aamma Guutip inuunermik isiginnittaasiatut isiginnittaaseqartut suliffimminni, angerlarsimaffimminni biiliminnilu isumannaallisaassapput. (5 Mosesi 22:8) Aamma pissanganartorsiorniaannarlutik inuunertik navianartorsiortissanngilaat, inuuneq Guutimit tunissutaammat. — Atuaruk Tussiaat 36:10.

5. Aap illernartuuneranik ataqqinninneq qanoq iluaqutigaarput?

Aak illernartuuvoq, Guutimmi uumassusillit inuunerannut assersuutaanerarpaa. (1 Mosesi 9:3, 4) Guutip inatsisaa — aap nalingata inuunerullu nalingata assigiinnerat pillugu — uagutsinnut iluaqutaavoq. Qanoq? Ajortimik isumakkeerfigineqarnissamik ajornarunnaarsitsimmat. — Atuakkit 3 Mosesi 17:11-13; Hebræerit 9:22.

Jiisusi naammalluinnartuummat taassuma aava naleqarluinnartuuvoq. Jiisusip inuunerminut assersuutaasoq, aani, Guutimut sassaappaa. (Hebræerit 9:12) Aava kuineqartoq pissutigalugu naassaanngitsumik inuunissamut periarfissinneqarpugut. — Atuakkit Matthæusi 26:28; Johannesi 3:16.

Paasisaqarnerorusukkuit atuakkit kapitali 12 aamma 13 atuakkami uani, Biibilimi sorpiaat ajoqersuutigineqarpat?, Jehovap Nalunaajaasuinit saqqummersinneqartoq.