Spaniap avannaani illoqarfimmi Bilbaop eqqaani pigissaarfiun­ngitsumi inunngorpunga. Qatanngu­tigiinni sisamaasuni angajulliup tulleraanga. Ilaqutariiulluta katuuliuvugut upperluartut, ullullu tamaasa uanga naalagiartarlunga. 23-nik ukioqarlunga ilinniartitsisun­ngorpunga — ukiut 40-t nuannaringaarlugu atorfigaara. Ilinniartitsis­sutissanik assigiinngitsunik ilinniartitsisarpunga, katuullilli upperisaat pillugu meeqqanut ilinniartitsisarneq nuannariner­paasaraara. Unnukkut ajoqitut sulisarpunga niviarsiaqqat siullermeerlutik nerliiviliarnissaannut piareersaa­qataallunga.

Ukiut aqqaneq marluk pilluarlunga katissimareerlunga uillarama meeqqakka niviarsiaqqat sisamat kisima pilersugassarilerpakka. Taamanikkut 33-innarnik ukioqarpunga. Upperisatsinni tuppallersaatissarsioraluarpunga, apeqqutilli soorlu uku eqqarsaatinni uteqattaartuarput: ‘Kristusip annaatereersimappatigut sooq inuit suli toqusarpat? Inuit ajunngitsut tamarmik qilaliartussaappata sooq taava Guutip naalagaaffiata tikiunnissaa qinnutigisarparput?’ Eqqarsaatiginerpaasarali unaavoq: ‘Toqugutta Guutip eqqartuunniarpatigut taava sooq, inaarutaasumik eqqartuunniarluta, qilak, inneq eqqiarfik imaluunniit anniarfik kingusinnerusukkut qimassavarput?’

Apeqqutit taakku palasinut assigiinngitsunut apeqqutigisarpakka. Ilaata ima akivaanga: “Naluara. Biskopi aperiuk. Pingaaruteqaqigami? Guuti upperigaluarpiuk? Eqqarsarpallaarunnaarniarit!” Akissutissarsiortuarpungali. Kingornatigut oqalugiaatit assigiinngitsut jesuitterinit, pinsisiortunit aamma gnostikerinit oqalugiaatigineqartut tusarnaariartarpakka. Kialuunniilli apeqqutikka naammaginartumik akisinnaanngilai.

60-it sinnerlugit ukioqalereersunga niviarsiaqqap atuartup arfineq marlunnik ukiullip Jehovap Nalunaajaasuisa ataatsimiinnerannut qaaqquaanga. Tassani takusakka tusakkakkalu nuannaraakka, taamanili ulapittuullunga inuugama Jehovamut Nalunaajaasut attavigeqqinngilakka. Ukiut arlalialuit qaangiuttullu Jehovap Nalunaajaasui marluk, Juan aamma Maite, matunnut kasuttorput. Biibilimik atuaqqissaaqatigiinnermik kingunilimmik qaammatini pingasuni aappariit taakkua apeqquterpassuakka akisaqattaartarpaat.

Atuaqqissaaqqinnissatsinnut qilanaartaqaanga. Jehovap Nalunaajaasuisa oqaasii ilumoornersut qulakkeerniarlugit Biibilit nutsikkat  assigiinngitsut pingasut atorlugit misissueqqissaartarpunga. Sivitsunngitsoq paasilerpara upperisamut tunngatillugu ukiorpassuarni qanoq paatsiveerusimaartigisimallunga. Biibilimi paasisamma siusinnerusukkullu nalunngeriikkamma assigiinngissuteqangaarnerata isumakkut eqqissiviilliortippaannga. Attorteqaanga. Soorlulusooq upperisara sorlaqarluartoq, sorlai ilanngullugit nunamit nusunneqartoq.

Taava uineqqiutiga napparsimalerpoq toqullunilu. Malitsigiin­nangajallugu soraarne­russutisia­qalerpunga illoqarfillu Bilbao qimakkallarlugu. Juan Maitelu aamma nuupput. Ajoraluartumik Jehovap Nalunaajaasuinik Biibilimik atuaqqis­saaqate­qartarnera unitsippara. Qamuunali nalunngilara erlinnartuummik nassaarlunga, taannali puiunngisa­annarpara.

Ukiut 20-t missaat qaangiummata, 82-inik ukioqartunga, Juan Maitelu Bilbaomut uterput kingusinnerusukkullu pulaarlutik. Takoqqikkakkit nuannaaqaanga! Paasilerpara Jehovap puiorsimanngikkaanga, Biibilimillu atuaqqissaaqatigeqqittalerpaannga. Apeqqutigeriikkakka uteqqeqattaartaraluarikka Juanip Maitellu naammagittarfigaannga. Upperisarigaluannut misigissutsit kipitinniassallugit aamma sallusuissutit Biibilimeersut ikinngutinnut ilaquttannullu nassuiarsinnaalernissaannut piginnaanngorsarusukkama Biibilimi tunngavilersuutit tusaqqeqattaarnissaat pisariaqartissimavara.

87-inik ukioqarlunga kiisami kuisinnera inuuninni pilluarnarnerpaatut misigaara. Jehovap Nalunaajaasuisa ataatsimeersuarnerata ilaanni kuisippunga. Utoqqaanertaq kristumiu Biibili tunngavigalugu uagutsinnut, kuisittussanut, tulluarsakkamik oqalugiarpoq. Oqalugiaat tusarnaartillugu soorlulusooq Jehova toqqaannartumik uannut oqaluttoq. Kuisereerama Jehovap Nalunaajaasorpaaluisa pilluaqquniarlunga ornippaannga — naak amerlanerit ilisarisimanngikkaluaraannga!

Nalunngit­tuaannar­nikuuara Jiisusi ‘aqqutaasoq’. (Johannesi 14:6) Biibilimilli atuaqqissaar­tarnikkut, Jehova, Jiisusikkut qanilline­qartartoq ilikkarpara. Maannakkut Guutimut qinugaangama Ataatatut ikinngutitullu asannittutut isigisarpara. Atuagaq Kom nær til Jehova * inuuninnik allannguil­luinnarpoq. Atuaqqaarakku unnuup ataatsip ingerlanerinnaani naavara! Jehovap naakkittartuunera paasigakku killitsissutigeqaara.

Upperisamik eqqortumik ujaasiuarsimanera kingumut eqqarsaatigileraangakku Jiisusip oqaasii uku eqqarsaatigisarpakka: “Qinujuaritsi, tunineqassaasi taava; ujarlertuaritsi, nanisissaasi taava; kasuttortuaritsi, mappiunneqassaasi taava.” (Matthæusi 7:7, NW) Apeqqutikka kiisami akissutissarsigakkit ilikkakkakkalu pillugit inoqatikka oqaluttuussinnaalerakkit nuannaarutigingaarpara.

Maannakkut 90-ileereerlunga misigivunga Jehova pillugu suli ilikkagassarpassuaqarlunga. Naalagaaffilersaarfimmi — pingaarutilinnik ilinniartinneqartarnera aamma nuannersumik qatanngutinik katerisimaaqateqartarnera pissutigalugit ataatsimiinnerit tamaasa immikkut ittutut isigisarpakka. Paratiisimi neriorsuutigisaasumi ilinniartitsisunngoqqinnissara qilanaaraara. (Saqqummersitat 21:3, 4) Asasakka, maannakkut iliveqarfimmi qasuersaartut, makippata takoqqinnissaat qilanaarinerpaavara. Biibilip sallusuissutaanik ilinniartitsinissannut periarfissaqalissaanga. (Apustilit Suliaat 24:15) Jehovap utoqqarsuanngorlunga uannut tunissutaa naleqangaartoq pillugu makittut oqaluttuunnissaannut qilanaaqaanga!