Inunngorama angajoqqaakka Spaniap avannaata kitaani illoqarfeeqqami Galiciami nunaateqarfeqarput. Qatanngutigiit arfineq-pingasuusut sisamaraannga. Ilaqutariittut pilluarnerput nuannaarutigaarput. Taamani Spaniami ilaqutariinni qitornaasut ilaat minnerpaamik ataatsip palasitut ilinniartarnera mattuttunngortarneraluunniit nalinginnaavoq. Uagut ilaquttatsinni meeqqat pingasut taamaaliorput.

13-inik ukioqarlunga angajora Madridimi mattuttunngoqatigivara. Mattuttooqatikka ikinngutinnersuunngillat. Ikinngutigiittoqanngilaq — taamaallaat inatsisit malinneqarlutillu qinusoqartarlunilu arnat imminut naaggaartuarput. Ullaaralaakkut sunnguamilluunniit eqqarsaateqarsinnaanngikkaluarlunga inimi naalagiartarfimmi eqqarsaatiginneqqissaarniarluta katersuuttarpugut. Taamaalioreeraangatta latiinerisut tussiartarlutalu nerliiviliartarpugut. Paasisaqanngilluinnartarlungalu Guuti uannit ungasittorujussuusorisarpara. Ullut tamarmik nipaalluinnarfiusarput. Allaat angajoralu naapikkaangatta imminut ima oqarfigiinnaqqusaasarpugut: “Pilluarna minguilluinnartutit Maria.” Mattuffimmi niviarsiaqqat nerereernerup kingorna taamaallaat minutsini 30-ni oqaloqatigiissinnaasarput. Atukkakka pilluarlunga peroriartorfinnit allaanerulluinnarput! Kiserliortutut misigisarlungalu qiakulasarpunga.

Guutimut qanittutut misiginikuunngisaannaraluarlunga 17-inik ukioqarlunga mattuttunngorniarlunga uppernarsaavunga. Piumaffigineqarnittulli iliuinnarpunga, tamatumalu kingunitsianngua Guutimit toqqagaasimanerlunga apeqqusertalerpara. Mattuttut oqartarput taamatut qulartut anniarfimmi ikuallanneqartussaasut! Qulartuarsinnarpungali. Nalunngilara Jiisusi Kristusi allanit avinngarusimanani inunnik ilinniartitsinermik ikiuinermillu ulapputeqartuarsimasoq. (Matthæusi 4:23-25) 20-nik ukioqarlunga mattuttutut inuuginnarnissannut pissutissaaruppunga. Arnat mattuttut pisortaata tupaallaatigeqisannik oqarfigaanga mattuttutut inuuginnarnissara qularigukku piaarnerpaamik aallartariaqartunga. Ilimagaara allanik sunniisinnaanera annilaangagigamiuk taamatut oqarfigigaanga. Taamaattumik mattuttuujunnaarpunga.

 Angajoqqaamma angerlarnera paasilluarsinnaavaat. Illoqarfeeqqatsinnili suliffissaqannginnama aqqalussama ilaat ornillugu Tysklandimut nuuppunga. Aqqaluara Spaniamiut qimarngusut kommunistiinut ilaasortaavoq. Sulisartut pisinnaatitaaffiinik arnallu naligiissitaanissaannik sorsuutiginnittunik peqateqartarnera nalerisimaalissutigaara. Taamaattumik kommunistinngorlungalu kingusinnerusukkut kommunistimik uinippunga. Kommunistit atuagassiaannik agguaasseqataasarama akerliussutsimillu takutitseqataasarama siunertaqarluartumik suliaqartutut misigivunga.

Piffissalli ingerlanerani nikallungaqqilerpunga. Misigivunga kommunistit ilinniartitsissutigisatik naapertorlugit iliuuseqarsinnaanngitsut. Qularnerulerpungalu kommunisteqatima inuusuttut ilaasa 1971-imi Spaniamiut Frankfurtimi konsulateqarfiat ikuallammassuk. Taamaaliorput Spaniami kisermaassisutut naalakkersuinerup nalaani naapertuilluanngitsoqarneranut akerliunertik takutinniarlugu. Taamatulli kamannermik ersersitsineq uanga eqqunngitsutut isigaara.

Ernertaarama uiga oqarfigaara kommunistit ataatsimiittarnerinut najuuttarunnaarniarlunga. Ikinngutigisimasannit pulaarneqarneq ajoratta kiserliortorujussuanngorpunga. Inuunerup siunertaa eqqarsaatigisalerpara. Innuttaaqatigiit atugassarititaannik pitsanngorsaaniarneq ilumut imminut akilersinnaava?

1976-imi nalunaajaasut Spaniamiut marluk matutsinnut kasuttoriarlutik Biibililersaarutinik tunivaannga. Pulaaqqimmannga naalliuttoqarnera, naligiinngisitaasoqarnera nunarsuarmilu naapertuilluanngitsoqarnera pillugit apereqattaarpakka. Biibili atorlugu tamatigut akisarnerat tupaallaatigaara! Biibilimik atuaqqissaaqatigineqartarnissannut kajumillunga akuersivunga.

Aallaqqaammut ilikkakkakka nuannaarutigigaluarlugit uummammiliutinngilakka. Kisianni Jehovap Nalunaajaasuisa naalagaaffilersaarfianni uigalu ataatsimeeqataasaleratta atukkavut allanngorput. Taamani marlunnik meeraqarpugut. Nalunaajaasut aqqusaartarlutalu ataatsimiinnerit nalaanni qitornatsinnik paarseqatigisarpaatigut. Nalunaajaasut nuannarilerpakka.

Taamaakkaluartorli upperisarsiornermut tunngasut suli apeqqusertarpakka. Spaniami ilaquttakka tikeraarniarlugit aalajangerpunga. Akkama, palasiusup, Biibilimik atuaqqissaartarunnaaqqullunga oqaluukkaluarpaanga. Spaniamili nalunaajaasut ikiorluarpaannga. Taakkua Tysklandimi nalunaajaasut pisarnerattut apeqqutikka Biibili atorlugu akivaat. Aalajangerpunga Tysklandimut uteruma Biibilimik atuaqqissaartaleqqinniarlunga. Uiga Biibilimik atuaqqissaartarunnaaraluartoq atuaqqissaartarninnik ingerlatsiinnarpunga. 1978-imi Jehovap Nalunaajaasuisa ilaattut kuisippunga.

Biibilimi sallusuissutinik eqqorluartumik ilisimanninnera inuuninni siunertaqalissutigalugulu anguniagaqalissutigaara. Assersuutigalugu Petrusip allagaani siullerni 3:1-4-mi nuliaasut ataqqinningaarlutik uiminnut ‘naalatsigitinnissaannut qanilaartuunissaannullu, tamanna Guutip isaani erlinnaqimmat’, kajumissaarneqarput. Najoqqutassiat taamaattut nuliaalluarnissannut anaanaalluarnissannullu iluaqutigaakka.

Nalunaajaasunngoramali ukiut 35-ngajaat qaangiutereerput. Nunarsuaq tamakkerlugu qatanngutigiissuarnut ilaanera qitornamalu tallimaasut ilaat sisamat Guutimut kiffartoqatigineri pilluaatigalugulu tipaatsuutigaara.