SIORNAAK Koreamiut aviisianni The Chosun Ilbo-mi tiguartinnartumik ima qulequtaqarpoq: “‘Arnatsialak Shim Cheong’, Jiisusi pillugu ilisimasaqanngitsoq — anniarfimmut piva?”

Qulequtaq oqallissaarerpaluppoq, tassami Shim Cheong tassaavoq Koreamiut oqaluttuatoqaanni arnaq inuusuttoq asaneqartoq ataatani tappiitsoq ikiorniarlugu inuunerminik pilliutiginnittoq. Ukiut ingerlaneranni nersorneqartaqaaq. Shim Cheong Koreami panittut tunniusimasutut maligassaalluartutut isigineqarpoq.

Inuppassuit isumaqarput inuup taamaattup kristumiutut kuisimannginnera pissutigiinnarlugu anniarfimmi pillarneqarsimagaluarpat tamanna naapertuilluanngitsuusimassagaluartoq, allaat ajuallannartuusimassagaluartoq. Ilami Kristusi pillugu tusarliussap illoqarfeeqqami arnap taassuma najugarisaani tusarliunneqarnera sioqquterujussuarlugu oqaluttuaq taanna pisimasuutinneqarpoq.

Aviisimi palasip apersorneqarnera ilaavoq. Ilaatigut aperineqarpoq Jiisusi pillugu ilinniarnissaminnut periarfissaqarnatik toqusimasut tamarmik anniarfimmut pisussatut eqqartuunneqarsimanersut. Ima akivoq: “Naluarput. [Inunnut taamaattunut] Guutip atugassarititaani aqqutissaqarumaarnera ilimagiinnarsinnaavarput.”

Katuullit qinerlerfissiaanni ima allassimavoq: “Annaanneqassagaanni kuisinneq pisariaqarpoq. Soorlu Kristusi oqartoq inuk imermit Anersaamillu Illernartumit erniusimanngikkuni Guutip naalagaaffianut pisinnaassanngilaq (Jn 3.5).” (The New Catholic Encyclopedia) Tamanna pissutigalugu isumaqartoqarpoq kuisimanatik toqusut anniarfimmut pisinneqassasut allatulluunniit naalliutsinneqassasut.

Inuit allarpassuit isuma tamanna ingasagaat. Inuimmi millionillit Biibilimik ilisimasaqarnatik toqupput. Naassaanngitsumik anniartitaassappat? Tamanna pillugu Biibilimi qanoq allassimasoqarpa?

Biibilimi erseqqissarneqarpoq Guutip inuit piumasaqaatiminik ilisimasaqaratik inuusut pillarnavianngikkai. Apustilit Suliaat 17:30-mi allassimavoq ‘Guutip ullut imminik ilisimanninngiffiusut ilaginnaaginnarfigisimagai’. Taavami Guuti pillugu ilinniarnissamut periarfissaqaratik toqusimasut Biibilimi qanoq neriuutissaqartinneqarpat?

Tamanna akissutissarsisinnaavarput Jiisusip pinerluttut sanimini toqulersut aappaanut oqaasiini. Taanna Jiisusimut ima oqarpoq: “Naalagaaffinnut piguit eqqaaginga.” Jiisusip ima neriorsorpaa: “Paratiisimeeqatigiumaarparma.” — Lukasi 23:39-43.

Jiisusip neriorsorpaa qilaliassasoq? Naamik. Qilaap naalagaaffianut pissagaanni imermit anersaamillu ‘ernioqqissimasariaqarpoq’, angullu taanna ‘ernioqqissimanngilaq’. (Johannesi 3:3-6) Jiisusip pinerluttoq neriorsorpaa inuuleqqissasoq — paratiisimi. Angutip taassuma juutiugami nunarsuarmi Paratiisi — Naatsiivik Edeni — Biibilip atuagartaani siullermi allaatigineqartoq tusarsimassagunarpaa. (1 Mosesi 2:8) Jiisusip taama neriorsormani angutip paratiisimut, tamanna nunarsuarmi pilersinneqaqqippat, makititaanissamik neriuut upperilluinnalerpaa.

Biibilimi neriorsorneqarpugut “iluartut iluaatsullu” makititaassasut. (Apustilit Suliaat 24:15) ‘Iluaatsut’ tassaapput inuit Guutip piumasaa ilisimannginnamikku taassuma najoqqutassiaanik iluartunik maleruaanngitsut. Jiisusip pinerluttoq iluaatsoq oqaloqatigisani makitissavaa, aamma inuit allat millionillit, immaqa milliardillit, ilisimanninnatik toqusut makitissavai. Taava nunarsuarmi paratiisissami Guutip piumasaqaataanik ilinniartinneqassapput Guutillu peqqussutaanik maleruaanermikkut taassuminnga asanninnerminnik ersersitsinissaminnut periarfissaqassallutik.

Iluaatsut makititaanermik kingorna eqqartuunneqarpata siornatigut iliuuserisimasaat tunngavigineqassappat?  Naamik. Biibilimi ima allassimavoq: ‘Toqusoq ajortip sussariunnaarpaa.’ (Romamiut 6:7, 1936) Iluaatsut ajortuliornermikkut akiitsui toqugamik akilerneqarput. Taamaattumik eqqartuunneqarunik toqunnginnerminni ilisimanninnatik iliuuserisimasaat tunngavigineqarnatik makititaanermik kingorna iliuuserisaat tunngavigineqassapput. Tamanna qanoq iluaqutigissavaat?

Iluaatsut makititaanermik kingorna Guutip inatsisaanik, mappersakkat assersuutaasut mapperneqarpata saqqummersinneqartunik, ilinniarnissaminnut periarfissaqassapput. “Suliatik naapertorlugit”, tassa Guutip inatsisaanik maleruaanersut maleruaannginnersulluunniit apeqqutaatillugu, eqqartuunneqassapput. (Saqqummersitat 20:12, 13) Iluaatsut amerlasuut aatsaat piffissami tamatumani Guutip piumasaanik ilinniarnermikkut tamatumunngalu naapertuuttumik iliuuseqarnermikkut naassaanngitsumik inuunissaminnut periarfissaqalissapput.

Ajoqersuut tamanna Biibilimeersoq inuppassuit Guutimik upperinnileqqissutigisimavaat, ilaatigut Yeong Sugip katuuliulluartutut perorsarneqarsimasup. Taanna palasinik ilaqutaqarpoq. Mattuttunngorusukkami mattuffimmiilerpoq, tassaniitillunili takusartakkani pakatsissutigisaramigit mattuffik qimappaa. Aammami anniarfimmik ajoqersuut akuerisinnaanngilaa isumaqarami innermi anniartitsineq naapertuilluartuliornerunanilu asannittuliornerunngitsoq.

Taava Jehovap Nalunaajaasuisa ilaata oqaatsit Biibilimeersut uku Yeong Sugimut takutippai: ‘Uumassuseqartut nalunngilaat toqusussaagamik, toqungasulli sunnguamilluunniit ilisimasaqanngillat! Pissarsiassaqanngillat.’ (Oqaluussisartup oqaasii 9:5) Nalunaajaasup nassuiarpaa Yeong Sugip siuaasai anniarfimmi anniartitaanngitsut. Taakkumi toqumi sinipput makititaanissamik tungaannut.

Yeong Sugip nalunnginnamiuk inuppassuit sallusuissut Biibilimeersoq tusarsimanngisaannaraat Jiisusip oqaasii Matthæusi 24:14-imi allassimasut uku killitsissutigai: ‘Naalagaaffimmik iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.’ Maanna neriuut nuanningaartoq Biibilimeersoq allanut tusarliullugu nutaarsiassamik nuannersumik oqaluusseqataasarpoq.

Biibilimi allassimavoq “Guuti kinaassusersiortuunngitsoq, tassaasorli inuiaqatigiinni kikkuusuniluunniit imminik mianerinnittumik iluartuliortumillu ilassinnittartoq”. (Apustilit Suliaat 10:34, 35) Guutip ‘iluarnermik naapertuilluarnermillu nuannarisaqartup’ taamatut naammalluinnartumik naapertuilluartuunissaa tamatta naatsorsuutigisinnaavarput. — Tussiaat 33:5.