Biibilip nalaani angutit ilaat pillaatitut imaluunniit tigusaasimasut inussianngortinneqarsimasulluunniit angutaassutaajagaasarput. Angutit tatigisaasut angutaassutaajagaasimasut kunngikkormiuni arnat ineqarfianni nakkutiginnittuutinneqartarput. Assersuutigalugu angutit angutaassutaajagaasimasut Hegaji aamma Sha’agazi Persiap kunngiata Ahasverusip, tassaasorineqartup Xerxesip I-p, nuliaanik panerfaanillu nakkutiginnittuutitaapput. — Esteri 2:3, 14.

Mosesip inatsisaasa atuunnerisa nalaani angutaassutaajagaasimasut Guutip innuttaasa ilagiivinut ilanngussinnaatitaanngillat. (5 Mosesi 23:2) Israelikkut takornartallu nunasisimasut arlaannaalluunniit Israelimi kunngikkormiuni kiffartulertussat angutaassutaajarneqartarsimanerannut takussutissaqanngilaq. Mosesip inatsisai naapertorlugit inussiat angutaassutaajagaanatik kipineqartartussaapput. Kangiamiulli guutimik nalusut meeqqat sorsunnermi tigusat ilaannik angutaassutaajaasarneq ileqqoraat.

Jiisusi siunissami eqqartuussiffissaq eqqartoramiuk ima oqarpoq: “Inuup Ernera naalannassutsimini tikiukkuni ... [Inuiaqatigiit avissaartissavai], soorlu savanik paarsisup savat savaasanit avissaartittarai.” (Matthæusi 25:31, 32) Sooq paarsisut taakkuninnga avissaartitsisarpat?

Savat savaasallu ullukkut ataatsimut ivigartoqatigiitsinneqartarput. Unnuakkut ungalusamiitinneqartarput uumasunut kiisortunut, tillinnianut nillimullu illersorniarlugit. (1 Mosesi 30:32, 33; 31:38-40) Uumasut assigiinngitsut taakku immikkut ungalusaliamiitinneqartarput savat maleruutianerusut, ingammik savat arnavissat savaaqqallu, savaasanit qaasunnerusunit ajoquserneqaqqunagit. Savat “piaqqiortut, immuiarneqartut kissarneqartullu” savaasanit paarsisumit aamma avissaartinneqartarput, atuakkami All Things in the Bible-mi allassimavoq. Aap, inuit Israelimi savaateqarfiusumi inuusut nalunngisaat tunngavigalugit Jiisusi assersuusiorpoq.