ISRAELIMI Judamilu kunngit nalaanni angutit toqqakkat — pruffiitit — sassartarput. Taakku, Guutip tusarliussaanik tusarliisut, immikkorluinnaq ittumik uppissuseqarlutillu sapiissuseqarput. Guutip pruffiitiisa eqqartugaat pingaarutillit sisamat sammeriartigik.

1. Jerusalemip piuneerunneqarnissaa. Tamatuma pinissaa sioqquterujussuarlugu Guutip pruffiitiisa — ingammik Esajap Jeremiallu — Jerusalemip piuneerunneqarnissaa inuerunnissaalu aarlerisaarutigisalerpaat. Takorlooruminartumik ersersippaat illoqarfimmi tassani najugallit sooq Guutimit kamaanneqarnersut. Jerusalemip Jehovamut sinniisuuneraanerata eqqunngitsuunera tassani najugallit eqqunngitsumik upperisarsiornikkut ileqqoqarnerannit, peqquserluttuunerannit nakuusertuunerannillu uppernarsarneqarpoq. — 2 Kunngit 21:10-15; Esaja 3:1-8, 16-26; Jeremia 2:1–3:13.

2. Pallorfiginninnerup minguitsup pilerseqqinneqarnissaa. Guutip innuttai ukiuni 70-ini Babylonimi aallarussaaqqareerlutik aniguisinneqassapput. Nunaminnut inuerussimasumut utissapput Jerusalemimilu Jehovap naalaffia sanaqqissallugu. (Jeremia 46:27; Amosi 9:13-15) Ukiut 200-t missiliorlugit tamatuma siorna Babylonimik uppititsisussap Guutillu innuttaanik pallorfiginninnermik minguitsumik pilersitseqqiisinnaatitsisussap aqqa Esajap siulittuutigaa. Taannalu tassaavoq Kyrosi. Allaat Esajap Kyrosip immikkut ittumik periaaseqarluni illoqarfimmik tiguaanissaa annikitsualuttai ilanngullugit allaatigaa. — Esaja 44:24–45:3.

3. Missiarsip tikiunnissaa misigiumaagaalu. Missiarsi illoqarfimmi Betlehemimi inunngortussaavoq. (Mika 5:1) Maniguuttuussaaq siutituumilu qimusserluni Jerusalemimut isissalluni. (Zakaria 9:9) Saamasuullunilu inussiarnersuugaluarluni nuannarineqarnanilu inuppassuarnit ajattorneqassaaq. (Esaja 42:1-3; 53:1, 3) Peqqarniitsumik toqutaajumaarpoq. Inuunera tamaanga killeqassava? Naagga, taassumami pilliutaanut siunertaavoq inuppassuit ajortiminnik isumakkeerfigineqarnissaannik ajornarunnaarsitsinissaq. (Esaja 53:4, 5, 9-12) Tamanna aatsaat naammassineqarsinnaavoq taanna makititaappat.

4. Missiarsip nunarsuarmut naalakkersuinissaa. Inuit naammalluinnanngitsut eqqissinermik siuarsaasumik namminneq aqutsisinnaanngillat, kunngili Missiarsiusoq Eqqissinermut Naalagaanermik taaneqassaaq. (Esaja 9:5, 6) Taassuma naalakkersuinerani inuit tamarmik eqqisseqatigiillutik inuussapput allaallu uumasut eqqisseqatigissallugit. (Esaja 11:3-7) Nappaatit atugaajunnaassapput. (Esaja 33:24) Allaat toqu nungutitaalluinnassaaq. (Esaja 25:8) Inuit toqusimasut Missiarsip naalakkersuinerani nunarsuarmi inuunermut makititaassapput. — Danieli 12:13.

— Tunngavigineqartut: Esajap, Jeremiap, Danielip, Amosip, Mikap Zakariallu allagaat.