BIIBILIMI allakkat takinersaat erinarsuutinit illernartunit katersugaapput. Taakku ukiut 1000-t missiliorlugit ingerlaneranni allanneqarput. Tussiaatit imaqarput uppernermik ersersitsiniarluni allatanik isumalerujussuarnik killitsinnarnerpaallu ilaannik. Taakkunani allaatigineqarput inuit misigissusii assigiinngitsorpassuit soorlu nuannaarneq, unnersiutiginnikkusussuseq qujamasunnerlu, isumatsanneq, aliasunneq peqqissiminerlu. Erseqqippoq tussiaasiortut Guuti tatigalugu qanittumik attavigigaat. Taallani taakkunani sammineqartut ilaat misissoriartigit.

Jehova eqqortumik kisimi oqartussaasuuvoq, pallorfigineqartariaqartoq unnersiutigineqartariaqartorlu. Tussiaat 83:19-imi ima allassimavoq: “Illit kisivit — aqqit tassaasoq Jahve — Qutsinnerussaartuusutit nunarsuarmi tamarmi.” Tussiaatini arlalinni Jahve, imaluunniit Jehova, unnersiutigineqarpoq pinngortitani, soorlu qilaap ulloriai, nunarsuarmi uumassusillit amerlaqisut inuullu timaa tupinnartoq, pillugit. (Tussiaat 8, 19, 139, 148) Allani Jehova naalannarsisinneqarpoq Guutitut ilumoorfiginnitsiminik annaassisutut illersuisutullu. (Tussiaat 18, 97, 138) Sulilu allani naapertuilluarnerup Guutiatut naqisimaneqartunik isumassuisutut guutiitsunillu pillaasartutut qutsissisinneqarpoq. — Tussiaat 11, 68, 146.

Jehovap asasini ikiortarlugillu tuppallersartarpai. Immaqa tussiaatit ilisimaneqarnerpaartaraat Tussiaat 23, tassani Daavip Jehova savanik paarsisutut asannittutut, savaatiminik siulersuisutut, sernissuisutut isumassuisutullu allaatigaa. Tussiaat 65:3-mi Guutimik pallorfiginnittut eqqaasinneqarput Jehova tassaasoq ‘qinnutinik tusartartoq’. Ingasattumik ajortuliorsimasorpassuit tuppallersaatigingaarsimavaat Tussiaat 39 aamma 51, taakkunani Daavip ajortuliorujussuarsimanerminik peqqissimissutiginninnini qamannga pisumik oqaatigimmagu Jehovallu isumakkeerfiginnittarneranik upperinninnini ersersillugu. Tussiaat 55:23-mi Jehovamik tatiginninnissamik nanertuutigisanillu tamanik taassumunnga tunniussinissamik kajumissaaruteqarpoq.

Jehovap naalagaaffik Missiarsikkoortoq iluaqutigalugu silarsuaq allanngortissavaa. Tussiaatit arlallit erseqqissumik Missiarsimut, kunngimut siulittuutigisamut, tunngatinneqarput. Tussiaat 2-mi siulittuutigineqarpoq naalakkersuisup taassuma inuiaat guutiitsut imminut akeqqersimaartut piuneerukkumaarai. Tussiaat 72-imi paasinarsisinneqarpoq kaanneq, naapertuilluanngitsuliornerit naqisimanninnerlu kunngimit taassumannga peerneqassasut. Tussiaat 46:10 naapertorlugu Guutip, Missiarsip naalagaaffia aqqutigalugu, sorsunnerit soraarsikkumaarpai allaallu sakkut sorsuutit tamaasa suujunnaarsikkumaarlugit. Tussiaat 37-mi allassimavoq guutiitsut peerukkumaartut, inuilli naapertuilluartut nunarsuarmi naassaanngitsumik inuujumaartut, nunarsuaq tamakkerlugu eqqisseqatigiinneq aaqqiagiinnerlu nuannaarutigalugit.

— Tunngavigineqartut: Tussiaatit.